ވީޑިއޯ އެސިސްޓެންޓް ރެފްރީ (ވީއޭއާރު) އިން ދަނީ ފުޓުބޯޅަ ހަލާކު ކުރަމުން ކަމަށް ބުނެ، ނެދަލެންޑްސްގެ ކޯޗު ރޮނާލްޑް ކޫމަން ވީއޭއާރަށް ނުރުހުން ފާޅު ކޮށްފި އެވެ.
އޭނާ މިހެން ވާހަކަ ދެއްކީ ޖަރުމަނުގައި މިހާރު ކުރިއަށްދާ ޔުރޯ ފުޓުބޯޅަ މުބާރާތުގެ ސެމީ ފައިނަލްގައި ނެދަލެންޑްސް އިން އިންގްލެންޑާ ދެކޮޅަށް ކުޅުނު މެޗަށްފަހު އެވެ. އެ މެޗުގައި ނެދަލެންޑްސް އިން ލަނޑު ޖަހައި ލީޑު ނަގާފައި ވަނިކޮށް، އިންގްލެންޑުން ނަތީޖާ ހަމަހަމަ ކުރީ ޕެނަލްޓީ އަކުންނެވެ. އިންގްލެންޑަށް ޕެނަލްޓީ ދިނުމަށް ރެފްރީ ނިންމީ ވީއޭއާރު ބެލުމަށްފަހު އެވެ. އެއީ ނެދަލެންޑްްސްގެ އޭރިޔާ ތެރެއިން އިންގްލެންޑުގެ ކެޕްޓަން ހެރީ ކޭން އަށް ކުރި ފައުލަކަށް ދިން ޕެނަލްޓީ އެކެވެ.
ކޫމަން ބުނީ އެއީ ޕެނަލްޓީ ދޭން ޖެހޭ ޙާލަތެއް ނޫން ކަމަށެވެ. ނެދަލެންޑްސްގެ ޑަންޒެލް ޑަމްފްރީސް ކޭން އަށް ކުރީ ފައުލެއް ނޫން ކަމަށް ވެސް އޭނާ ބުންޏެވެ. ކޫމަން ބުނީ ޑަމްފްރީސްގެ ހަމައެކަނި ރިއެކްޝަނަކަށްވީ އެ ޝޮޓް ބްލޮކް ކުރުން ކަމަށާއި، އެވަގުތު ކޭން ބޯޅަ ޖެހި ވަގުތާ ދިމާވުމުން، ފައިގައި ޖެހުނީ ކަމަށެވެ.
މީގެ އިތުރުން ކޫމަން ބުނީ ވީއޭއާރުން ނިންމާ އެފަދަ ނިންމުންތަކުގެ ސަބަބުން، ފުޓުބޯޅަ ހަލާކު ވަމުންދާ ކަމަށެވެ. އެކަމަށް މިސާލެއް ދެއްކުމުގެ ގޮތުން ކޫމަން ބުނީ، އިންގްލެންޑުގައި ނަމަ، އެއަށް ޕެނަލްޓީއެއް ނުދޭނެ ކަމަށެވެ. އެކަން ފާހަގަކޮށް ކޫމަން ބުނީ ޑިފެންޑަރަކު ކުރަން ޖެހޭނެ އިތުރު އެހެން ކަމެއް އޭނާާ އަށް ނުވިސްނޭ ކަމަށެވެ. ކޫމަން ފާހަގަ ކުރި ގޮތުގައި މެޗުގެ ރެފްރީގެ ފަރާތުން ފެނުނު ބައެއް ނިންމުންތަކާމެދު ސުވާލު އުފެދެ އެވެ. އެހެން ނަމަވެސް އެއީ ނެދަލެންޑްްސް ބަލިވާާން ޖެހުނު ސަބަބު ނޫން ކަމަށް ވެސް އޭނާ ވަނީ ބުނެފަ އެވެ.
ކޫމަން ވަނީ ނެދަލެންޑްސްްގެ ޓީމަށް ތައުރީފު ވެސް ކޮށްފަ އެވެ. އޭނާ ބުނީ އެ ޓީމުގައި ތިބި ކުޅުންތެރިންނަކީ ހުނަރުވެރި އަދި މޮޅެތި ކުޅުންތެރިން ކަމަށެވެ. ޚާއްސަކޮށް ވަކި ވަކި ކުޅުންތެރިންގެ ހުނަރު ވެސް ވަރަށް ރަނގަޅުކަން ފާހަގަކޮށް ކޫމަން ބުނީ، ނެދަލެންޑްސް އަށް ފުޓުބޯޅައިގައި ކުރިއަށް ދެވޭނެ ކަމުގެ އުންމީދު މުބާރާތުން އައު ވެއްޖެ ކަމަށެވެ.
