ގާޒާ އަށް އިޒްރޭލުން ދިން ހަމަލާތަކުގައި މަރުވެފައިވާ ކަމަށް ބެލޭ ފަލަސްތީނުގެ 80 މީހެއްގެ ހަށިގަނޑު އިޒްރޭލް ސިފައިން ފަލަސްތީން އާ ހަވާލު ކޮށްފިއެވެ.
މަރުވެފައިވާ މީހުންގެ ހަށިތައް ހޯމަ ދުވަހު ހަވާލު ކުރި އިރު، ހޯމަ ދުވަހުގެ އިޒްރޭލުގެ ހަމަލާތަކުގައި އިތުރު 18 ފަލަސްތީން މީހުން މަރުވެފައިވާ ކަމަށް ގާޒާގެ ހެލްތް މިނިސްޓްރީން ވަނީ ބުނެފައެވެ.
ޚާން ޔޫނިސްގައި ހުންނަ ފަލަސްތީންގެ ސިވިލް އިމަރޖެންސީ ސާވިސްގެ ޑިރެކްޓަރ ޔާމީން އަބޫ ސުލެއިމާން އާ ހަވާލާދީ މީޑީއާ ރިޕޯޓްތައް ބުނާ ގޮތުގައި ހަވާލު ކުރި ހަށިތަކަކީ ކުރިން ވަޅުލާފައިވަނިކޮށް ކޮނެގެން ނަގާފައިވާ ހަށިތަކެއް ކަމެއް ނުވަތަ އިޒްރޭލުން ހައްޔަރު ކޮށް އަނިޔާ ކޮށް މަރާލި ބައެއްގެ ހަށިތަކެއް ކަމެއް އަދި ސާފު ނުވާ ކަމުގައެވެ.
ހަވާލު ކުރި އެއްވެސް ހަށިގަނޑެއްގެ ނަމެއް، އުމުރެއް، އެއްވެސް އެއްޗެއް ނުބުނެ، މިއީ ހަނގުރާމައިގެ ޖަރީމާއެއް. މިއީ އިންސާނިއްޔަތާ ޚިލާފް ޖަރީމާއެއް.ފަލަސްތީންގެ ސިވިލް އިމަރޖެންސީ ސާވިސްގެ ޑިރެކްޓަރ ޔާމީން އަބޫ ސުލެއިމާން
ހޯމަ ދުވަހު ހަވާލު ކުރި ހަށިތައް ސްކްރީން ކުރުމަށްފަހު އެމީހުން މަރުވެފައިވާ ސަބަބު ދެނެގަތުމަށްފަހު ހަށިތަކުގެ އައިޑެންޓިޓީ ދެނެގަތުމުގެ މަސައްކަތް ކުރާނެ ކަމަށް އަބޫ ސުލެއިމާން ބުނެފައިވެއެވެ. އޭގެ ފަހުން އެއް ވަޅެއްގައި ހުރިހާ ހަށިތަކެއް ވަޅުލާނީ ކަމަށް އޭނާ ބުންޏެވެ.
ހަށިތައް ހަވާލު ކޮށްފައިވާނީ 15 ދަބަހުގައެވެ. އެއިން ކޮންމެ ދަބަހެއްގައި އެކި އަދަދަށް ހަށިތައް ހުރިކަމަށް ބުނެފައިވެއެވެ.
