ޕާކިން ޒޯނެއް ތަރައްގީ ކުރުމަށް މާފަންނު ސަހަރާ ހުސްކުރަނީ

ޕާކިން ޒޯނެއް ތަރައްގީ ކުރުމަށް މާފަންނު ސަހަރާ ހުސްކުރުމުގެ މަސައްކަތް ކޮށްދޭނެ ފަރާތެއް ހޯދުމަށް މާލެސިޓީ ކައުންސިލުން އިއުލާން ކޮށްފިއެވެ.

މާލެސިޓީ ކައުންސިލުން ބުނީ އެ އިދާރާގެ ބެލުމުގެ ދަށުގައިވާ މާފަންނު ސަހަރާ ހުސްކުރުމުގެ މަސައްކަތް އަމިއްލަ ތަކެތީގައި ކުރާނެ ފަރާތެއް ހޯދުމަށް ބޭނުންވާ ކަމަށެވެ. މި މަސައްކަތް ކުރާނީ އިސްލާމިކް މިނިސްޓްރީއިން ކަނޑައަޅާފައިވާ އުސޫލާއި އެއްގޮތަށް ކަމަށް ކައުންސިލުން ބުނެއެވެ.

މާފަންނު ސަހަރާގައި 36،153 އަކަފޫޓު ހުރެއެވެ.

މި މަސައްކަތަށް ބީލަން ހުށަހެޅުމުގެ ފުރުސަތު ހުޅުވާލާފައިވާއިރު، މަސައްކަތް ކުރުމަށް ޝައުގުވެރިވާ ފަރާތްތަކުން މައުލޫމާތު ސާފުކުރުމަށާއި އަގު ހުށައެޅުމަށް ސިޓީ ކައުންސިލްގެ ޕްރޮކިއުމަންޓް ސެކްޝަނަށް އާދެވޭނެ ކަމަށް ކައުންސިލުން ބުނެއެވެ.

ކައުންސިލުން ބުނީ މިމަހުގެ 14 ވަނަ ދުވަހުގެ 11:00 ގައި އެއިދާރާއަށް އައުމުން މައުލޫމާތު ސާފުކުރެވޭނެ ކަމަށާއި ބިޑު ހުށައެޅުން އޮންނާނީ މިމަހުގެ 20 ވަނަ ދުވަހުގެ 11:00 ގައި ކަމަށެވެ.

މީގެ އިތުރުން ކައުންސިލުން ބުނީ ގަޑިއަށް މައުލޫމާތު ސާފުކުރަން ނާންނަ ފަރާތްތަކާއި ގަޑިޖެހުމުގެ ފަހުން އަންދާސީ ހިސާބު ހުށަނާޅާ ފަރާތްތަކުގެ އަންދާސީ ހިސާބު ބަލައިނުގަނެވޭނެ ކަމަށެވެ.

މާލެސިޓީއަށް ދިމާވެފައިވާ އެންމެ ބޮޑު އެއް މައްސަލައަކީ ޕާކިންގެ މައްސަލައެވެ. އެކަށީގެންވާ މިންވަރަށް ޕާކުކުރާ ޖާގަ ނެތުމުން އެކަމުގެ ކަންބޮޑުވުންތައް އާއްމު ރައްޔިތުން ދަނީ ކުރަމުންނެވެ. ވެހިކަލް ޓޯ ކުރުމުގެ މައްސަލަ ފެންމަތިވެފައިވާއިރު، މާލޭގައި ދިރިއުޅޭ މީހުންނަށް ހިތް ފަސޭހަ މާލެއެއް ހޯދައިދޭނެ ކަމަށް މާލެސިޓީގެ މޭޔަރު އާދަމް އާޒިމް ވިދާޅުވެފައިވެއެވެ.

ހިތް ފަސޭހަ މާލެއެއް ތަރައްގީ ކުރުމަށް ކުރަމުންދާ މަސައްކަތުގެ ދަށުން ޕާކިން ޒޯންތައް ތަރައްގީ ކުރުމުގެ މަސައްކަތްތައް ކުރާނެ ކަމަށް އާޒިމް ވިދާޅުވިއެވެ. އަދި ވިދާޅުވީ ޕާޒިން ޒޯންތައް ތަރައްގީކޮށް، ޕާކިންގެ އިމާރާތްތައް އަވަސް ކުރުމަކީ ކައުންސިލްގެ އަމާޒެއް ކަމަށެވެ.