މިއީ ޑިމޮކްރަސީ އާއި ބީރައްޓެހި ސަރުކާރެއްކަން މި ސަރުކާރުން ސާބިތުކޮށްދީފައިވާ ކަމަށް އެމްޑީޕީގެ ކުރީގެ ރައީސް ޑރ.އިބްރާހިމް ދީދީ (ޑރ.ޑީޑީ) ވިދާޅުވެއްޖެއެވެ.
އޭނާ އެފަދައިން ވިދާޅުވީ ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުންނެވެ.
މި ސަރުކާރުން ކަންކަން ނިންމާ އިރު މަޝްވަރާ ނުކުރާ ކަމަށް ފާހަގަކުރައްވާ ޑީީޑީ ެވަނީ އެކަމަށް ފާޑު ވިދާޅުވެފައެވެ. އަދި މަޝްވަރާކުރާ އިރު ވެސް މަޝްވަރާ ކުރަނީ ސަރުކާރުގެ ފިކުރަށް ތާއީދު ކުރާ ވަކި ބަޔަކާ ކަމަށާއި އެއީ ޑިމޮކްރެޓިކް އުސޫލުތަކާއި ޚިލާފުކަމެއް ކަމަށް އޭނާ ވިދާޅުވިއެވެ. ޑިމޮކްރަސީ އަކީ ޚިޔާލު ތަފާތު މީހުންނާއި އެކުގައި ވެސް މަޝްވަރާކޮށްގެން ކަންކަމުގައި ހައްލު ހޯދުން ކަމަށާއި އެ ސިފަ މި ސަރުކާރުން އެއްވެސް ވަރަކަށް ފެނިގެން ނުދާކަމަށް ޑީޑީ ވިދާޅުވިއެވެ. އޭނާ އިތުރަށް ވިދާޅުވީ މި ސަރުކާރުން ބައެއް ކަންކަމުގައި އާއްމުންނާއި މަޝްވަރާކުރާ ކަމަށް ބުނެ އޮޅުވާލުމަށް ހޮވާލާފައިވާ ވަކި ބަޔަކު ގެންގޮސްގެން ސައްލާކުރާ ކަމަށެވެ. އެހެންނަމަވެސް އެއީ ތަފާތު ޚިޔާލުތަކާއި ކަންބޮޑުވުންތައް ހޯދުމުގައި ނާކާމިޔާބު ގޮތެއް ކަމަށް ޑީޑީ ވިދާޅުވިއެވެ.
ޑިމޮކްރަސީގެ ހަމަތައް ވެސް ނޭނގެނީ. ގަބޫލުވެސް ނުކުރަނީ. މަސްވެރިންނާއި އެކީގަ މަޝްވަރާކުރާ ކަމަށް ވަންޏާ އެ ދާއިރާ އަށް ނިސްބަތްވާ އެންމެން ތަމްސީލްވާން ޖެހޭނެ. އަޅުގަނޑުމެންނަކީ އެންމެ ބޮޑަށް ފާޑު ކީ މީހުންނާއި މަޝްވަރާކުރި މީހުން. ސީދާ ރައީސް ޞާލިހު އިސްވެ ހުންނަވައިގެން ވެސް މަސްވެރިންނާއި މަޝްވަރާކުރި.އެމްޑީޕީގެ ކުރީގެ ރައީސް ޑރ.އިބްރާހިމް ދީދީ (ޑރ.ޑީޑީ)
އެނާ ވަނީ މި ސަރުކާރަށް ވަރަށް ބޮޑަށް ފާޑު ވިދާޅުވެފައެވެ. މި ސަރުކާރުން ވެރިކަމަށް އައީ ކުރީ ސަރުކާރުގެ ވާހަކަ ނުދައްކާނެ ކަަމަށް އަމިއްލަފުޅަށް ރައީސް ޑރ.މުހައްމަދު މުއިއްޒު ވައުދުވެވަޑައިގެން ކަމަށާއި ނަމަވެސް ކަން ހިނގަނީ އެއާއި ދިމާ އިދިކޮޅަށް ކަމަށް އޭނާ ވިދާޅުވިއެވެ. ވެރިކަމަށް އައުމުގެ ކުރިން ކިތަންމެ ބޮޑު ދަރަންޏެއް އޮތަސް ދަރަނި ދެއްކޭނެ ސިޔާސަތުތައް ރާވާފައިވާ ކަަމަށް ރައީސް މުއިއްޒު ވިދާޅުވެފައިވާ ކަމަށް އޭނާ ވަނީ ފާހަގަކުރައްވާފައެވެ. ކެމްޕެއިންގެ ތެރޭގައި ރައީސް މުއިއްޒު ދެއްކެވި ވާހަކަތައް ވަރަށް ސާފުކޮށް ރައްޔިތުންނަށް އެނގޭނެ ކަމަށް ފާހަގަކުރައްވާ ޑީޑީ ވަނީ މި ސަރުކާރުން އަމަލުކުރާ ގޮތަށް ފާޑު ވިދާޅުވެފައެވެ. މި ސަރުކާރުން ވައުދެއް ވެއްޖެ ނަމަ އެ ވައުދާއި ޚިލާފުވާނެކަން މިހާތަނަށް އަމަލުކުރަމުންދާ ގޮތުން ފެންނަ ކަމަށް އޭނާ ވަނީ ވިދާޅުވެފައެވެ. އެގޮތުން ސިޔާސީ މަޤާމްތައް އިތުރު ނުވާނެ ކަމަށް ބުނެ އައި ސަރުކާރުގައި 2000 އަށް ވުރެ ގިނަ ސިޔާސީ މީހުން ތިބި ކަމަށް ޑީޑީ ވިދާޅުވިއެވެ. ރައީސް މުއިއްޒުގެ ސަރުކާރުގައި ބޭކާރު ޚަރަދުތައް ކުރަމުންދާ ކަމަށް ވެސް އޭނާ ވިދާޅުވިއެވެ. ވެރިކަމަށް އައިސް އިތުރު ވުޒާރާތައް އިތުރުކުރުމާއި ނުކަތާ ވަރަށް ސިޔާސީ މަޤާމްތައް އުފެއްދުމަކީ އެއީ ބޭކާރު ޚަރަދުކަމަށް އޭނާ ވަނީ ސިފަކުރައްވާފައެވެ.
