ގާޒާގެ ހަމަ އެކަނި ކެންސަރު ހޮސްޕިޓަލް ޔަހޫދީ ސިފައިން ހާލާކު ކޮށްލައިފިއެވެ.
މި ހޮސްޕިޓަލް ހަލާކު ކޮށްލީ އެތައް މަހެއް ވަންދެން އެތަން އަސްކަރީ މަރުކަޒެއްގެ ގޮތުގައި ޔަހޫދީ ސިފައިން ބޭނުން ވެސް ކުރުމަށް ފަހުގައެވެ.
ތުރުކީ ވިލާތުން ވަނީ އިޒްރޭލުން ގާޒާގައި ހަމައެކަނި ކެންސަރު ހޮސްޕިޓަލް ހަލާކު ކޮށްލުމުން އެކަން ކުށްވެރި ކޮށްފައެވެ.
އަނެއްކޮޅުން ފަލަސްތީނުގެ ރެޑް ކްރެސެންޓް އާ ހަވާލާދީ އަލްޖަޒީރާ އިން ބުނެފައިވާ ގޮތުގައި ގާޒާގެ މެދުތެރޭގައި ހުންނަ ނުސީރަތު ރެފިއުޖީ ކޭމްޕަށް ޔަހޫދީ ސިފައިން ވަނީ ހަމަލާ ދީފައެވެ. މި ހަމަލާގައި ފަލަސްތީނުގެ 6 މީހުން މަރުވެފައިވާ ކަމަށް ރެޑް ކްރެސެންޓުން ބުނެފައިވެއެވެ.
ގާޒާ ގައި ޔަހޫދީ ސިފައިން ހިންގަމުންދާ ލާ އިންސާނީ ހަނގުރާމައިގެ ސަބަބުން އިޒްރޭލުގެ އަސްކަރިއްޔާ އަށް ޓޭންކާއި، ގޮވާތަކެއްޗާއި، ހަތިޔާރުގެ ދަތިކަން ކުރިމަތިވެފައިވާ ކަމަށް އިޒްރޭލުގެ ސްޕްރީމް ކޯޓަށް އަސްކަރިއްޔާ އިން ހުށަހެޅި ލިޔުންތަކަކުން ހާމަވެއްޖެ ކަމަށްވެސް އަލްޖަޒީރާ އިން ބުނެފައިވެއެވެ.
ހުސްވި އަހަރުގެ އޮކްޓޯބަރު މަހުގެ 7 ވަނަ ދުވަހުން ފެށިގެން ޔަހޫދީ ސިފައިން ގާޒާގައި ހިންގަމުންދާ ލާ އިންސާނީ ހަނގުރާމައިގެ ސަބަބުން ފަލަސްތީނުން މިހާތަނަށް 38،664 މީހުން ވަނީ މަރުވެފައެވެ. އިޒްރޭލުގެ ހަމަލާތަކުން ފަލަސްތީނުން ޒަޚަމްވީ މީހުންގެ އަދަދު 89،097ށް ވުރެ މައްޗަށް ގޮސްފައިވެއެވެ.
