ސިއްހީ ހިދުމަތް ދިނުމުގެ ގާނޫނަށް އިސްލާހު ގެނައުމުގެ ބިލަށް އާއްމުންގެ ހިޔާލު ހޯދަނީ

ސިއްހީ ހިދުމަތް ދިނުމުގެ ގާނޫނަށް އިސްލާހު ގެނައުމުގެ ބިލަށް އާއްމުންގެ ހިޔާލު ހޯދަން އިޖްތިމާއީ ކޮމިޓީން ފާސްކޮށްފިއެވެ.

ހޯމަ ދުވަހު ބޭއްވީ އިޖްތިމާއީ ކޮމިޓީގެ 5 ވަނަ ބައްދަލުވުމުގައި ވަނީ ސިއްހީ ހިދުމަތް ދިނުމުގެ ގާނޫނަށް އިސްލާހު ގެނައުމުގެ ބިލަށް އާންމުންގެ ހިޔާލު ހޯދުމަށް 10 ދުވަހަށްވުރެ ދިގު ނުވާނެހެން އާއްމުކޮށް އިއުލާންކުރުމަށާއި، ސިއްހީ ހިދުމަތް ދިނުމުގެ ގާނޫނަށް އިސްލާހު ގެނައުމުގެ ބިލު ދިރާސާކުރުމުގެ ގޮތުން މިނިސްޓްރީ އޮފް ހެލްތް އަދި މިނިސްޓްރީ އޮފް ފިނޭންސަށް އިސްލާހެއް އޮތްނަމަ 10 ދުވަހުގެ ތެރޭގައި ސަބަބު ބަޔާންކޮށް ހުށަހެޅުމަށްވެސް ވަނީ ފާސްކޮށްފައެވެ.

މީގެ އިތުރުން ސިއްހީ ހިދުމަތް ދިނުމުގެ ގާނޫނަށް އިސްލާހު ގެނައުމުގެ ބިލުގެ ސުންގަޑިއެއްގެ ގޮތުގައި ޖުލައި މަހުގެ 25 ވަނަ ދުވަސްކަމުގައި ވަނީ ކަނޑައަޅާފައެވެ.

ގާނޫނު ނަންބަރު 29/2015 (ސިއްހީ ހިދުމަތް ދިނުމުގެ ގާނޫނު) އަށް އިސްލާހު ގެނައުމުގެ ބިލުގައި ޑިރެކްޓަރ ޖެނެރަލް އޮފް ހެލްތު ސަރވިސަސްގެ މަގާމާއި ގުޅޭ މާއްދާއެއް އިތުރުކުރުމަށް ވަނީ ހިމަނާފައެވެ. އެގޮތުން އެ ގާނޫނުން ހަދާ ގަވާއިދުގައި ބަޔާންކުރާ ގޮތަށް ސިއްހީ ހިދުމަތް ދިނުމުގެ ކަންކަން ވިލަރެސްކޮށް ހިންގާނީ ޑިރެކްޓަރ ޖެނެރަލް އޮފް ހެލްތު ސަރވިސަސް ކަަމަށް ވަނީ ބުނެފައެވެ. އަދި އެ މަގާމަކީ ސިވިލް ސަރވިސްގެ މަގާމެއް ކަަމަށާއި އެ މަގާމަށް މީހަކު އައްޔަންކުރާނީ މިނިސްޓްރީގެ ލަފާގެ މަތިން ސިވިލް ސަރވިސް ކޮމިޝަނުން ކަމަށް ވަނީ ބުނެފައެވެ.