އޮލިމްޕިކްސްގައި ވާދަކުރާ ކެނެޑާ އަންހެން ފުޓްބޯޅަ ޓީމްގެ ކޯޗު ބެވާލީ ޕްރިއެސްޓްމޭން ސަސްޕެންޑް ކޮށްފި އެވެ.
ކެނެޑާ ފުޓްބޯޅަ ފެޑެރޭޝަނުން އޭނާ ސަސްޕެންޑް ކުރީ މުބާރާތުގެ ފުރަތަމަ މެޗުގެ ކުރިން ނިއުޒީލެންޑްގެ ޕްރެކްޓިސް ޑްރޯން އަރުވައިގެން ބެލި މައްސަލާގައެވެ. ސަސްޕެންޑް ކުރީ އެމައްސަލަ ބަލާ ނިމެންދެންނެވެ. އިތުރަށް އަޅާނެ ފިޔަވަޅެއް އިނގޭނީ ޑްރޯން އެރުވި މައްސަލަ އިތުރަށް ބަލާ, މައުލޫމާތު ހޯދުމަށްފަހު ކަމަށް ކެނެޑާ ފެޑެރޭޝަނުން ވަނީ ބުނެފައެއެވެ. ނިއުޒީލެންޑާ ދެކޮޅަށް މުބާރާތުގެ ފުރަތަމަ މެޗަށް ނިކުންނަން ވެފައި ވަނިކޮށް, ޑްރޯން އަރުވައިގެން ޕްރެކްޓިސް ބެލި މައްސަލަ ނިއުޒީލެންޑުން ވަނީ ރަސްމީކޮށް ހުށަހަޅާފައެވެ. ޑްރޯން އެރުވީ ކެނަޑާ ޓީމްގެ ސަޕޯޓިންގ އޮފިޝަލެކެވެ.
ބައިނަލްއަޤްވާމީ އޮލިމްޕިކް ކޮމިޓީންވެސް ދަނީ އެމައްސަލަ ބަލަމުންނެވެ. އަދި ފީފާއިން ވެސް ދަނީ އެމައްސަލަ ތަހުގީގު ކުރަމުންނެވެ. އެންމެ ފަހުގެ ޗެމްޕިއަން ކެނެޑާއިން ވަނީ އެމައްސަލަ ޖެހިފައި ވަނިކޮށް, ފުރަތަމަ މެޗުގައި 2-1 ން ނިއުޒީލެންޑް ބަލިކޮށްފައެވެ. އެެމެޗުގައި ޓީމަށް އިރުޝާދު ދިނީ ވަގުތީ ކޯޗު އެންޑީ ސްޕެންސް އެވެ. މުބާރާތް ނިމެންދެންވެސް ކޯޗު ސަސްޕެންޑްކުރި ކަން ކެނެޑާ ފެޑެރޭޝަނުން އިއުލާނުކުރީ ފުރަތަމަ މެޗަށްފަހު އެވެ.
