އެމްއެމްއޭ އޮނިގަނޑަށް ބަދަލުގެނެސް، 5 އެމްޑީން ކަނޑައެޅުމަށް ނިންމައިފި
5 އޯގަސްޓު 2024 | ހޯމަ 11:35މި ބަދަލުތަކުގެ ސަބަބުން އެމްއެމްއޭ އިން ކުރަމުންދާ މަސައްކަތްތައް މިހާރަށްވުރެ ހަރުދަނާވާނެ
މޯލްޑިވްސް މަނިޓަރީ އޮތޯރިޓީ
ޒަމާނީ ސެންޓްރަލް ބޭންކަކަށް އަދި ހެޔޮ ނަތީޖާ ނެރޭ ބޭންކަކަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) ހެދުމަށް އެތާގެ އޮނިގަނޑަށް ބަދަލުތައް ގެނެސްފިއެވެ.
މި ބަދަލުތައް ގެންނަން ނިންމާފައި ވަނީ އެމްއެމްއޭގެ ބޯޑުގެ މަޝްވަރާގެ މަތިން ގަވަރުނަރެވެ.
މި ބަދަލުތަކާ ގުޅޭގޮތުން ރާއްޖެއެމްވީއަށް އެމްއެމްއޭގެ އޮފިޝަލެއް ވިދާޅުވީ މި ބަދަލުތަކުގެ ސަބަބުން އެމްއެމްއޭ އިން ކުރަމުންދާ މަސައްކަތްތައް މިހާރަށްވުރެ ހަރުދަނާވެ އަދި ހެޔޮ ނަތިޖާތަކެއް ނެރުމަށް ފަސޭހަވާނެ ކަމަށެވެ.
އެމްއެމްއޭގެ އޮނިގަނޑަށް މިގެނެވުނު ބަދަލުތަކުގެ ތެރޭގައި އެސިސްޓެންޓް ގަވަރުނަރުގެ މަގާމު ވަނީ މެނޭޖިން ޑިރެކްޓަރު މަގާމަށް ބަދަލުކޮށްފައެވެ. އަދި މިހާރު ތިއްބެވި އެސިސްޓެންޓް ގަވަރުނަރުން ވަނީ އެޑްވައިޒަރުންގެ މަގާމަށް ޕްރޮމޯޓްކޮށްފައެވެ.
މިއާއި އެކު އެމްއެމްއޭގެ މަސައްކަތްކުރާ ތައުލީމީ އަދި ތަޖުރިބާކާރު ފަރާތްތަކަށް ފުރުސަތު ފުޅާކުރުމުގެ ގޮތުން އަލަށް ހުޅުވާލާ މެނޭޖިންގ ޑިރެކްޓަރު މަގާމަކީ ފަސް އަހަރުގެ ދެ ދައުރަކަށް ހޮވޭ މަގާމަށް ބަދަލުކޮށްފައިވާ ކަމަށް އޮފިޝަލް ވިދާޅުވިއެވެ.
އޮފިޝަލް ވިދާޅުވީ މި މާގާމުތަކަށް ކުރިމަތިލުމުގެ ފުރުސަތު އެމްއެމްއޭގައި މަސައްކަތް ކުރާ ފަރާތްތަކުގެ އިތުރުން އާންމުކޮށްވެސް ހުޅުވާލާނެ ކަމަށެވެ. މީގެ ސަބަބުން އެމްއެމްއޭގައި މިހާރު ތިބި ގާބިލު ފަރާތްތަކަށް އާ ފުރުސަތުތައް ހުޅުވިގެންދާނެ ކަމަށާއި، ފަންނީ ގާބިލު މީހުންނަށް އެމްއެމްއޭ އަށް ވަނުމަށް ވެސް ފުރުސަތު ހުޅުވޭނެ ކަމަށް އޮފިޝަލް ވިދާޅުވިއެވެ.
