ދުނިޔޭގެ އެތައް ގައުމަކަށް އައިޓީ ޚިދުމަތް ކެނޑި، އެއަރލައިން ތަކުގެ ދަތުރު ތަކަށާއި، ބޭންކުގެ ޚިދުމަތްތަކަށް ބުރޫ އަރައިފި، ވެލާނާ އެއަރޕޯޓުގެ ޚިދުމަތްތައް ލަސްވާނެ ކަމަށް ބުނޭ

ދުނިޔޭގެ އެތައް ގައުމަކަށް އައިޓީގެ ޚިދުމަތް ކެނޑި، އެއަރލައިން ތަކުގެ ދަތުރު ތަކަށާއި، ބޭންކުގެ ޚިދުމަތްކަށާއި ވިޔަފާރިތަކަށް ބުރޫ އަރައިފިއެވެ.

ދުނިޔެއަށް މިހާތަނަށް ކުރިމަތިވި އައިޓީ ޚިދުމަތް ކެނޑުމުގެ އެންމެ ބޮޑު ހާދިސާގައި ރާއްޖޭގެ ވެލާނާ އިންޓަރނޭޝަނަލް އެއަރޕޯޓުގެ ފަސިންޖަރުންގެ ޚިދުމަތްތަކަށް ބުރޫ އަރާފައިވާ ކަމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ހުކުރު ދުވަހު ވަނީ ބުނެފައެވެ.

"އައިޓީ ސިސްޓަމްތަކަށް މުޅި ދުނިޔޭގައި މި ވަގުތު ވަނީ މައްސަލަތަކެއް ކުރިމަތިވެފައި. ޗެކިން ކުރުމުގައި މި ވަގުތު ފަސިންޖަރުންނަށް ލަސްވުން އެކަށީގެންވޭ،" އެމްއޭސީއެލް އިން އެކްސްގައި ކުރި ޕޯސްޓެއްގައި ބުނެފައިވެއެވެ.

އެމެރިކާގެ ފެޑެރަލް އޭވިއޭޝަން އެޑްމިނިސްޓްރޭޝަން އިން ބުނެފައިވާ ގޮތުގައި އެ ގައުމުގެ ބޮޑެތި އެއަރލައިންތައް ކަމަށްވާ ޑެލްޓާ، ޔުނައިޓެޑް އެއަރލައިން އަދި އެމެރިކަން އެއަރލައިންގެ ދަތުރުތައް ހުކުރު ދުވަހު ހެނދުނު ވަނީ ހުއްޓާލާފައެވެ. ސަބަބެއް ކަމަށް ބުނެފައިވަނީ ކޮމިއުނިކޭޝަން މައްސަލައަކާ ގުޅިގެން ކަމުގައެވެ.

އޮސްޓްރޭލިއާގެ އެއަރޕޯޓްތަކުގައި ހުރި ފްލައިޓް މައުލޫމާތު ދޭ ސްކްރީންތަކުން މައުލޫމާތު ފުހެވި، ބޮޑެތި ސުޕަރމާކެޓް ތަކުގައި ހުންނަ ސެލްފް ސާވިސް ކައުންޓަރުތަކަށް އެރަރ މެސެޖް އަރާފައިވާކަމަށް ޚަބަރުތައް ބުނެއެވެ.

ސިޑްނީ އެއަރޕޯޓްގައި ފްލައިޓްތައް އޮޕަރޭޓް ކުރި ނަމަވެސް ބުނެފައިވަނީ ޚިދުމަތް ލަސްވާނެ ކަމަށް ފަސިންޖަރުން ސަމާލުވުމަށެވެ.

މެލްބަން އެއަރޕޯޓްގައި ބައެއް އެއަރލައިންތަކުގެ ޗެކްއިން ޚިދުމަތައް ބުރޫ އަރާފައިވާ ކަމަށް އެ އެއަރޕޯޓުން ބުނެފައިވެއެވެ.

އިނގިރޭސި ވިލާތާއި މެލޭޝިއާ، އިންޑިއާ އާއި ޔޫއޭއީގެ އެއަރޕޯޓުތަކުން ވެސް ބުނެފައިވަނީ ޚިދުމަތައް ބުރޫ އަރާފައިވާ ކަމަށެވެ.

ދުނިޔޭގެ އެންމެ ބިޒީ އެއަރޕޯޓް ކަމަށް ވާ ސިންގަޕޫރުގެ ޗާންގީ އެއަރޕޯޓްގައި ވެސް ޗެކިން ޚިދުމަތް ދެނީ މެނުއަލް ކޮށް ކަމުގައި އެ އެއަރޕޯޓުން ބުނެފައިވެއެވެ.

އޮސްޓްރޭލިއާގެ ގައުމީ ބްރޮޑްކާސްޓަރ، ދި އޮސްޓްރޭލިއަން ބްރޮޑްކާސްޓިން ކޯޕަރޭޝަން އާއި ނެޓްވޯކް ޓެން އިން އެތަންތާނގެ މަސައްކަތްތަކަށް ބުރޫ އަރާފައިވާ ކަމަށް ބުނެފައިވެއެވެ.

ބެންޑިގޯ ބޭންކުން ބުނެފައިވާ ގޮތުގައި އެ ބޭންކުން ބުނެފައިވާ ގޮތުގައި އެ ބޭންކުގެ އޮންލައިން ޚިދުމަތްތައް ވަނީ ހުއްޓިފައެވެ.

މައްސަލަ ދިމާވީ ކީއްވެގެން ކަމެއް އަދި ސާފުކޮށް ބުނަން ނޭނގޭ ކަމަށް މީޑިއާ ރިޕޯޓްތައް ބުނެއެވެ. އެހެން ނަމަވެސް ގައުމުތަކަށް މައްސަލަ ތަޖުރިބާ ކުރަން ފެށުނީ މައިކްރޮސޮފްޓް އިން މައިކްރޮސޮފްޓް 365 އެޕަށް ވަނުމުގައި މައްސަލަތަކެއް އުޅޭ ކަން ހާމަކުރުމާ އެކުއެކީގައިކަން ފާހަގަ ކުރެވެއެވެ.