އޮލިމްޕިކްސް ގައި ވާދަކުރާ ފްރާންސް ޓީމް ކެޕްޓަނަކަށް އަލެކްސަންޑަރ ލަކަޒޭޓް ހަމަޖައްސައިފި އެވެ.
މިމަހު ފްރާންސްގެ ޕެރިހުގައި ފަށާ އޮލިމްޕިކްސްގައި ވާދަކުރާ ފްރާންސް ޓީމްގެ ކެޕްޓަކަނަކަށް ހަމަޖެއްސި ލަކަޒޭޓް އަކީ ސީނިއަރ ޓީމްގައި ހިމެނޭ ކުޅުންތެރިއެއް ނޫނެވެ. 33 އަހަރުގެ ކުޅުންތެރިޔާ އަށް އޮލިމްޕިކްސް ޓީމުން ޖާގަ ދިނީ އުމުރުން ދޮށީ ތިން ކުޅުންތެރިން ހިމަނަން ލިބޭ ފުރުޞަތުގެ ދަށުންނެވެ. 33 އަހަރުގެ ފޯވާޑް ބުނީ އޭނާއަށް ކެޕްޓަނެއްގެ ޒިންމާ ހަވާލުކުރުމަކީ ފަޚުރެއް އަދި އުފަލެއް ކަމަށެވެ. އެޒިންމާއާއެކު ރަން މެޑަލް ހޯދަން އުއްމީދު ކުރާ ކަމަށް ކުރިން އާސެނަލްގެ ކެޕްޓަންކަން ކުރި ލަކަޒޭޓް ބުންޏެވެ.
އޮލިމްޕިކްގައި ވާދަކުރާ ފްރާންސް ޓީމްގެ ކޯޗަކީ ކުރީގެ އެއްވަނަ ފޯވާޑް ފްރާންސްގެ ތިއެރީ އޮންރީ އެވެ. ލަކަޒޭޓް ބުނީ އޮންރީ އަކީ އޭނާގެ އައިޑޮލް ކަމަށާއި, އޮންރީ ކެޕްޓަން ބޭންޑް ދިނުމަމީ ވަކިން ބޮޑު އުފަލެއް ކަމަށެވެ. އަދި އޮންރީ އެޓޭކިންގ ފުޓްބޯޅައެއް ކުޅުވާތީ އެހިތްހަމަ ޖެހުންވެސް ފާޅުކުރިއެވެ. ލަކަޒޭޓް އެންމެ ފަހުން ފްރާންސް ގައުމީ ޓީމަށް ކުޅުނީ 2017 ވަނަ އަހަރު އެވެ.
ފްރާންސް އޮތީ ގްރޫޕް ސީގައެވެ. ފުރަތަމަ މެޗުގައި ވާދަކުރާނީ އެމެރިކާއާއެވެ. ބުދަ ދުވަހު އެމެޗު ކުޅޭނީ ރަސްމީކޮށް ގޭމްސް ފެށުމުގެ ދެ ދުވަސް ކުރިންނެވެ.
