ބަންގްލަދޭޝްގެ އުއްތަމަފަނޑިޔާރުގެ އިސްތިއުފާ އަށް ގޮވާލާ ކުރި މުޒާހަރާ އާ އެކު އޭނާ އިސްތިއުފާ ދެއްވަން އެއްބަސްވެވަޑައިގެންފިއެވެ.
ބަންގްލަދޭޝްގެ އެންމެ މަތީ ކޯޓުގެ ކުރިމަތީގައި އޭނާގެ އިސްތިއުފާ އަށް ގޮވާލާ މުޒާހަރާ ކުރި ފަރާތްތަކުން ވަނީ އިސްތިއުފާ ދެއްވަން އުއްތަމަފަނޑިޔާރަށް މުހުލަތެއް ދީފައެވެ.
މިދިޔަ އަހަރު ބަންގްލަދޭޝްގެ ސްޕްރީމް ކޯޓުގެ އެންމެ އިސް ފަނޑިޔާރު ކަމުގެ މަގާމަށް އައްޔަން ކުރި އުބައިދުލް ހަސަން ވިދާޅުވީ އުސޫލެއްގެ ގޮތުން އިސްތިއުފާ ދެއްވަން އެއްބަސްވެ ވަޑައިގަންނަވާ ކަމަށެވެ.
ބަންގްލަދޭޝްގެ އުއްތަމަފަނޑިޔާރު ބެލެވިފައިވަނީ މަގާމުން އިސްތިއުފާ ދެއްވާ އަވައްޓެރި އިންޑިއާ އަށް ފިއްލަވައިގެން ވަޑައިގެންނެވި ޝޭޚް ހަސީނާ އަށް ވަފާތެރި ބޭފުޅެއްގެ ގޮތުގައެވެ.
ހޮނިހިރު ދުވަހު މުޒާހަރާ ކުރާ މީހުން ވެރިރަށް ޑާކާ ގައި ހުންނަ ސްޕްރީމް ކޯޓުގެ އިމާރާތް ކައިރިއަށް ޖަމާވީ، އުއްތަމަފަނޑިޔާރު އެހެން ކޯޓުތަކުގެ ފަނޑިޔާރުންނާ ބައްދަލު ކުރައްވާ މަޝްވަރާތައް ގެންދަވާފައިވާތީ ޝަރުއީ ދާއިރާ މެދުވެރިކޮށް ބަޣާވާތެއް ރާވާ ކަމަށް އޭނާގެ މައްޗަށް ތުހުމަތު ކުރެވިގެން ކަމަށް ރިޕޯޓްތައް ބުނެއެވެ.
ބަންގްލަދޭޝްގެ ޔުނިވަރސިޓީ ދަރިވަރުން އިސްވެ ތިބި ކުރި މުޒާހަރާ ގައި ވަނީ ސްޕްރީމް ކޯޓުގެ އަނެއް ހަތް ފަނޑިޔާރުންގެ އިސްތިއުފާއަށް ވެސް ގޮވާލާފައެވެ. އެމީހުން ދެކެނީ ބަންގްލަދޭޝްގެ ސްޕްރީމް ކޯޓު ސިޔާސީ ވެފައިވާ ކަމަށެވެ.
ހަސީނާގެ ބާރުތައް ކުއްލިއަކަށް ގެއްލި އޭނާގެ ސަރުކާރު ވެއްޓުމާއެކު މުޒާހަރާ ކުރާ މީހުންގެ ޕްރެޝަރަށް ހަސީނާގެ ސަރުކާރުގެ އިސް މަގާމުތަކުގައި ތިބި ފަރާތްތައް ދަނީ މަގާމުތަކުން ދުރުވަމުންނެވެ. މި ގޮތުން ފުލުހުންގެ ވެރިޔާ އާއި ސެންޓްރަލް ބޭންކުގެ ގަވަރުނަރު ވެސް ވަނީ މަގާމުން އިސްތިއުފާ ދީފައެވެ.
ހަސީނާ އިސްތިއުފާ ދެއްވުމުން ބަންގްލަދޭޝްގައި އައު އިންތިޚާބެއް ބޭއްވެންދެން ގައުމު ހިންގުމަށް ވަގުތީ ސަރުކާރެއް ވަނީ އެކުލަވާލާފައެވެ. ވަގުތީ ސަރުކާރު ހިންގުމަށް ބޮޑު ވަޒީރުގެ ފެންވަރުގައި "ޗީފް އެޑްވައިޒަރ" ގެ މަގާމަށް 2006 ވަނަ އަހަރު ނޮބެލް އިނާމް ހާސިލް ކުރައްވާފައިވާ މުހައްމަދު ޔޫނުސް ވަނީ އައްޔަން ކޮށްފައެވެ.
