ގާޒާގެ ދެ ހޮސްޕިޓަލެއް ވަގުތުން ބަންދުކޮށް ބަލި މީހުންނާއި މުވައްޒަފުން އެތަންތަނުން ނުކުންނަން ޔަހޫދީ ސިފައިން އަންގައިފިއެވެ.

ގާޒާގެ ބަޔަކުން މީހުން ހުސްކުރުމަށް ޔަހޫދީ ސިފައިން ނެރުނު ކުއްލި އަމުރުގެ ދަށުން ހުސް ކުރަން ޖެހުނު ދެ ހޮސްޕިޓަލަކީ، އަލް-އަހްލީ އަރަބް ހޮސްޕިޓަލް އާއި ޕޭޝަންޓްސް ފްރެންޑްސް ބެނޮވޮލެންޓް ސޮސައިޓީ ހޮސްޕިޓަލެވެ.

ކުއްލި ކުއްލި އަށް ގާޒާގެ އެކި ސަރަހައްދުތަކުގައި ދިރިއުޅޭ މީހުން އެމީހުންގެ ވަޒަނުން ނުކުމެގެން ދިއުމަށް ޔަހޫދީ ސިފައިން ނެރެމުންދާ އަމުރު ތަކުގެ ސަބަބުން ދެ މިލިއަނަށް ވުރެ ގިނަ މީހުން މަގުމަތިވެ ވަންނާނެ ތަނެއް ނެތި ވިއްސި ވިހާލިވެފައިވާ ކަމަށް ފަލަސްތީނުގެ ރެޑް ކްރެސެންޓް ސޮސައިޓީން ވަނީ ބުނެފައެވެ. މި ގޮތައް މަގު މަތިވެފައިވާ މީހުންގެ ތެރޭގައި ބަލި މީހުންނާއި ޒަޚަމްވެފައިވާ އެތައް ބަޔަކު ހިމެނޭ ކަމަށް އެ ޖަމާއަތުން ބުނެއެވެ.

ފަލަސްތީނު ރައްޔިތުން ގަތުލު ކުރުން ހުއްޓުމެއް ނެތި ކުރިއަށް ދާއިރު އަދި އެތައް ހާސް މީހުން އެމީހުންގެ ގޯތި ގެދޮރުން ނެރެ ބޭރުކުރަމުންދާ ދިއުމަށް ހުއްޓުމެއް ނެތް އިރު ސުލްހައިގެ ވާހަކަ ތަކުގެ ނަތީޖާ ރަނގަޅު ނުވާނޭ ކަމަށް ހަމާސްގެ ވެރިޔާ އިސްމާއީލް ހަނިއްޔާ ވަނީ ބުނެފައެވެ.

ހަމާސް އިން މި އިންޒާރު ދީފައިވާއިރު، ވައިޓް ހައުސްގެ ނޭޝަނަލް ސެކިއުރިޓީ ތަރުޖަމާނު ޖޯން ކާބީ ބުނެފައިވަނީ، ގާޒާގެ ހަނގުރާމަ ހުއްޓުމަކަށް ގެނެވޭތޯ ހޯމަ ދުވަހު މިސްރާއި، އިޒްރޭލާއި، އުރުދުން އާއި އެމެރިކާގެ އޮފިޝަލުން ގާހިރާ ގައި ބައްދަލުކޮށް އެއްބަސްވުމަކަށް ނާދެވި ހުރި ކަންކަމަށް ގޮތެއް ނިންމޭތޯ މަސައްކަތް ކޮށްފައިވާ ކަމަށެވެ.

ޔަހޫދީ ސިފައިންގެ ހަމަލާތަކުގައި، ހުސްވި އަހަރުގެ އޮކްޓޯބަރު 7 ވަނަ ދުވަހުން ފެށިގެން މިހާތަނަށް ފަލަސްތީނުން މަރުވި މީހުންގެ އަދަދު 38،193ށް ވަނީ އަރާފައެވެ. ހަމާލާތަކުގައި ޒަޚަމްވި މީހުންގެ އަދަދު 87،903ށް ވަނީ އަރާފައެވެ. ހަމާސްގެ ހަމަލާތަކުގައި، މި މުއްދަތުގައި އިޒްރޭލުން މަރުވެފައިވަނީ 1،139 މީހުންނެވެ.