ފެނަކައިން މަހަކު ހަތަރު ލައްކަ ރުފިޔާއަށް "އޮޑިމެރިން" ނަމަކަށް ކިޔާ ކުންފުންޏަކުން ދޯންޏެއް ކުއްޔަށް ނަގައިފި
15 ޖުލައި 2024 | ހޯމަ 07:20ދޯނި ކުއްޔަށް ނަގާފައިވަނީ އެއް އަހަރު ދުވަހުގެ މުއްދަތަކަށް
ފެނަކަ އޮފީހެއް
ފެނަކައިން މަހަކު ހަތަރު ލައްކަ ރުފިޔާ ދައްކާ ގޮތަށް ދޯންޏެއް ކުއްޔަށް ނަގައިފިއެވެ.
އެކަމާ ގުޅޭގޮތުން ނޫސްތަކަށް މައުލޫމާތު ދެއްވަމުން އެ ކުންފުނީގެ އެމްޑީ މުއާޒް މުހައްމަދު ރަޝީދު ވިދާޅުވީ، ދޯނި ކުއްޔަށް ނަގާފައިވަނީ އޮޑިމެރިން ނަމަކަށް ކިޔާ ކުންފުންޏަކުން ކަމަށާއި، ދޯނި ކުއްޔަށް ނެގުމުގެ މަސައްކަތުގައި އެއްވެސް ކަހަލަ ނުފޫޒެއް ހިމެނިފައިނުވާނެ ކަމަށެވެ.
އެކަން ކޮށްފައިވަނީ ޕްރޮކިއުމަންޓުގެ އުސޫލުގެ ދަށުން އެންމެ ޤާބިލު ކުންފުންޏެއް ބަލައިގެން ކަމަށްވެސް މުއާޒު ވިދާޅުވިއެވެ. ފަހަރަކު ދަތުރަކަށް ދޯނިތައް ކުއްޔަށް ނެގުމުގެ ބަދަލުގައި ވަކިން ކުންފުންޏަށް ދޯންޏެއް ކުއްޔަށް ނެގުމުން މާ ޚަރަދު ކުޑަކަމަށްވެސް މުއާޒު ވިދާޅުވެފައިވެއެވެ.
ދޯނި ކުއްޔަށް ނަގާފައިވަނީ އެއް އަހަރު ދުވަހުގެ މުއްދަތަކަށެވެ.
އިކޮނޮމިކް މިނިސްޓްރީގެ ބިޒްނަސް ޕޯޓަލްއިން ދައްކާ ގޮތުގައި އެ ކުންފުންޏަކީ ރާއްޖޭގައި ފުޅާ ދާއިރާއެއްގައި ގޭންގް އޮޕަރޭޓް ކުރާ ކަމުގެ ތުހުމަތު ކުރެވޭ ބަޔަކު ހިންގާ ކުންފުންޏެކެވެ. އެގޮތުން އެ ކުންފުނީގެ އިސްވެރިންގެ މައްޗަށް ދައުވާ ކޮށްފައިވާ ޖިނާއީ ބޮޑެތި މައްސަލަތައް މިހާރުވެސް ކްރިމިނަލް ކޯޓަށް ހުށަހެޅި ޝަރީއަތްތައް ކުރިއަށް ދެއެވެ.
ފެނަކައިން މަހަކު ހަތަރު ލައްކަ ރުފިޔާ ދައްކާ ގޮތަށް ދޯންޏެއް ކުއްޔަށް ނަގާފައި މިވަނީ ޤައުމުގެ އިޤްތިސާދީ ޙާލަތު ދަށަށް ގޮސްފައިވާކަމަށް ސަރުކާރުން ބުނަމުންދާ ދަނޑިވަޅެއްގައެވެ.
