މި ސަރުކާރުގައި އިޤްތިސާދުގެ ސޯބު އެނބުރެނީ ނުއަތަށް: މައުރޫފް
30 ޖޫން 2024 | އާދީއްތަ 05:30މިހާރު ބޮޑެތި ގިނަ މަޝްރޫއުތަކެއް ހުއްޓިފައިވާކަމަށް ވިދާޅުވި
ކެންދޫ ދާއިރާގެ މެންބަރު މައުރޫފް ޒާކިރު
މި ސަރުކާރުގައި އިޤްތިސާދުގެ ސޯބު އެނބުރެނީ ނުވަތަށް ކަމަށް ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު މައުރޫފް ޒާކިރު ވިދާޅުވެއްޖެއެވެ.
ދައުލަތުގެ ދަރަންޏާ ބެހޭގޮތުން ސަރުކާރުން ހުށަހަޅާފައިވާ ބިލަށް ބަހުސް ކުރައްވަމުން މައުރޫފް ވިދާޅުވީ، މިހާރު ބޮޑެތި ގިނަ މަޝްރޫއުތަކެއް ހުއްޓިފައިވާ ކަމަށާއި، ގޯއްޗާއި ފްލެޓުގެ ހައްޤުވެރިންވެސް މަގުމަތިވެފައިވާ ކަމަށެވެ.
އޭގެ އިތުރުން، މިދިޔަ ސަރުކާރުގައި ފަށާފައިވާ ފެނާއި ނަރުދަމާގެ މަޝްރޫއުތައްވެސް ހުއްޓިފައިވާކަން މައުރޫފް ފާހަގަ ކުރެއްވިއެވެ.
މައުރޫފް ވިދާޅުވީ، މިދިޔަ ސަރުކާރުން ލޯނު ނަގާފައިވަނީ ޤައުމީ ތަރައްޤީގެ މަޝްރޫއުތައް ހިންގުމަށް ކަމަށެވެ.
ހަމައެއާއެކު، އާރްޓީއެލްގެ މަޝްރޫއަކީވެސް ރަނގަޅަށް ހިނގަމުން ދިޔަ މަޝްރޫއެއްކަން ފާހަގަ ކުރައްވައި މައުރޫފް ވަނީ މިއަދު އެކަންކަން އޭރު ހުރި ހިސާބުގައި ހުއްޓިފައިވާކަމަށް ވިދާޅުވެފައެވެ.
އޭގެ ބަދަލުގައި ސަރުކާރުން ހާލަތާ ނުބައްދަލު ފިޔަވަޅުތައް އަޅަމުންދާ ކަމަށާއި، ސަރުކާރުގެ ރިކަރަންޓު ޚަރަދު ބޮޑުވުމާއި، އިޤްތިސާދު މެނޭޖް ކުރުމުގައި ފެއިލްވުން ފަދަ އެތައް ކަންބޮޑުވުމެއް މިއަދު ހުރިކަމަށް މައުރޫފް ވިދާޅުވިއެވެ.
މައުރޫފް ވަނީ މި ސަރުކާރުން އިޤްތިސާދު މެނޭޖް ކުރާ ގޮތާމެދު ކަންބޮޑުވުން ފާޅު ކުރައްވާފައެވެ.
ރާއްޖޭގެ މާލީ ހަލާތާއި އިގްތިސާދީ ހާލަތު ދަށްވެފައިވަނީ އެމްޑީޕީގެ ސަރުކާރުން އަމަލުކުރި ގޮތުން ކަމަށް ބުނެ މި ސަރުކާރުން ދައްކަމުން އަންނަ ވާހަކަތަކުގެ ހަގީގަތް ހާމަކުރުމަށް ބޭއްވި ނޫސްވެރިންގެ ބައްދަލުމުގައި އެމްޑީޕީ ސަރުކާރުގެ ފިނޭންސް މިނިސްޓަރ އިބްރާހިމް އަމީރު ވަނީ ވެރިކަން ބަދަލުވިއިރު ރާއްޖޭގެ އިގްތިސާދު ދިޔައީ ބާރަށް ކުރިއަރަމުންކަން ފާހަގަ ކުރައްވައި އެކަމުގެ ތަފްސީލުތައް ހިއްސާ ކުރައްވާފައެވެ.
