ސަރުކާރާ ދެކޮޅަށް ސިޔާސީ ޕާޓީތަކުން ނުނިކުތް ނަމަވެސް އާއްމު ރައްޔިތުން މުޒާހަރާއަށް ނުކުމޭ، އެއީ ސަރުކާރުން ވިސްނަންޖެހޭ ކަމެއް: ސަނީފް
11 އޯގަސްޓު 2024 | އާދީއްތަ 02:00މިއަދުގެ ސަރުކާރުން ނުފޫޒު ފޯރުވުމަށް މުޅި ދައުލަތް ބޭނުންކުރޭ
ފަލަސުރުހީ ޕްރޮގްރާމްގައި 19 ވަނަ ރައްޔިތުން މަޖިލީހުގެ ތިނަދޫ ދެކުނު ދާއިރާގެ މެމްބަރު އަބްދުﷲ ސަނީފް ވާހަކަދައްކަވަނީ
ރައީސް ޑރ.މުހައްމަދު މުއިއްޒުގެ ސަރުކާރާ ދެކޮޅަށް ސިޔާސީ ޕާޓީތަކުން މަގުމައްޗަށް ނުނިކުތް ނަމަވެސް އެކި ސިނާއަތްތަކުގައި މަސައްކަތް ކުރާ މުވައްޒަފުން މުޒާހަރާއަށް ނުކުތުމުން ރަނގަޅު މިސްރާބަށް ގައުމު ނުދާކަން ހާމަވާ ކަމަށް 19 ވަނަ ރައްޔިތުން މަޖިލީހުގެ ތިނަދޫ ދެކުނު ދާއިރާގެ މެންބަރު އަބްދުﷲ ސަނީފް ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި ސަނީފް ވިދާޅުވީ މިއަދުގެ ސަރުކާރުން ނުފޫޒު ފޯރުވުމަށް މުޅި ދައުލަތް ބޭނުންކުރާ ކަމަށާއި، ހުރިހާ ދިމާލެއްގައި އޮތީ ސިޔާސީ ނުފޫޒު ކަމަށެވެ.
ސަނީފް ވިދާޅުވީ ވަޒީފާގެ މާހައުލަށް ބަލާއިރު، ވަޒީފާ މެރިޓް އުސޫލުން ލިބޭނެ އެއްވެސް ގޮތެއްނެތް ކަމަށާއި، ތައުލީމީ ޒުވާނުން ވަޒީފާ ހޯދުމަށް ސިޔާސީ މީހެއްގެ ނުފޫޒު ހޯދުން ނޫން ގޮތެއް ނެތް ކަމަށެވެ. އެ އުސޫލު ބަދަލު ކުރުމަށް މިއަދު ރަައްޔިތުން މަސައްކަތް ކުރަންޖެހޭ ކަމަށް އޭނާ ވިދާޅުވިއެވެ.
މީގެ އިތުރުން ސަނީފް ވިދާޅުވީ ސިޔާސީީ އެއްވެސް ޕާޓީއަކުން މަގު މައްޗަށް ނުނިކުތް ނަމަވެސް އެކި ސިނާއަތްތަކުގައި މަސައްކަތް ކުރާ މީހުންނާއި، ހައްގުތައް ހޯދުމަށް މަސައްކަތް ކުރާ އާއްމު ރައްޔިތުން ސަރުކާރާ ދެކޮޅަށް މުޒާހަރާއަށް ނުކުންނަ ކަމަށެވެ.
އެގޮތުން ރާޅުގަނޑު ސަރަހައްދުގައި ބޯހިޔާވަހިކަމުގެ ހައްގު ހޯދުމަށް އާއްމު ރައްޔިތުން މުޒާހަރާ ކުރި ކަމަށާއި، ހަމަ އެދުވަހު އާޓިފިޝަލް ބީޗް ސަރަހައްދު ޕީއެންސީ ޖަގަހަ ކުރިމަތީގައި ޓެކްސީ ޑްރައިވަރުންނާ، ވެހިކަލް ޓޯ ކުރާ މައްސަލާގައި ޒުވާނުން މުޒާހަރާ ކުރި ކަމަށް ސަނީފް ވިދާޅުވިއެވެ. އަދި ވިދާޅުވީ ނޯތު ހާބަރުގެ ޚިދުމަތް ލިބުމަށް ދަތިވެ، އެކަން ސަރުކާރުގެ ސަމާލުކަމަށް ގެނައުމަށް ބޯޓު ފަހަރުގެ ވެރިންނާއި އުޅަނދުފަހަރުގެ ކައްޕިން މުޒާހަރާ ކުރި ކަމަށެވެ.
އެހެންކަމުން މިސަރުކާރާއެކު ގައުމުދާ މިސްރާބު ރަނގަޅު ނޫންކަން ހާމަވާ ކަމަށް ސަނީފް ވިދާޅުވިއެވެ.
ސަނީފް ވިދާޅުވީ އިދިކޮޅު ސިޔާސީ ޕާޓީތަކުން ރައީސް މުއިއްޒުގެ ސަރުކާރަށް ދައުލަތް ހިންގުމަށް ފުރުސަތު ދީފައިވާ ކަމަށެވެ. ނަމަވެސް ގައުމުގެ ކަންކަން ގޯހުން ގޯހަށްދާނަމަ، އާއްމު ރައްޔިތުންގެ ހައްގުގައި ސިޔާސީ ޕާޓީތަކުން މަގުމައްޗަށް ނުކުންނާނެ ކަމަށާއި، އެއީ ސިޔާސީ މީހުންގެ މަސްއޫލިއްޔަތެއް ކަމަށް ސަނީފް ވިދާޅުވިއެވެ. އަދި ވިދާޅުވީ ސަރުކާރާ ދެކޮޅަށް އާއްމު ރައްޔިތުން ނުކުމެ މުޒާހަރާތައް ކުރަން ފެށުމުން އެކަމާ މިހާރަށް ވުރެ ބޮޑަށް ސަރުކާރުން ވިސްނައި، ކަންކަން ރަނގަޅުކުރަންޖެހޭ ކަމަށެވެ.
