ކީރިތި ޤުރުއާން ރީތިކޮށް ކިޔަވާ, ކީރިތި ޤުރުއާނުގެ މައްޗަށް ތަރުބިއްޔަތުވާ ޖީލެއް ބިނާކުރަން ޖެހޭ ކަމަށް އިސްލާމީކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
އެމަނިކުފާނު އެފަދައިން ވިދާޅުވީ ކީރިތި ޤުރްއާން ކިޔެވުމުގެ 36 ވަނަ ޤައުމީ މުބާރާތުގެ ނަތީޖާ ފާޅުކުރުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.
ކީރިތި ޤުރުއާނުން އެތައް ރިވެތި ސިފަތަކަކާއި ރިވެތި އަޚުލާގުތަކެއް އެނގިގެންދާ ކަމަށް އޭނާ ވިދާޅުވިއެވެ. އެގޮތުން އިޙްސާންތެރިވުމަށާއި އުޚޫވަތްތެރިކަން ދެމެހެއްޓުމަށް މަސައްކަތް ކުރަން ޖެހޭކަން ޤުރުއާނުން އެނގޭ ކަމަށް ޝަހީމް ވިދާޅުވިއެވެ. ހަމައެހެންމެ ޤީބަ ނުބުނުމާއި، ފުރައްސާރަނުކުރުމާއި އެކަކު އަނެކަކަށް އަޅާލުމަށް ވެސް ޤުރުއާނުގައި ބާރު އަޅުވާފައިވާކަމަށް އެ މަނިކުފާނު ވިދާޅުވިއެވެ.
ފަހަކަށް އައިސް ޤުރުއާން ދަސްކުރާ ހާފިޒުންގެ އަދަދު އިތުރުވަމުންދާ ކަމަށް އެ މަނިކުފާނު ވިދާޅުވިއެވެ. އެހެންކަމުން ކީރިތި ޤުރުއާން ދަސްކުރާ ހާފިޒުންގެ ޖަލްސާ ކުރިއަށް އޮތްތަނުގައި ބާއްވާނީ ވަކި ހަރަކާތެއްގެ ގޮތުގައި ކަމަށް ޝަހީމް ވިދާޅުވިއެވެ. އެކަން އެގޮތަށް ކުރަން ނިންމީ ގުރުއާން ހިތުދަސްކުރާ މީހުންނަށް އެކަމުގެ ހައްގު މަޤާމް ދިނުން ކަމަށް ވެސް އެމަނިކުފާނު ވިދާޅުވިއެވެ.
ކީރިތި ޤުރްއާން ކިޔެވުމުގެ ޤައުމީ މުބާރާތް ބާއްވާތާ 36 އަހަރު ވެގެންދިޔައިރު އެ މުބާރާތަކީ ކާމިޔާބު މުބާރާތެއް ކަމަށް ޝަހީމް ވަނީ ވިދާޅުވެފައެވެ. އަދި މި މުބާރާތަކީ އޭގެ ޒާތުގައި މަދަރުސާއެއްކަމަށް އެމަނިކުފާނު ވިދާޅުވިއެވެ.
