އަމީރު ވަނީ ސަރުކާރު ހިންގުމުގައި 19 ވަނަ މަޖިލީހުން ބަޖެޓް ހަދާފައިވާ ގޮތުގެ ސަބަބުން ދަތިވާކަމަށް ސަރުކާރުން ބުނަމުންދާތީ އެކަމަށް ވެސް ރައްދުދެއްވާފަ
އެމްޑީޕީގެ އިކޮނޮމިކް ކޮމިޓީގެ ނޫސްވެރިންގެ ބައްދަލުވުން
މި ސަރުކާރުން ވެރިކަމަށް އައިސް ޢަމަލުކުރީ ރިކަރަންޓް ޚަރަދު ބޮޑުތަނުން އިތުރުވާ ގޮތަށް ކަަމަށާއި, ދެމެހެއްޓެނެވި ވިސްނުމެއް ނެތް ކަމަށް ކުރީގެ ފިނޭންސް މިިނިސްޓަރ އިބްރާހިމް އަމީރު ވިދާޅުވެއްޖެއެވެ.
ހޮނިހިރު ދުވަހު ބޭއްވި ނޫސްވެރިންގެ ބައްދަލުވުމެއްގައި އަމީރު ވަނީ މި ހަތް މަސް ދުވަހުގެ ތެރޭގައި ރާއްޖޭގެ އިޤްތިޞާދަށް ބޮޑެތި ބަދަލުތަކެއް އައިސްފައިވާކަން ފާހަގަކުރައްވާފައެވެ. އެގޮތުން ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވެރިކަމަށް ވަޑައިގަތުމަށް ފަހު މަސައްކަތް ކުރެއްވީ ސަރުކާރުގެ މަސައްކަތްތައް ފުޅާކުރުމަށް ކަމަށާއި އެކަން ކުރެއްވީ ވައުދު ފުއްދުމުގެ ނަމުގައި ކަމަށް އަމީރު ވިދާޅުވިއެވެ. ސަރުކާރުން އޭރުވެސް މަސައްކަތްކުރަމުން އައީ ދައުލަތުގެ ފުދުންތެރިކަމަށް ފަރުވާލެއް ބެހެއްޓުމަކާއި ނުލާ ކަމަށް އަމީރު ވަނީ ފާހަގަކުރައްވާފައެވެ. އެކަމުގެ ސަަބަބުން މާލީ ބޮޑެތި ގޮންޖެހުންތަކަކާއި ދިމާވި ކަމަށް އަމީރު ވަނީ ފާހަގަކުރައްވާފައެވެ.
މީގެ އިތުރުން ހަފްތާ 14އިގެ ނަމުގައި އެތަކެއް ވައުދުތަކެއް ވެގެން، އޮފީސްތަކުގެ ބަޖެޓްތަކުން އިތުރު ޚަރަދުތައް ކުރަމުން އައި ކަމަށް އަމީރު ވިދާޅުވިއެވެ. އެކަންކަން ކޮށްފައި ވަނީ އެ ވައުދުތައް ފުއްދުމަށް ބޭނުންވާ ބަޖެޓު ހުރިކަން ޔަޤީން ނުކޮށް، އެ މަސައްކަތްތަކުގެ ދެމެހެއްޓެނެވިކަން ޔަޤީންކުރުމަކާއި ނުލާ ކަމަށް ވެސް އަމީރު ވިދާޅުވިއެވެ. ހަމައެހެންމެ ރިކަރަންޓް ޚަރަދުތައް ވެސް ބޮޑުވަމުން ދިޔަ ކަމަށާއި، ބަޖެޓުން ބޭރުން ބޮޑެތި ޚަރަދުތަކެއް ކޮށްފައިވާ ކަމަށް އަމީރު ވަނީ ވިދާޅުވެފައެވެ. އަމީރު ވަނީ ސަރުކާރުން ރިކަރަންޓް ޚަރަދުތައް ބޮޑުވާ ގޮތަށް ކޮށްފައިވާ ބައެއް ކަންކަމުގެ ތަފްސީލް ހިއްސާކުރައްވާފައެވެ. އޭގެ ތެރޭގައި ބަޖެޓުން ބޭރުން ގިނަ ކަންތައްތަކެއް ކުރުން ހިމެނޭ ކަމަށް އަމީރު ވިދާޅުވިއެވެ. އަމީރު ވަނީ ސަރުކާރު ކުންފުނިތަކުގެ ޕޭރޯލް އަށް ބޮޑެތި ބަދަލުތަކެއް އައިސްފައިވާކަން ފާހަގަކުރައްވާފައެވެ.
އަމީރު ވަނީ ސަރުކާރު ހިންގުމުގައި 19 ވަނަ މަޖިލީހުން ބަޖެޓް ހަދާފައިވާ ގޮތުގެ ސަބަބުން ދަތިވާކަމަށް ސަރުކާރުން ބުނަމުންދާތީ އެކަމަށް ވެސް ރައްދުދެއްވާފައެވެ. އެހެންނަމަވެސް 2024 ވަނަ އަހަރުގެ ބަޖެޓާއި 2023 ވަނަ އަހަރުގެ ސަޕްލިމެންޓްރީ ބަޖެޓް ހެދުމުގައި ވެސް، ޓްރާންސިޝަން މަރުހަލާގައި މި ސަރުކާރުގެ ފަރާތްތަކުގެ ބައިވެރިވުން ފުރިހަމައަށް ހިމަނާފައިވާނެ ކަަމަށް އަމީރު ވިދާޅުވިއެވެ. އަދި ނިމިދިޔަ ސަރުކާރުގެ އިސްނެގުމަށް މި އަހަރު އާ މަޝްރޫއެއް ވެސް ހިމަނާފައި ނުވާނެ ކަމަށާއި އެ ފަދަ ހުރިހާ ކަމެެއް ކޮށްފައިވާނީ މި ސަރުކާރުން އެދުނު ގޮތަށް ކަމަށް އަމީރު ވިދާޅުވިއެވެ. ބަޖެޓުގައި ހިމަނާފައިވާނީ ޓްރާންސިޝަން ޕީރިއަޑުގައި މި ސަރުކާރުން ފޮނުވި ލިސްޓުގައި ހުރި ކަންކަން ކަމަށް އަމީރު ވަނީ ވިދާޅުވެފައެވެ.
