ބޭރުގައި ކިޔަވަން ތިބި ދަރިވަރުންނަށް ޑޮލަރު ލިބުން ދަތިވެ ގިނަ ބަޔަކު ތަކްލީފުތަކާ ކުރިމަތިލާން ޖެހިފައިވާއިރު، އެކަމާ ގުޅިގެން އެމްޑީޕީން މަޖިލީހަށް ހުށަހެޅި މައްސަލަ ބޭރުކޮށްލައިފިއެވެ.

ހޯމަ ދުވަހުގެ ޖަލްސާގައި ކުއްލި މައްސަލަ ހުށަހެޅުއްވީ ހިތަދޫ ދެކުނު ދާއިރާގެ މެމްބަރު އިބްރާހިމް ނާޒިލްއެވެ.

ނާޒިލް ހުށަހެޅުއްވި މައްސަލައިގައި ވިދާޅުވީ، ފައިސާ ނުލިބުމުގެ ސަބަބުން ދަރިވަރުން މަގުމަތިވުމުގެ ބިރު ހީވެފައިވާ ކަމަށެވެ.

އަދި އާއިލާއާ ދުރުގައި ރާއްޖޭން ބޭރުގައި އެކުދިން ދިރިއުޅެމުންދާއިރު، އެކުދިން ދުވަހުން ދުވަހަށް ކުރަން ޖެހޭ ހަރަދުތައް ވެސް ނުކުރެވި، އެކި ފަރާތްތަކުގެ އެހީތެރިކަމަށް އެދި ސަލާން ޖަހަން ޖެހޭ ހާލަތަށް ބައެއް ކުދިންނާއި އެކުދިންގެ އާއިލާ ގޮސްފައިވާކަންވެސް ނާޒިލް ފާހަގަ ކުރެއްވިއެވެ.

ނާޒިލް ވިދާޅުވީ، ރައީސް ޑރ. މުހައްމަދު މުއިއްޒުގެ ސަރުކާރުން ދައުލަތުގެ ތިޖޫރީ ހުސްކުރަނީ ސަރުކާރުގެ ވެރިންނަށް ގެކޮޅުތަކާއި އޮފީސްތައް ޒީނަތްތެރިކުރުމާއި، ޑޮލަރު ހަރަދުކޮށްގެން ބޮޑެތި ވަފުދުތައް ހަދައިގެން ރާއްޖޭން ބޭރަށް ދަތުރުކުރުމަށާއި، ސިޔާސީ މުވައްޒަފުން ފައުޖުފައުޖަށް އައްޔަންކޮށް އެމީހުންނަށް މުސާރަދިނުމަށް ކަމަށެވެ.

އެކަންކަން ކުރާއިރު، އެތައް ދަރިވަރުންނެއް މަގުމަތިވުމުގެ ބިރު ހީވެފައި ތިބިކަން ނާޒިލް ފާހަގަ ކުރެއްވިއެވެ.  

އެހެންނަމަވެސް މި މައްސަލަ ސަރުކާރު މެމްބަރުންގެ ވޯޓުން ވަނީ ބޭރުކޮށްލާފައެވެ. އެގޮތުން މައްސަލައަށް ބަހުސް ކުރަން ނުފެންނަކަމަށް 59 މެމްބަރަކު ވޯޓު ދެއްވާފައިވެއެވެ.

މައްސަލަ ބަލައިގަންނަން ފެންނަ ކަމަށް ވޯޓު ދެއްވީ އެންމެ 12 މެންބަރުންނެވެ.

ބޭރުގައި ކިޔަވަން ތިބި ދަރިވަރުންނަށް ޑޮލަރު ލިބުން ދަތިވެ ގިނަ ބަޔަކު ތަކްލީފުތަކާ ކުރިމަތިލާން ޖެހިފައިވާއިރު، ރާއްޖެއިން ބޭރުގައި ސްކޮލަރޝިޕްގައި ގޮސް ތިބި ކުދިން އަތުގައި ލާރިއެެއް ނެތްކަމަށާއި، ލިބެންޖެހޭ ސްޓައިޕެންޑް (އެލަވަންސް) އަދިވެސް ސަރުކާރުން ނުފޮނުވާކަމަށް ގިނަ ބަޔަކު ދަނީ ބުނަމުންނެވެ.