ރައްކައުތެރި ސަރަހައްދެއް ކަމަށް ކަނޑައަޅާފައިވާ އަލް-މަވާސީ ރެފިއުޖީ ކޭމްޕަށް ޔަހޫދީ ސިފައިން ބޮން އަޅާ މަދުވެގެން 71 މަރު
ހަމަލާގައި 300ށް ވުރެ ގިނަ މީހުން ވަނީ ޒަޚަމްވެފައެވެ.
ޔަހޫދީ ސިފައިން ޚާން ޔޫނިސްގެ ހުޅަނގުން އޮންނަ އަލް-މަވާސީ ރެފިއުޖީ ކޭމްޕަށް ދިން ހަމަލާގެ މަންޒަރެއް
ޔަހޫދީ ސިފައިން ޚާން ޔޫނިސްގެ ހުޅަނގުން އޮންނަ އަލް-މަވާސީ ރެފިއުޖީ ކޭމްޕަށް ބޮން އަޅާ މަދުވެގެން ފަލަސްތީނުގެ 71 މީހުން މަރާލައިފިއެވެ.
ގާޒާގެ ސިވިލް ޑިފެންސް އާ ހަވާލާދީ އަލް ޖަޒީރާ އިން ބުނެފައިވަނީ މި ރެފިއުޖީ ކޭމްޕަކީ ޔަހޫދީ ސިފައިން ސޭފް ޒޯން ނުވަތަ ރައްކައުތެރި ސަރަހައްދެއްގެ ގޮތުގައި ކަނޑައަޅާފައިވާ ޒޯން އެއް ކަމަށެވެ.
ހޮނިހިރު ދުވަހު ހެނދުނު އިޒްރޭލުގެ ހަނގުރާމަމަތީ މަތިންދާ ބޯޓުތަކުން ދިން މި ހަމާލާގައި މަރުވެފައިވާ މީހުންގެ ހަށިތައް ނެގުމާއި، ޒަޚަމްވީ މީހުން ހޮސްޕިޓަލަށް ގެންދިއުމާއި، އިތުރު މީހުން ފެނޭތޯ ބެލުމުގެ މަސައްކަތް ސިއްހީ އޮފިޝަލުންނާއި، ރެސްކިއު މަސައްކަތް ކުރާ ފަރާތްތަކުން ކުރިއަށް ގެންދާ ކަމަށް މަންޒަރު ދުށް މީހުންނާ ހަވާލާދީ އަލްޖަޒީރާ އިން ބުނެފައި ވާއިރު، ބައެއް ރިޕޯޓްތައް ބުނާ ގޮތުގައި ޔަހޫދީ ސިފައިންގެ މި ހަމަލާގައި 300ށް ވުރެ ގިނަ މީހުން ވަނީ ޒަޚަމްވެފައެވެ.
ސިއްހީ އޮފިޝަލުން ބުނެފައިވަނީ އެ ސަރަހައްދުގެ ހޮސްޕިޓަލްތަކަށް ނުތަކާ ވަރަށް މަރުވީ މީހުންގެ ހަށިތަކާއި ޒަޚަމްވީ މީހުން ގެނެސް ވަނީ ފުރި ބާރުވެފައި ކަމަށެވެ.
ޔަހޫދީން ސިފައިން ގެންދަނީ ގެދޮރު ގެއްލި މަގުމަތިވެފައިވާ މީހުން ދިރިއުޅޭ ކޭމްޕްތަކަށް އަމާޒުކޮށް އާންމުންނަށް ހަމަލާ ދެމުންނެވެ.
ތާލް އަލް-ހަވާ އިން ޔަހޫދީ ސިފައިން ފޭބުމުން މަރުވެފައިވާ މީހުންގެ ހަށިތައް ހޯދުމަށް ހުކުރު ދުވަހު ފެށި މަސައްކަތުގައި މިހާތަނަށް 60 ށް ވުރެ ގިނަ މީހުންގެ ހަށިގަނޑު ވަނީ އެ ސަރަހައްދުން ފެނިފައެވެ. މީގެ ތެރޭގައި ގިނައީ ކުޑަކުދިންނާއި އަންހެނުންގެ ހަށިތައް ކަމަށް ރިޕޯޓްތައް ބުނެއެވެ. މަރުވެ ކުނިވެފައިވާ މީހުންގެ ހަށިތައް މަގުމަތީގެ އެތައް މިތާނގައި ހުރި ކަމަށްވެސް އޮފިޝަލުން ހާމަ ކޮށްފައިވެއެވެ.
ގާޒާގެ ހެލްތް މިނިސްޓްރީ އިން ހާމަކޮށްފައިވާ ހިސާބުތަކަށް ބަލާއިރު، އޮކްޓޯބަރ 7 ގެ ފަހުން ޔަހޫދީ ސިފައިން ދީފައިވާ ހަމަލާތަކުގައި ފަލަސްތީނުން މިހާތަނަށް 38،443 މީހުން ވަނީ މަރުވެފައެވެ. އޭގެ އިތުރުން 88،481 މީހުން ވަނީ ޔަހޫދީ ސިފައިންގެ ހަމަލާތަކުގައި ޒަޚަމްވެފައެވެ.
