ފަހު ވަގުތު ބަލިވެ ބެލްޖިއަމް ކެޓުމުން، ޓަޑެސްކޯ އަށް އުނދަގޫ ވެފައި

ޖަރުމަނުގައި މިހާރު ކުރިއަށްދާ ޔޫރޯ ފުޓުބޯޅަ މުބާރާތުގެ ގަދަ 16 ވަނަ ބުރުގައި ފްރާންސް އަތުން ފަހު ވަގުތު ބަލިވެ، މުބާރާތުން ކެޓުމުން އުނދަގޫވެފައި ހުރި ކަމަށް ބެލްޖިއަމްގެ ކޯޗު ޑޮމެނިކޯ ޓަޑެސްކޯ ބުނެފި އެވެ.

ފްރާންސްއާ ދެކޮޅަށް ކުޅުނު މެޗުން ބެލްޖިއަމް ބަލިވީ އެންމެ ފަހު ވަގުތުގައި ފްރާންސް ލަނޑު ޖެހުމުންނެވެ. ފްރާންސްގެ ރަންޑަލް ކޯލޯ މުއާނީ ފޮނުވާލި ބޯޅަ ގޯލަށް ވަނީ، ބެލްޖިއަމްގެ ޑިފެންޑަރެއްގެ ގައިގައި ޖެހިފަ އެވެ. ބައި ކޮޅަށް ވަތް އެ ލަނޑާއެކު، ބެލްޖިއަމް އަށް ވަނީ މުބާރާތް ނިމިފަ އެވެ.

ފްރާންސް މެޗަށްފަހު ނޫސްވެރިންނާ ވާހަކަ ދައްކަމުން ޓަޑެސްކޯ ބުނީ، މުބާރާތުގެ ގަދަ 16 ވަނަ ބުރާ ހަމައަށް ބެލްޖިއަމް އައީ ނަސީބު ރަނގަޅުވުމުގެ ސަބަބުންނޭ ނުބުނެވޭނެ ކަމަށެވެ. ޚާއްސަކޮށް މުބާރާތުގައި ފުރަތަމަ މެޗުން ބަލިވުމާއެކު، ދެން ކުރިއަށް ދިޔުމަށްޓަކައި ބެލްޖިއަމް އިން ކޮށްފައިވާ މަސައްކަތް ފެންނާނެ ކަަމަށް ވެސް އޭނާ ބުންޏެވެ.

ޓަޑެސްކޯ ޤަބޫލު ކުރާ ގޮތުގައި ފްރާންސްއާ ދެކޮޅަށް ކުޅުނު މެޗު ކާމިޔާބު ކުރާނެ ފުރުސަތުތަކެއް ބެލްޖިއަމް އަށް ލިބުނެވެ. ބެލްޖިއަމްގެ ކެޕްޓަން ކެވިން ޑި ބްރޭނާ އާއި ފޯވާޑް ރޮމެލޫ ލުކާކޫ އަށް މެޗުގައި ލީޑު ނަގާނެ ފުރުސަތުތަކެއް ވަނީ ލިބިފަ އެވެ. އެހެން ނަމަވެސް އެ ފުރުސަތުތަކުގެ ބޭނުން އެންމެ ރަނގަޅު ގޮތުގައި ހިފޭ ގޮތް ވަނީ ނުވެފަ އެވެ.

މީގެ އިތުރުން ޓެޑެސްކޯ ބުނީ، މުބާރާތުގައި ބެލްޖިއަމް ކުޅެފައިވާ މެޗުތަކަށް ބަލާއިރު ވެސް އެ ޓީމުގެ ކުޅުން ރަނގަޅުކަން އިނގޭނެ ކަމަށެވެ. ގްރޫޕް ސްޓޭޖުގެ ފުރަތަމަ މެޗުގައި ސްލޮވޭކިއާ އަތުން ބަލިވި ނަމަވެސް، އެ މެޗުގައި ވެސް ބެލްޖިއަމް އިން ރަނގަޅު ކަންތައްތަކެއް ކޮށްފައިވާކަން އޭނާ ވަނީ ފާހަގަ ކޮށްފަ އެވެ. އަދި ފަހުން ރޮމޭނިއާ އަދި ޔޫކްރެއިންއާ ދެކޮޅަށް ކުޅުނު މެޗުން ވެސް އެކަން ފެނުނު ކަމަށް ޓަޑެސްކޯ ވަނީ ފާހަގަކޮށްފަ އެވެ.

މިއަހަރުގެ ޔޫރޯގައި ބެލްޖިއަމްގެ ފޯވާޑް ލުކާކޫ އަށް ލަނޑެއް ޖެހިފައި ނުވުމުން، އޭނާ އަށް ކުރިމަތިވަމުން އަންނަ ފާޑު ކިޔުންތަކަށް ވެސް ޓަޑެސްކޯ ވަނީ ރައްދު ދީފަ އެވެ. ޓަޑެސްކޯ ބުނީ ބެލްޖިއަމް އިން އަބަދު ވެސް ލުކާކޫ އަށް ފުރިހަމަ އަށް އިތުބާރު ކުރާނެ ކަމަށާއި، ބެލްޖިއަމް އެހެން ހަރުފަތަކަށް ގެންދެވޭނެ ކުޅުންތެރިޔަކީ ވެސް އޭނާ ކަމަށެވެ.

ޓަޑެސްކޯ ބުނި ގޮތުގައި މުބާރާތުން ކެޓުމަކީ އުނދަގޫވާ ކަމެކެވެ. އެހެން ނަމަވެސް، ޓީމާ މެދު ނުތަަނަވަސްކަމެއް ބާއްވަން ބޭނުން ނުވާ ކަމަށާއި، އަނެއްކާ ވެސް މަސައްކަތް ކުރާނީ އަލުން އަނބުރާ ކުރިއަށް ދާން ކަމަށް ވެސް އޭނާ ބުންޏެވެ.