މައިނޯރިޓީއަށް ކުއްލި މައްސަލަ ހުށަނޭޅޭ ގޮތަށް ހަދަން ސަރުކާރު މެމްބަރަކު ގޮވާލައްވައިފި
8 ޖުލައި 2024 | ހޯމަ 13:51ވަކި ވަރަކަށް ޢަދަދު ހަމަ ނުވާ ނަމަ ކުއްލި މައްސަލަ ހުށަހެޅުމުގެ ފުރުސަތު ލިބިގެން ނުވާނެ ކަމަށް އޭނާ ވަނީ ވިދާޅުވެފަ
ޕީއެންސީ މެންބަރު މުހައްމަދު މުސްތަފާ އިބްރާހީމް
އެމްޑީޕީން ރައްޔިތުންގެ މަޖިލީހަށް ހުށަހަޅާ ކުއްލި މައްސަލަތަކަކީ ބޭކާރު މައްސަލަތަކެއްކަމަށް މާފަންނު ހުޅަނގު ދާއިރާގެ ޕީއެންސީ މެންބަރު މުހައްމަދު މުސްތަފާ އިބްރާހީމް ވިދާޅުވެއްޖެއެވެ.
އޭނާ އެހެން ވިދާޅުވީ ހޯމަ ދުވަހުގެ މަޖިލިސް ޖަލްސާގައި ވާހަކަ ދައްކަވަމުންނެވެ.
ސަރުކާރުގެ ޚަރަދުގައި ދީފައިވާ ސްކޮލާޝިޕްތަކާއި ސްޓޫޑެންޓު ލޯނުގެ އެހީގައި ބޭރުގައި ކިޔަވާ ދިވެހި ދަރިވަރުންނަށް ފޯރުކޮށްދޭން ޖެހޭ ފައިސާ ނުދެވި ބައެއް ދަރިވަރުން ހާލުގައި ޖެހިފައިވާތީ އެމްޑީޕީގެ ފަރާތުން ވަނީ ކުއްލި މައްސަލަ އެއް ހުށަހަޅާފައެވެ.
މެމްބަރު މުސްތަފާ ވަނީ އެއީ ބޭކާރި ކުއްލި މައްސަލަ އެއް ކަމަށް ސިފަކުރައްވާފައެވެ. އޭނާ ވިދާޅުވީ މަޖިލީހުގައި މުހިންމު އެތައް ކަމެއް އެބަ ހުރި ކަމަށެވެ. މިގޮތަށް މަޖިލީހުގެ ވަގުތު ބޭކާރުކޮށްލަން ފުރުސަތު ދީގެން ނުވާނެ ކަމަށް އޭނާ ވަނީ ވިދާޅުވެފައެވެ.
ވަކި ވަރަކަށް ޢަދަދު ހަމަ ނުވާ ނަމަ ކުއްލި މައްސަލަ ހުށަހެޅުމުގެ ފުރުސަތު ލިބިގެން ނުވާނެ ކަމަށް އޭނާ ވަނީ ވިދާޅުވެފައެވެ.
އޭނާ އެފަދައިން ވިދާޅުވެފައިވާއިރު ކުއްލި މައްސަލަތައް މަޖިލީހުގެ ކޮންމެ މެމްބަރަކަށް ވެސް މިހާރު އޮންނަ ގޮތުން ހުށަހެޅެއެވެ. އެހެންކަމުން އެއީ އެންމެ މެމްބަރަކަށް ވެސް ދާއިރާ އެއްގެ ނުވަތަ އާންމުންނާއި ގުޅުން ހުރި ކަންކަމާއި މެދު އަޑު އުފުލަން ލިބޭ ފުރުސަތެކެވެ. އަދި ކުއްލި މައްސަތަކަށް ބަހުސްކުރުމުގެ ތެރެއިން އޭރެއްގައި ހިނގާ މުހިންމު ކަންކަމާއި މެދު މެމްބަރުންގެ ޚިޔާލާއި ފިކުރު ބަދަލުކުރެވެއެވެ. މައިނޯރިޓީ އަށް ކުއްލި މައްސަލަ ހުށަހެޅުމުގެ ފުރުސަތު ކަނޑުވާލުމުން މައިނޯރިޓީގެ އަޑު ވަރަށް ބޮޑަށް ކެނޑިގެން ދާނެކަން ފާހަގަކޮށްލެވެއެވެ. ބޭރުގައި ކިޔަވަން ތިބި ދަރިވަރުންނަށް ޑޮލަރު ލިބުން ދަތިވެ ގިނަ ބަޔަކު ތަކްލީފުތަކާ ކުރިމަތިލާން ޖެހިފައިވާއިރު، އެކަމާ ގުޅިގެން އެމްޑީޕީން މަޖިލީހަށް ހުށަހެޅި މައްސަލަ ވަނީ ބޭރުކޮށްލާފައެވެ.
އެ ކުއްލި މައްސަލަ ހުށަހެޅުއްވީ ހިތަދޫ ދެކުނު ދާއިރާގެ މެމްބަރު އިބްރާހިމް ނާޒިލްއެވެ.
ނާޒިލް ހުށަހެޅުއްވި މައްސަލައިގައި ވިދާޅުވީ، ފައިސާ ނުލިބުމުގެ ސަބަބުން ދަރިވަރުން މަގުމަތިވުމުގެ ބިރު ހީވެފައިވާ ކަމަށެވެ.
އަދި އާއިލާއާ ދުރުގައި ރާއްޖޭން ބޭރުގައި އެކުދިން ދިރިއުޅެމުންދާއިރު، އެކުދިން ދުވަހުން ދުވަހަށް ކުރަން ޖެހޭ ހަރަދުތައް ވެސް ނުކުރެވި، އެކި ފަރާތްތަކުގެ އެހީތެރިކަމަށް އެދި ސަލާން ޖަހަން ޖެހޭ ހާލަތަށް ބައެއް ކުދިންނާއި އެކުދިންގެ އާއިލާ ގޮސްފައިވާކަންވެސް ނާޒިލް ފާހަގަ ކުރެއްވިއެވެ.
