މިއަހަރުގެ ފިތުރު އީދު ދުވަހަކީ އަންނަ ހުކުރު ދުވަސް ކަމަށް އިސްލާމިކް މިނިސްޓްރީން ކަނޑައަޅައިފިއެވެ.

ޝައްވާލު މަހުގެ ހަނދު ސާބިތު ކުރުމަށް އިސްލާމިކް މިނިސްޓްރީގައި ބޭއްވި ބައްދަލުވުމަށް ފަހު، އިސްލާމިކް މިނިސްޓަރު ޑރ. ޒިޔާރު ބާގިރު ނެރުއްވި ބަޔާނުގައި ވިދާޅުވެފައި ވަނީ ރަމަޟާން މަހުގެ 29 ވީ ބުދަ ދުވަހު އިރުއޮއްސޭއިރު، ރާއްޖެ އާއި އިސްލާމީ އެއްވެސް ގައުމެއްގެ އުދަރެހުން ޝައްވާލު މަހުގެ ހަނދު ފެންމަތިވެފައި ނުހުންނާނެ ކަމަށް އިތުބާރު ހުރި ފަލަކީ ހިސާބުތަކުން ޔަގީންވާ ކަމަށެވެ.

އެގޮތުން ރަމަޟާން މަހާއި ޝައްވާލު މަހުގެ ހަނދު ބެލުމުގައި ރާއްޖޭގައި އަމަލު ކުރަމުންދާ އުސޫލުގައިވާ ގޮތުގެ މަތިން ބުރާސްފަތި ދުވަހަކީ ރަމަޟާން މަހުގެ 30 ވަނަ ދުވަސް ކަމުގައި ކަނޑައަޅައި، އީދު ދުވަހަކީ ހުކުރު ދުވަސް ކަމުގައި ނިންމާފައިވާ ކަމަށް އިސްލާމިކް މިނިސްޓަރު ނެރުއްވި ބަޔާނުގައިވެއެވެ.

"...ރަމަޟާން މަހާއި ޝައްވާލު މަހުގެ ހަނދު ބެލުމުގައި ރާއްޖޭގައި އަމަލު ކުރުމަށް ހަމަޖެހިފައިވާ އުސޫގައިވާ ގޮތުގެ މަތިން މާދަމާ، މީލާދީ ސަނަތުން 2018 ވަނަ އަހަރުގެ ޖޫން މަހުގެ 14 ވަނަ ދުވަހަކީ މިއަހަރުގެ ރަމަޟާން މަހުގެ 30 ވަނަ ދުވަސް ކަމުގައްޔާއި 15 ޖޫން 2018 ވާ ހުކުރު ދުވަހަކީ 1439 ވަނަ އަހަރުގެ ޝައްވާލު މަހުގެ އެކެއްވާ ފިތުރު އީދު ދުވަސް ކަމުގައި ކަނޑައަޅައިފީމެވެ،" އިސްލާމިކް މިނިސްޓަރު ނެރުއްވި ބަޔާނުގައިވެއެވެ.