އާޝޫރާ ދުވަހަކީ ހެޔޮކަމާއި، ޒިކުރުތަކާއި ފިލާވަޅުތަކުން ފުރިގެންވާ ދުވަހެއް - ހުތުބާ
ހުތުބާގައި ވަނީ އެ ދުވަހުގެ ހާދިސާގެ ތަފްސީލްތައް ހިއްސާކޮށްފަ
ހުކުރު ނަމާދުގެ ތެރެއިން ނަގާފައިވާ ފޮޓޯ އެއް
މުހައްރަމް މަހުގެ 10 ވަނަ ދުވަސްކަމަށްވާ އާޝޫރާ ދުވަހަކީ ހެޔޮކަމާއި، ޒިކުރުތަކާއި ފިލާވަޅުތަކުން ފުރިގެންވާ ދުވަހެއް ކަމަށް ހުކުރު ހުތުބާގައި ބުނެފިއެވެ.
ހުކުރު ހުތުބާގައި ވަނީ އާޝޫރާ ދުވަހުގެ މާތްކަމަށް އަލިއަޅުވާލާފައެވެ.
ހުތުބާގައި ބުނެފައި ވަނީ މުސްލިމުންނަށްޓަކާ މާތް ޚާއްސަކުރައްވާފައިވާ ދުވަސްތަކުގެ މަތިން ހަނދާންކޮށް އެކަމުން އިބުރަތް ހާސިލްކުރަން ޖެހޭ ކަމަށެވެ. އެކަން ކުރަން ޖެހެނީ އެކަލާނގެ ދެއްވި ނިޢުމަތްތައް މަތިން ހަނދާންކޮށް އެކަލާނގެ މަންހަޖަސް ތަބާވުމަށް ކަމަށް ހުތުބާގައި ވަނީ ބުނެފައެވެ. މުސްލިމުންނަށްޓަކާ މާތްﷲ ޚާއްސަކުރައްވާފައިވާ ދުވަސްތައް މަތިން ހަނދާންކޮށް އެއިން އިބުރަތް ހާސިލްކުރަން ޖެހޭ ކަމަށް ވެސް ހުތުބާގައި ވަނީ ބުނެފައެވެ. ހުތުބާގައި އިތުރަށް ބުނެފައި ވަނީ އެ ދުވަހަކީ ފިރުއައުނާއި އޭނާގެ ލަޝްކަރު ޢަރަގު ކުރެއްވި ދުވަސްކަމަށެވެ. އަދި އެ ދުވަހަކީ މޫސާ އަލައިހިއްސަލާމް އާއި އެ ކަލޭގެފާނުގެ ގައުމުގެ މީހުންނަށް ނަސްރު ލިބުނު ދުވަސްކަމަށް ހުތުބާގައި ބަޔާންކޮށްފައިވެއެވެ. ހުތުބާގައި ވަނީ އެ ދުވަހުގެ ހާދިސާގެ ތަފްސީލްތައް ހިއްސާކޮށްފައެވެ.
މީގެ އިތުރުން މިފަދަ ހާދިސާތަކަކީ އިބްރަތުން ފުރިގެންވާ ހާދިސާތަކެއް ކަމަށް ހުތުބާގައިވެއެވެ. އެގޮތުން ލިބޭ އެންމެ މުހިންމު ފިލާވަޅަކީ، ﷲއެކަލާންގެއަށް އީމާންވާ މީސްތަކުންނާއި، އެކަލާންގެ ނަބިއްޔުންނާއި ރަސޫލުން، ބޮޑެތި މުސީބާތްތަކުން ސަލާމަތް ކުރައްވާގޮތްކަމަށް ހުތުބާގައި ބުނެފައިވެއެވެ. އެހެންކަމުން، އީމާންކަން ހަރުދަނާ ކުރުމަށް މަސައްކަތް ކުމަށް ހުތުބާގައި ވަނީ ބާރު އަޅާފައެވެ.
މާތްﷲއަށް ކާފިރުވާ މީހުންނާއި ދުނިޔެ ފަސާދަކުރަން އުޅޭ މީހުންނަށް ލިބޭނެ ގަދަފަދަ އަޒާބާއި މެދު ހުތުބާގައި ވަނީ އިންޒާރުދީފައެވެ. އަދި އާޝޫރާ ދުވަހު ރޯދަ ހިފުމުގެމާތްކަމަށް ވެސް ހުތުބާގައި އަލިއަޅުވާލާފައިވެއެވެ.
