އާޖެންޓީނާގެ ކެޕްޓަން ލިއޮނަލް މެސީ އަށް ކާމިޔާބު ހޯދައި ދެވުމަކީ، އޭނާ އަށް ލިބޭ ވަރަށް ޚާއްސަ އުފަލެއް ކަމަށް އެންހެލް ޑި މާރިއާ ބުނެފި އެވެ.
ޑި މާރިއާ މިހެން ބުނީ ދެކުނު އެމެރިކާ ސަރަހައްދުގެ ފުޓުބޯޅަ މުބާރާތް (ކޮޕާ އެމެރިކާ)ގެ ފައިނަލްގައި އާޖެންޓީނާ އިން ކޮލަމްބިއާއާ ދެކޮޅަށް ކުޅުނު މެޗަށްފަހު ވާހަކަ ދައްކަމުންނެވެ. އެ މެޗުގައި އާޖެންޓީނާ އިން ވަނީ ކޮލަމްބިއާ ބަލިކޮށް، މުބާރާތުގެ ތަށި 16 ވަނަ ފަހަރަށް އުފުލާލައިފަ އެވެ.
އެ މެޗުގެ ފުރަތަމަ 11 ގައި ހިމެނިގެން އާޖެންޓީނާގެ ކެޕްޓަން މެސީ އާއި ޑި މާރިއާ ވެސް ވަނީ ކުޅެފަ އެވެ. ނަމަވެސް ދެ ވަނަ ހާފުގެ ވަކި ހިސާބަކުން މެސީގެ ފަޔަށް ލިބުނު އަނިޔާއެއްގެ ސަބަބުން، އޭނާ ވަނީ ބަދަލުކޮށްފަ އެވެ. ބަދަލު ކުރަން ޖެހުމާއެކު މެސީގެ މޫނު މަތިން ވަނީ ވަރަށް ބޮޑަށް ހިތާމަވެރިކަން ފެނިފަ އެވެ. އެ މެޗުގެ 90 މިނެޓުގެ ކުޅުން ހަމަވެ އިތުރަށް ކުޅުނު ދެ ހާފުގެ ތެރެއިން ފަހު ހާާފުގައި ޑި މާރިއާ ވެސް ވަނީ ބަދަލުކޮށްފަ އެވެ.
އެ މެޗަށްފަހު ވާހަކަ ދައްކަމުން ޑި މާރިއާ ބުނީ، މެޗުގައި މެސީ ބަދަލު ކުރަން ޖެހުނު މަންޒަރު ފެނުނު ކަމަށާއި، އެ ވަގުތު މެސީ އަށް ކުރެވުނު އިޙުސާސް ވެސް ފެނުނު ކަމަށެވެ. މެސީ ފައިބަން ޖެހުނު ގޮތަށް އިޝާރާތްކޮށް ޑި މާރިއާ ބުނީ، އެއީ އޭނާ އަށް އުފަލެއް ނުވަތަ ހަމަޖެހުމެއް ވެސް ލިބޭނެ ފަދަ ޙާލަތަކަށް ނުވި ކަމަށެވެ.
އެހެންވެ އޭނާ ވެސް އަދި އާޖެންޓީނާގެ ކުޅުންތެރިން ވެސް ބޭނުންވީ، އެންމެން އެކުގައި މަސައްކަތްކޮށް ކާމިޔާބު ހޯދަން ކަމަށާއި، ހުރިހާ ކުޅުންތެރިން ކުރި މަސައްކަތުން އެ ކާމިޔާބީ ޙާސިލުވުމުން ވަރަށް އުފާވާ ކަމަށެވެ. އަދި ވަކިން ޚާއްސަކޮށް، ކެޕްޓަން މެސީ އަށް ޙައްޤުވާ ކާމިޔާބު ހޯދައި ދެވުމަކީ އާޖެންޓީނާގެ ކުޅުންތެރިން އަދި ވަކިން ޚާއްސަކޮށް އޭނާ އަށް ލިބޭ ޚާއްސަ އުފަލެއް ކަމަށް ވެސް ޑި މާރިއާ ބުންޏެވެ.
ޑި މާރިއާ އާއި މެސީ އަކީ ޤައުމީ ޓީމުގައި ވަރަށް ގާތް ގުޅުމެއް އޮންނަ ދެ ކުޅުންތެރިންނެވެ. ޤައުމީ ޓީމުން ރިޓަޔާ ކުރަން ޑި މާރިއާ ނިންމާފައިވާއިރު، ޑި މާރިއާ ވަނީ އާޖެންޓީނާގެ ސީނިއާ ޓީމާއެކު ހަތަރު ތައްޓެއް ކާމިޔާބު ކޮށްފަ އެވެ. އޭގެ އިތުރުން އާޖެންޓީނާގެ ޒުވާން އުމުރުފުރާގެ ޓީމާއެކު 2007 ވަނަ އަހަރު އޮތް 20 އަހަރުން ދަށުގެ ފީފާ ވޯލްޑް ކަޕް އަދި 2008 ވަނަ އަހަރުގެ އޮލިމްޕިލްސްގެ ރަން މެޑަލް ކާމިޔާބު ކޮށްފަ އެވެ.
