ޖިހާދަށް ކުރާ ދައުވާތައް ބޭރުކޮށްލި މައްސަލަ އިސްތިއުނާފު ކުރަން ގަސްތުކުރަން: ޕީޖީ އޮފިސް

ކުރީގެ ނައިބު ރައީސް އަބްދުﷲ ޖިހާދުގެ މައްޗަށް އުފުލާފައިވާ ދައުލަތަށް ފައިދާއެއް ލިބެން އޮތް ކަމެއްގައި އެ ނޫން ގޮތަކަށް އަމަލުކުރެއްވި ކަމުގެ ދައުވާ ކްރިމިނަލް ކޯޓުން ބޭރުކޮށްލަން ނިންމާފައިވާއިރު، އެ ނިންމުން އިސްތިއުނާފު ކުރަން ވިސްނަމުންދާކަމަށް ޕްރޮސެކިއުޓަރ ޖެނެރަލް އޮފީހުން ބުނެފިއެވެ.

ކޯޓުން މި ދައުވާ ބޭރުކޮށްލާފައިވަނީ ޖުލައި މަހުގެ 25 ވަނަ ދުވަހު އެ ކޯޓުގައި ކުރިއަށްދިޔަ އަޑުއެހުމުގައެވެ. އެ އަޑުއެހުމުގައި ވަނީ ޝަރީއަތުގެ ކުރީގެ ހުށަހެޅުންތަކަށް ގޮތް ނިންމާފައެވެ.

މިއީ ޝަރީއަތުގެ ކުރީގެ ހުށަހެޅުންތަކަށް ގޮތް ނިންމައި ބޭރުކޮށްލާފައިވާ މައްސަލައެއްކަމަށްވާތީ މި ބާވަތުގެ މައްސަލަ އިސްތިއުނާފު ކުރަން 10 ދުވަހުގެ މުއްދަތެއް ލިބެއެވެ. އެހެންކަމުން އިސްތިއުނާފު މުުއްދަތު ހަމަވާނީ 11 އޯގަސްޓުގައެވެ.

ރާއްޖެއެމްވީއާ ވާހަކަ ދައްކަވަމުން ޕީޖީ އޮފީހުގެ ޕަބްލިކް ޕްރޮސެކިއުޓަރ އަހުމަދު ޝަފީއު ވިދާޅުވީ، ދަށު ކޯޓުގެ ނިންމުން އިސްތިއުނާފު ކުރަން ޕީޖީ އޮފީހުން ގަސްތުކުރާ ކަމަށެވެ. އެކަމަށްޓަކައި ދަށު ކޯޓުގެ ނިންމުން ދިރާސާ ކުރަމުންދާ ކަމަށާއި، ޕީޖީ އޮފީހުން ގޮތެއް ނިންމާނީ އެއަށްފަހުކަމަށް އޭނާ ވިދާޅުވިއެވެ.

މައްސަލައިގެ ފަސްފަހަތް:

ދަށު ކޯޓުގައި މައްސަލަ ނިންމެވި ގާޒީ ވިދާޅުވީ، އޭސީސީން ތަހުގީގު ނިންމިތާ 4 އަހަރު ފަހުން އަލުން އެ މައްސަލައިގެ ތަހުގީގެއް ރިޔާސީ ކޮމިޝަނުން ފަށާއިރު، ތަހުގީގު ފަށާ ސަބަބު ޖިހާދަށް ބުނެދީފައި އޮންނަންޖެހޭނެ ކަމަށެވެ. އެގޮތުން މި މައްސަލައިގައި ހުށަހެޅިފައިވާ ލިއެކިއުންތަކަށް ބަލާއިރު، ޖިހާދަށް ޤާނޫނީ އިންޒާރު ދެވިފައިވާކަން އެނގެން އޮންނަ ކަމަށާއި، ނަމަވެސް ތަހުގީގު ފެށި ސަބަބު ބުނެދެވިފައިވޭތޯ ސުވާލު އުފެދިފައިވާ ކަމަށް ވިދާޅުވިއެވެ.

މި މައްސަލައިގައި ލިބުނުކަމަށް ބުނާ އައު ހެއްކަކީ 2022 ވަނަ އަހަރުގެ ޖުލައި މަހު އަދީބު ތަހުގީގަށް ދީފައިވާ ބަޔާނެވެ. ނަމަވެސް އެ ހެކީގެ ސައްޙަކަން ކަށަވަރު ކުރުމަށް އެއްވެސް މަސައްކަތެއް ދައުލަތުން އަދި ތަހުގީގުގައިވެސް ކޮށްފައިނުވާކަމަށް ދިފާއުން ފާހަގަކުރިއެވެ.

ގާޒީ އިތުރަށް ވިދާޅުވީ، މި މައްސަލައިގައި އަހުމަދު އަދީބު ދައްކާފައިވާ ވާހަކަތަކަށް ބަލާއިރު، އޭރު އަދީބަކީވެސް ތުހުމަތުތަކެއް ކުރެވޭ ފަރާތެއް ކަމަށާއި، އެހެންކަމުން އަދީބު ދައްކާ ވާހަކަތަކުގެ މައްޗަށް ބިނާކޮށް އެ ވާހަކަތަކުގެ ސައްޙަކަން ކަށަވަރު ކުރުމަށް ތަހުގީގުގައިވެސް މަސައްކަތްތަކެއް ކުރެވިފައި އޮންނަންޖެހޭނެ ކަމަަަށެވެ. ނަމަވެސް މި މައްސަލައިގެ ތަހުގީގުގައި އެފަދަ މަސައްކަތެއް ކުރެވިފައި އޮތްކަން އެނގޭކަށް ނެތެވެ.

އެހެންކަމުން ތަހުގީގަށް އޭގެ އުނިކަން އައިސްފައިވާ ކަމަށާއި، ތަހުގީގުގައި ފުރިހަމަވާންޖެހޭ އަސާސީ ކަންކަން ފުރިހަމަ ނުވާކަމަށް ގާޒީ ވިދާޅުވިއެވެ. އުނިކަން ހުރި ތަހުގީގެއްގެ މައްޗަށް މި ދައުވާ ކުރިއަށް ގެންދެވޭނެކަމަށް ދެކިނުލައްވާކަންވެސް ގާޒީ ފާހަގަ ކުރެއްވިއެވެ.

އެހެންކަމުން ގާޒީ ވަނީ މި ދައުވާ ކްރިމިނަލް ކޯޓުގައި ބެލޭނެ ތަނެއް ނެތްކަމަށް ކަނޑައަޅުއްވާފައެވެ.