ރަޝިއާ އާ ވާހަކަ ދައްކަން ތައްޔާރު ކަމަށް ޔޫކްރެއިން އިން ބުނެފި

ރަނގަޅު ނިޔަތުގައި މަޝްވަރާ ކުރަން ރަޝިއާ އިން ބޭނުންވާ ނަމަ ޔޫކްރެއިނުން ރަޝިއާ އާ އެކު ވާހަކަ ދައްކަން ތައްޔާރަށް އޮތް ކަމަށް ޔޫކްރެއިންގެ ޚާރިޖީ ވަޒީރު ވިދާޅުވެއްޖެއެވެ.

ޔޫކްރެއިންގެ ޓޮޕް ޑިޕްލޮމަޓް މިހެން ވިދާޅުވީ، ބުދަ ދުވަހު ޗައިނާގެ ޚާރިޖީ ވަޒީރު ވޯންގ ޔީ އާ އެކު ގުއާންޒޯ ގައި ބޭއްވި މަޝްވަރާ ތަކަށް ފަހުގައެވެ.

ޚާރިޖީ ވަޒީރު ޑިމިތްރޯ ކުލެބާ އަކީ 2022 ވަނަ އަހަރު ރަޝިއާ އިން ޔޫކްރެއިން އާ ދެކޮޅަށް ހަނގުރާމަ ފެށި ފަހުން ޗައިނާ އަށް ޒިޔާރަތް ކުރެއްވި ޔޫކްރެއިންގެ އެންމެ އިސް އޮފިޝަލް އެވެ.

މި ދަތުރުފުޅުގައި ޔޫކްރެއިންގެ ޚާރިޖީ ވަޒީރު ޗައިނާގެ ޚާރިޖީ ވަޒީރު އާ އެކު ތިން ގަޑީ އިރުގެ މަޝްވަރާ ކުރިއަށް ގެންދެވި ކަމަށް ޔޫކްރެއިންގެ ވަފްދުގެ އޮފިޝަލަކު ރޮއިޓާސް އަށް މައުލޫމާތު ދެމުން ބުނެފައިވެއެވެ.

ޔޫކްރެއިންގެ ޚާރިޖިއްޔާ އިން ނެރުނު ބަޔާނުގައި ރަޝިއާ އާ އެކު ވާހަކަ ދައްކަން ޔޫކްރެއިން އިން ތައްޔާރަށް އޮތް ކަމަށް ބުނި ނަމަވެސް ރަޝިއާގެ ފުށުން އެކަމަށް ތައްޔާރަށް އޮތް ކަމުގެ ނިޝާނެއް އަދި ނުފެންނަ ކަމަށްވެސް ބުނެފައިވެއެވެ.

29 މަސް ދުވަސް ހޭދަވެފައިވާ ރަޝިއާ ޔޫކްރެއިން ހަނގުރާމައިގައި ޔޫކްރެއިން ގެ އިރުމަތީ ސަރަހައްދުގައި ރަޝިއާ އިން މަޑުމަޑުން ކުރި ހޯދަމުން ދާއިރު، ޔޫކްރެއިން އަށް ހަނގުރާމައިގައި އެންމެ ބޮޑު އެހީތެރި ކަމެއް ވެދޭ އެމެރިކާގެ ރައީސް ބައިޑްން ރިޔާސީ އިންތިޚާބުން ވަކިވެ ވަޑައިގެންފައި ވުމާއި، އަނެއްކޮޅުން ޑޮނަލްޑް ޓްރަމްޕް އަލުން އެމެރިކާގެ ރައީސް ކަމަށް ވަޑައިގެންފި ނަމަ ޔޫކްރެއިނަށް އެމެރިކާ އިން ލިބެމުންދާ އެހީތެރިކަމަށް ނިމުމެއް އަންނާނެ ކަމަށް މިހާރުވެސް ވަނީ ބެލެވިފައެވެ. ޓްރަމްޕް ވިދާޅުވެފައިވަނީ އޭނާ އަށް އިންތިޚާބު ކާމިޔާބު ކުރެއްވިއްޖެ ނަމަ ޔޫކްރެއިންނަށް ދެމުންދާ އަސްކަރީ އެހީ ހުއްޓާލައްވާނެ ކަމުގައެވެ.

ދުނިޔޭގެ ދެވަނަ އަށް އެންމެ ބޮޑު އިގްތިސާދުގެ ގޮތުގައި އޮތް ޗައިނާ އިން މިހާތަނަށް ދުނިޔޭގެ ކުރިމަތީގައި ދައްކަމުން އައިސްފައިވަނީ ޗައިނާ އަކީ ހަނގުރާމައިގައި ވަކި އަތަކަށް ނުޖެހޭ ގައުމެއްގެ ގޮތުގައެވެ. އެހެން ނަމަވެސް ރަޝިއާ އަށް މި ހަނގުރާމައިގައި މަދަދު ވެރިވެ ދޭ ކަމަށް ހުޅަނގުގެ ގައުމުތަކުން ޗައިނާ އަށް ތުހުމަތު ކުރަމުން ދާއިރު، އެކަމާ ޗައިނާ އިން އިންކާރު ކުރި ނަމަވެސް ރަޝިއާ އާއެކު އޮންނަނީ "ވަކި ހައްދެއް ނެތް" ގުޅުމެއް ކަމަށް ޗައިނާ އިން ވަނީ 2022 ގެ ހަނގުރާމަ ފެށުމުގެ ކުޑަ ދުވަސް ކޮޅެއް ކުރިން ބުނެފައެވެ. އޭގެ އިތުރުން ހުސްވި މެއި މަހު ޗައިނާ އަށް ވަނީ ރަޝިއާގެ ރައީސް ވުލެޑިމިއަރ ޕުޓިން ދަތުރުފުޅެއް ވެސް ކުރައްވާފައެވެ.

ޗައިނާގެ ޚާރިޖިއްޔާގެ ތަރުޖަމާނު މާއޯ ނިންގ ނޫސް ކޮންފަރެންސް އެއްގައި ރަޝިއާ އިންނާ ޔޫކްރެއިނުންވެސް މަޝްވަރާ ކުރުމުގެ ސިގްނަލް އެކި މިންވަރަށް ޗައިނާ އަށް ދީފައިވާ ކަމަށް ބުނެފައިވެއެވެ.

އެހެން ނަމަވެސް އަދި އެކަމަށް ހާލަތު މުޅިން ފައްކާވެފައިވާ ކަމަށް ނުދެކޭ ކަމަށާއި، ޗައިނާ އިން މަސައްކަތް ކުރާނީ ހަނގުރާމަ ނިމުމަކަށް ގެނައުމަށް ސުލްހައިގެ ވާހަކަ ތައް ބޭއްވޭނެ ގޮތަކަށް މަގު ފަހި ކުރުމަށް ކަމަށްވެސް ތަރުޖަމާނު ބުނެފައިވެއެވެ.