ޖަރުމަނުގައި ހުރި އެމެރިކާގެ މިސައިލް ބޭނުން ކުރަން ފަށައިފި ނަމަ ހުޅަނގުގެ ކެޕިޓަލް ސިޓީތައް ރަޝިއާ ގެ ޓާގެޓަކަށް ވެދާނެ: ރަޝިއާ
ރަޝިއާ ސަރުކާރުގެ ތަރުޖަމާނު ޑިމިޓްރީ ޕެސްކޯވް ބުނި ގޮތުގައި، ޖަރުމަނުގައި ހުރި އެމެރިކާގެ މިސައިލް ރަޝިއާ އާ ދެކޮޅަށް ބޭނުން ކުރާ ނަމަ، އެ ހަމަލާތައް ހުއްޓުވުމުގެ ގާބިލްކަން ރަޝިއާގައި ހުރި ކަމަށެވެ.
ރަޝިއާ ސަރުކާރުގެ ތަރުޖަމާނު ޑިމިޓްރީ ޕެސްކޯވް
ޖަރުމަނުގައި ހުރި އެމެރިކާގެ މިސައިލް ބޭނުން ކުރަން ފަށައިފި ނަމަ ހުޅަނގުގެ ކެޕިޓަލް ސިޓީތައް ރަޝިއާ ގެ ޓާގެޓަކަށް ވެދާނެ ކަމަށް ރަޝިއާ ސަރުކާރުގެ ތަރުޖަމާނު ޑިމިޓްރީ ޕެސްކޯވް ހާމަކޮށްފިއެވެ.
ރަޝިއާގެ ދައުލަތުގެ ޓީވީ ޗެނެލެއް ކަމަށްވާ ޗެނެލް ވަން ގައި ހޮނިހިރު ދުވަހު ވާހަކާ ދައްކަމުން ޕެސްކޯވް ބުނި ގޮތުގައި ޖަރުމަނުގައި ހުރި އެމެރިކާގެ މިސައިލް ރަޝިއާ އާ ދެކޮޅަށް ބޭނުން ކުރާ ނަމަ، އެ ހަމަލާތައް ހުއްޓުވުމުގެ ގާބިލްކަން ރަޝިއާގައި ހުރި ކަމަށެވެ. އޭނާ ބުނީ އެހެން އެކަން ވާއިރު، ހަގީގީ ގެއްލުންވާނީ، ހުޅަނގުގެ ގައުމުތަކުގެ ވެރިކަން ކުރާ ސިޓީތަކުގައި ދިރިއުޅޭ އާންމު ރައްޔިތުންނަށް ކަމުގައެވެ.
ޕެސްކޯވް ބުނި ގޮތުގައި ހުޅަނގުގައި ހުރި އެމެރިކާގެ މިސައިލްތަކުގެ ޓާގެޓަކަށް ރަޝިއާ ވެގެން ދާއިރު ރަޝިއާގެ މިސައިލްތަކުގެ ޓާގެޓަކަށް ހުޅަނގުގެ ގައުމުތައް ވެގެންދާނެ ކަމަށެވެ.
އެމެރިކާގައި ނިމިގެން ދިޔަ ނޭޓޯ ސަމިޓުގެ ތެރޭގައި ވައިޓް ހައުސް އިން މި ދިޔަ ބުދަ ދުވަހު ބުނީ ރައްކައުތެރި ކަމުގެ ފިޔަވަޅެއްގެ ގޮތުން ދިގު ރާސްތާގެ ޓޮމޮހޮކް މިސައިލް 2026 ން ފެށިގެން ޖަރުމަނު ވިލާތުގައި ގާއިމް ކުރަމުންދާނެ ކަމަށެވެ.
ކްރެމްލިން އިން ވަނީ އެމެރިކާގެ މި ނިންމުމަށް ފާޑު ކިޔާފައެވެ. ކްރެމްލިން އިން ދެކޭ ގޮތުގައި މިއީ ފިނި ހަނގުރާމައަކާ ގާތައް އެޅޭ ފިޔަވަޅެކެވެ. އަދި އެއީ އެމެރިކާ އިން ޔޫކްރެއިން ހަނގުރާމައިގައި ސީދާ ބައިވެރިވުން ކަމުގައިވެސް ކްރެމްލިން އިން ދެކެއެވެ.
ރަޝިއާގެ ދިފާއީ ވުޒާރާ އިން ހުކުރު ދުވަހު ބުނެފައިވާ ގޮތުގައި ރަޝިއާގެ ދިފާއީ ވަޒީރު އެންޑްރޭ ބެލޫސޮވް ވަނީ އެމެރިކާގެ ދިފާއީ ވަޒީރު ލޮއިޑް އޮސްޓިން އާ ފޯނުން ގުޅުއްވާ މަސްރަހް އިތުރަށް ހޫނުވެގެން ދިޔަ ނުދިނުމަށް މަޝްވަރާ ކުރައްވާފައެވެ.
ރަޝިއާ އިން ޔޫކްރެއިން އަށް 2022 ގައި އެރުމާއެކު، އެމެރިކާގެ އިސްނެގުމަށް ހުޅަނގުގެ ގައުމުތަކުގެ އަސްކަރީ ގާބިލްކަން އިތުރު ކުރުމަށް ގެންދަނީ ފިޔަވަޅު ތައް އަޅަމުންނެވެ.
