ދެ މެޗުން ވެސް ބަލިވެ، ރާއްޖޭގެ އުއްމީދު ގެއްލިއްޖެ

ކުޅުނު ދެ މެޗުން ވެސް ބަލިވެ ކާވާ 20 އަހަރުން ދަށުގެ އަންހެން ވޮލީބޯޅަ މުބާރާތުގައި ރާއްޖޭގެ ދުވެލި ހުއްޓުމަކަށް އަތުވެއްޖެ އެވެ.

ރާއްޖޭގެ ފުރަތަމަ މެޗުގައި ބުރާސްފަތި ދުވަހުގެ ރޭ ޒުވާނުންގެ މަރުކަޒުގެ އިންޑޯ ހޯލުގައި މުބާރާތް ހުޅުވަން ނުކުމެ، ކިރިގިސްތާން އަތުން ބަލިވީ ސީދާ ތިން ސެޓުންނެވެ. ފުރަތަަމަ ސެޓާއި ދެ ވަނަ ސެޓުން ވެސް ރާއްޖެ ބަލިވީ 25-11 އިންނެވެ. ފަހު ސެޓު ކިރިގިސްތާނުން ހޯދި ރާއްޖެއަށް 17 ޕޮއިންޓް ދީފަ އެވެ.

ކިރިގިސްތާނާއި ލަންކާ އާއި ނޭޕާލް ބުރާސްފަތި ދުވަހުން ފެށިގެން އަންނަ އަންގާރަ ދުވަހުގެ ނިޔަލަށް ކުޅޭ މުބާރާތުގައި ރާއްޖޭގެ ދެ ވަނަ މެޗު ކުޅުނީ ހުކުރު ދުވަހު ހަވީރު އެވެ. މުބާރާތުގެ އެންމެ ގަދަ ކަމަށް ބެލެވޭ ޓީމު ކަަމަށްވާ ލަންކާ އަތުން ވެސް ރާއްޖެ ބަލިވީ ސީދާ ތިން ސެޓުންނެވެ. ރާއްޖެ އަށް ފުރަތަމަ ސެޓް ގެއްލުނީ 25-8 އިންނެވެ. ދެ ވަނަ ސެޓް 25-9 އިން ގެއްލުނުއިރު ފަހު ސެޓް ލަންކާ ކާމިޔާބުކޮށް މެޗު ނިންމާލީ 25-16އިންނެވެ.

މި މުބާރާތުގައި ރާއްޖެ ކުޅޭ ފަހު މެޗުގައި ހޮނިހިރު ދުވަހު ހަވީރު ކުޅޭނީ ނޭޕާލްއާ އެވެ.

ވޮލީބޯޅަ އެސޯސިއޭޝަނުން ބުނީ މި މުބާރާތަކީ ކާވާއާ ގުޅިގެން ރާއްޖޭގެ ވޮލީގެ ފެންވަރު މަތި ކުރުމުގެ ބޭނުމުގައި ކުޅޭ މުބާރާތެއް ކަމަށެވެ. މި ގޮތުން އަމާޒަކީ 2027 ވަނަ އަހަރުގެ އިންޑިއަން އޯޝަން އައިލެންޑް ގޭމްސްގެ އަންހެން އަދި ފުރިހެން ކެޓަގަރީގައި ވެސް ފައިނަލް ކުޅުން ކަމަށެވެ.