އާދިއްތަ ދުވަހަކީ ސަރުކާރުގެ ރަސްމީ ބަންދު ދުވަހެއްގެ ގޮތުގައި ރައީސް އަބްދުﷲ ޔާމީން ހަމަޖައްސަވައިފި އެވެ.
ރައީސް އޮފީހުގެ ތަރުޖަމާނު އިބްރާހިމް މުއާޒް އަލީ ކުރެއްވި ޓްވީޓެއްގައި ވިދާޅުވީ، އާދީއްތަ ދުވަސް ބަންދުކުރަން ރައީސް ޔާމީން ނިންމެވީ މިނިވަން ދުވަހުގެ ކުޅިވަރުތައް ހޮނިހިރު ދުވަހުގެ ރެއަށް ފަސްކޮށްފައިވާތީ، ސަރުކާރުގެ މުވައްޒަފުންނަށާއި ސްކޫލްތަކުގެ ކުދިންނަށް ލުޔެއް ދެއްވުމުގެ ގޮތުން ކަމަށެވެ.
"މިނިވަން ދުވަހުގެ މުނާސަބަތާ ގުޅިގެން ބާއްވާ ކުޅިވަރާއި ހެވިކަމުގެ ރަސްމިއްޔާތު، 28 ޖުލައި ދުވަހުގެ ރެޔަށް ފަސްކުރެވިފައިވާތީ، އެ ހަރަކާތުގައި ގިނަ ސްކޫލްކުދިންނާއި ސަރުކާރުގެ މުވައްޒަފުން ބައިވެރިވާތީ، އެ މުވައްޒަފުންނާއި ދަރިވަރުންގެ ލުއި ފަސޭހައަށްޓަކައި ޖުލައި 29 ވާ އާދީއްތަ ދުވަހަކީ ސަރުކާރުގެ ރަސްމީ ބަންދު ދުވަހެއްކަމުގައި ރައީސް ނިންމަވައިފި. މިގޮތަށް ހަމަޖެއްސުމާ ގުޅިގެން ސަރުކާރުގެ އޮފީސްތައް ދެން ހުޅުވާނީ ޖުލައި 30 ވާ ހޯމަ ދުވަހު،" މުއާޒު ވަކިވަކިން ކުރެއްވި ދެ ޓްވީޓްގައި ވިދާޅުވެފައިވެ އެވެ.
މިނިވަން ދުވަހުގެ ކުޅިވަރުތައް ބާއްވަން ކުރިން ހަމަޖެއްސީ ހުކުރު ދުވަހުގެ ރޭ ގަލޮޅު ދަނޑުގައެވެ. އެހެން ނަމަވެސް މިހާރު ވަނީ އެދުވަސް ހޮނިހިރު ދުވަހުގެ ރެއަށް ބަދަލު ކޮށްފައެވެ.
ރާއްޖޭގެ މިނިވަން ދުވަހަކީ ޖުލައި މަހުގެ 26 ވަނަ ދުވަހެވެ. ފަންސާސް ތިން ވަނަ މިނިވަން ދުވަހުގެ މުނާސަބަތާ ގުޅިގެން ސަރުކާރު ބަންދުކުރީ ބުރާސްފަތި ދުވަހުން ފެށިގެންނެވެ.
