ފަޅުރަށްތައް ހޯދުމަށް އެދި ހުށަހެޅި ޕްރޮޕޯޒަލްގެ ޓެކްނިކަލް މަސައްކަތް ވަރަށް އަވަހަށް ނިމޭނެ - އާދަމް ޝަރީފް
ކައުންސިލްތަކަށް މިއަދު އެ ފަދަ މަސައްކަތްކުރާނެ މަގެއް ފަހިވެގެން ދިއުމުގެ ސަބަބުން ކައުންސިލްތަކުން އޭގެ ބޭނުން އެންމެ ފުރިހަމަ ގޮތުގައި ހިފުމަށް އެ މަނިކުފާނު ވަނީ އިލްތިމާސްކުރައްވާފަ
މާލެ ސިޓީ ކައުންސިލްގެ މެމްބަރުން ހުވާކުރުމުގެ ރަސްމިއްޔާތުގައި އާދަމް ޝަރީފް އުމަރު ވާހަކަދައްކަވަނީ
ފަޅުރަށްތައް ހޯދުމަށް އެދި ހުށަހަޅާފައިވާ ޕްރޮޕޯސަލްތަކުގެ ޓެކްނިކަލް މަސައްކަތް ސިޓީސް މިނިސްޓްރީން ވަރަށް އަވަހަށް ނިންމެވުމަށް ފަހު ރައީސުލް ޖުމްހުރިއްޔާގެ އަރިހަށް ފޮނުއްވާނެ ކަމަށް ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާއި ބެހޭ ވަޒީރު އާދަމް ޝަރީފު ޢުމަރު ވިދާޅުވެއްޖެއެވެ.
އެ މަނިކުފާނު މިހެން ވިދާޅުވީ މާލޭސިޓީގެ ކައުންސިލަރުން ހުވާކުރުމަށް ބުދަ ދުވަހުގެ ރޭ ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ. ފަޅުރަށްތައް ދޫކުރުމުގެ ސިޔާސަތުގެ ތެރެއިން ހަތަރު ކައުންސިލަކުން ފަޅުރަށް ހޯދުމަށް ޝައުޤުވެރިކަން ފާޅުކޮށް ޕްރޮޕޯސަލް ހުށަހަޅާފައިވާ ކަމުގައި އެ މަނިކުފާނު ވިދާޅުވިއެވެ. މިހާހިސާބަށް އައި އިރު ޕްރޮޕޯސަލް ހުށަހަޅާފައިވާ ރަށްތަކަކީ ރ. އަތޮޅު އިނގުރައިދޫ، ދ. އަތޮޅު ކުޑަހުވަދޫ، މ.އަތޮޅު ކައުންސިލް އަދި ލ.އަތޮޅު މާވަށު ކައުންސިލް ކަމަށް ވެސް އެ މަނިކުފާނު ވިދާޅުވިއެވެ. އާދަމް ޝަރީފް ވިދާޅުވީ މަސްވެރިކަމާއި، ދަނޑުވެރިކަން ފިޔަވާ އިތުރު މަސައްކަތްތައް ކުރުމަށް ކައުންސިލްތަކަށް ބޭނުންވާ ފަޅުރަށްތައް ހޯދުމަށް ކައުންސިލްތަކުން ޕްރޮޕޯޒަލްތައް ހުށަހަޅާފައިވާ ކަމަށެވެ. ފޮނުއްވެވޭނެ ކަމުގެ ޔަޤީންކަން އޮތްކަމުގައެވެ.
އެ މަނިކުފާނު އިތުރަށް ވިދާޅުވީ 25 އަހަރުގެ މުއްދަތަށް ފަޅުރަށެއް ލިބުމަކީ ކައުންސިލްތައް ބާރުވެރިކުރުމުގެ އިތުރުން ރަށްރަށަށް ދިމާވެފައިވާ އިޖްތިމާޢީ މައްސަލަތަކަށް ވެސް ޙައްލު ލިބުމަށް މަގުފަހިވެގެން ދާނެ ކަމެއް ކަމަށެވެ. އެ ގޮތުން ސިނާޢީ މަސައްކަތްތައް ކުރުމަށް އިތުރަށް މަގުފަހިވެގެން ދާނެ ކަމަށް ދެކިވަޑައިގެންނަވައި ކަމަށް ވެސް ވަޒީރުގެ ވާހަކަފުޅުގައި ވަނީ ވިދާޅުވެފައެވެ.
ކައުންސިލްތަކަށް މިއަދު އެ ފަދަ މަސައްކަތްކުރާނެ މަގެއް ފަހިވެގެން ދިއުމުގެ ސަބަބުން ކައުންސިލްތަކުން އޭގެ ބޭނުން އެންމެ ފުރިހަމަ ގޮތުގައި ހިފުމަށް އެ މަނިކުފާނު ވަނީ އިލްތިމާސްކުރައްވާފައެވެ. ސަރުކާރުން ކައުންސިލްތަކަށް ރަށްރަށް ދޫކުރެއްވުމަށް ހަމަޖެހިފައި ވަނީ އެ ކަމަށް އެދި ޕްރޮޕޯސަލް ހުށައަޅުއްވައިފައިވާ ކައުންސިލްތަކަށް އެ ރަށްތައް 25 އަހަރަށް ދަނޑުވެރިކަމާއި، މަސްވެރިކަން ނޫން އެހެނިހެން އިޤްތިޞާދީ މަސައްކަތްކުރުމަށެވެ.
