ގާޒާގެ ޝުޖާޔާ ޑިސްޓްރިކްޓަށް އިޒްރޭލުގެ ޓޭންކް ތަކުން އަރައި، އެތަނުގެ ވަޒަންވެރިން އެ ސަރަހައްދުގައި ތާށިކޮށް، އާންމުން ދިރިއުޅޭ ގޯތި ގެދޮރު ވަށާލައިފިއެވެ.

ޝުޖާޔާގައި އިޒްރޭލް ސިފައިންނާ ހަމާސް އާ ދެމެދުން ގަދަޔަށް ހަނގުރާމަ ހިނގަމުންދާ ކަމަށް އަލްޖަޒީރާގެ ނޫސްވެރިން ބުނެފައިވެއެވެ. ޝުޖާޔާގައި ދިރިއުޅޭ އާންމުން އެތަނުގެ ހާލަތު ސިފަކުރަމުން ބުނެފައިވަނީ އެ މީހުން ދިރިއުޅެމުން ދަނީ ނަރަކަ އެއްގައި ކަމަށެވެ.

އަލްޖަޒީރާ އިން ހާމަ ކޮށްފައިވާ ގޮތުގައި، ގާޒާގައި ގޮވާ ތަކެތި ހުރި ތަންތަން ބަލައި ފާސް ކުރުމުގައި އިޒްރޭލު ސިފައިން އަންނަނީ އިޒްރޭލުން ހައްޔަރު ކޮށްގެން ގެންގުޅޭ ފަލަސްތީނު މީހުން އިންސާނީ އައްޑަނަ އެއްގެ ގޮތުގައި ބޭނުން ކުރަމުންނެވެ. އަލް ޖަޒީރާ އިން ބުނެފައިވަނީ ފަލަސްތީނު މީހުން އިންސާނީ އައްޑަނައިގެ ގޮތުގައި ބޭނުން ކުރާ ވީޑިއޯ ފުޓޭޖް ލިބިފައިވާ ކަމަށެވެ.

އަނެއްކޮޅުން ލުބްނާންގެ ބޯޑަރ ސަރަހައްދާ ކައިރި ހިސާބެއްގައި، ހިފާފައިވާ ގޯލާން ހައިޓްސް ގައި އިޒްރޭލް ސިފައިން ތިބި ތަނަކަށް އަމާޒުވި ޑްރޯން ހަމަލާއެއް ގައި އިޒްރޭލު ސިފައިންގެ 18 މީހުން ޒަޚަމްވި ކަމަށް އިޒްރޭލުގެ އަސްކަރިއްޔާ އާ ހަވާލާދީ އަލްޖަޒީރާ އިން ބުނެއެވެ. އެތަނުން އެކަކަށް ސީރިއަސް އަނިޔާތަކެއް ވަނީ ވެފައެވެ.

ހުސްވި އަހަރުގެ އޮކްޓޯބަރު 7 ވަނަ ދުވަހުން ފެށިގެން އިޒްރޭލުން ގާޒާ އަށް ދެމުންދާ އަނިޔާވެރި ހަމަލާ ތަކުގައި މިހާތަނަށް ފަލަސްތީނުގެ 37،877 މީހުން މަރުވެފައި ވެއެވެ. 86،969 މީހުން ވަނީ ޒަޚަމްވެފައެވެ. މި މުއްދަތުގައި ހަމާސްގެ ހަމަލާތަކުގައި އިޒްރޭލުން މަރުވެފައި ވަނީ 1،139 މީހުންނެވެ.