ރަޝިއާ އިން ޔޫކްރެއިންގެ ސްޕަރމާކެޓަކަށް ހަމަލާދީފި، ހަމަލާގައި 11 މަރު
ހަމަލާގައި 37 މީހުންވަނީ ޒަޚަމްވެފައި، އިމާރާތްތަކުގެ ދަށުވެފައިވާ މީހުން ހޯދުމުގެ މަސައްކަތްތައް ދަނީ ކުރަމުންނެވެ.
ޑޯނެޓްސްކް ރީޖަނަލް މިލިޓަރީ އެޑްމިނިސްޓްރޭޝަން
ޔޫކްރެއިންގެ ޑޮނެސްކް ސަރަހައްދުގެ ކޮސްޓިއާންޓިނޮވްކާ ގެ ސްޕަރމާކެޓަކަށް ރަޝިއާ އިން ހުކުރު ދުވަހު ދިން އާރޓިލަރީ ހަމަލާގައި ޔޫކްރެއިންގެ 11 މީހުން މަރުވެފައިވާ ކަމަށް ޔޫކްރެއިންގެ އިންޓީރިއާ މިނިސްޓްރީން ބުނެފިއެވެ.
އޮފިޝަލުން ބުނެފައިވާ ގޮތުގައި ހަމަލާގައި 37 މީހުން ވަނީ ޒަޚަމްވެފައެވެ.
ސްޕަރމާކެޓަށް ހަމަލާ ދިން ހާދިސާގައި ކައިރީގައި ހުރި ޕޯސްޓް އޮފީހަކަށާއި މީހުން ދިރިއުޅޭ އިމާރާތްތަކަށާއި، ފިހާރަތަކަށާއި ވެހިކަލް ތަކަށް ގެއްލުންވި ކަމަށް ޔޫކްރެއިން އިން ބުނެފައިވެއެވެ.
ފުނޑުވެފައިވާ އިމާރާތުގެ ދަށުގައި އިތުރު މީހުން ތާށިވެފައި ތިބި ކަމަށް ބެލެވޭ ކަމަށާއި ސާޗް އެންޑް ރެސްކިއު މަސައްކަތް ކުރިއަށް ދާ ކަމަށް ޔޫކްރެއިންގެ ރައީސް ވިދާޅުވެފައިވެއެވެ.
ޔޫކްރެއިންގެ ރައީސް ޒެލެންސްކީ މި ހަމަލާ އާ ގުޅިގެން ވިދާޅުވީ، ނިރުބަވެރި މި ހަމަލާގެ ޖަވާބު ރަޝިއާ އިން ދޭން ޖެހޭނެ ކަމަށެވެ.
