މާޗް މަހުގެ ދައުލަތުގެ ޚަރަދުތައް 115.3 މިލިއަން ރުފިޔާ އިތުރުވެއްޖެ

މި އަހަރުގެ މާޗް މަހު ދައުލަތުން ކުރި ޖުމްލަ ޚަރަދު، ކުރީ އަހަރުގެ މާޗް މަހު ކުރި ޚަރަދަށް ވުރެ 115.3 މިލިއަން ރުފިޔާ އިތުރު ވެފައި ވާކަން ހާމަވެއްޖެއެވެ.

ރާއްޖޭގެ މަރުކަޒީ ބޭންކް (އެމްއެމްއޭ) އިން ޝާއިއު ކޮށްފައިވާ ޖޫން މަހުގެ "އިކޮނޮމިކް އަޕްޑޭޓް" ގައި ބުނެފައިވަނީ އެއީ 3% ގެ އިތުރުވުމެއް ކަމަށެވެ.

އެމްއެމްއޭ އިން ބުނެފައިވަނީ އިތުރުވެގެން ދިޔައީ ރިކަރެންޓް ޚަރަދު ތައް ކަމަށެވެ.

މިއަހަރުގެ މާޗް މަހު ރިކަރަންޓް ޚަރަދުތަކުގެ ގޮތުގައި ޚަރަދު ކުރި މިންވަރު 559.8 މިލިއަން ރުފިޔާ އަށް އަރާފައިވާ ކަމަށް އެމްއެމްއޭ އިން ބުނެފައިވެއެވެ.

ދައުލަތުގެ ޖުމްލަ ޚަރަދުތައް ބޮޑުވިއިރު އެމްއެމްއޭ އިން ބުނެފައިވަނީ 2023 ވަނަ އަހަރުގެ މާޗް މަހު ކޮށްފައިވާ ކެޕިޓަލް ޚަރަދުތަކާ އަޅާ ބަލާއިރު، 2024 ވަނަ އަހަރުގެ މާޗް މަހުގެ ކެޕިޓަލް ޚަރަދު ތައް 444.5 މިލިއަން ރުފިޔާ ދަށަށް ގޮސްފައިވާ ކަމަށެވެ.

އަނެއްކޮޅުން އެމްއެމްއޭ އިން ބުނެފައިވަނީ ދައުލަތައް މާޗް މަހު ލިބުނު ޖުމްލަ އާމްދަނީ ކުރީ އަހަރުގެ މާޗް މަހާ އަޅާ ބަލާއިރު 560.3 މިލިއަން ރުފިޔާ މައްޗަށް ގޮސްފައިވާ ކަމަށެވެ. އާމްދަނީ 20 އިން ސައްތައިގެ ކުރިއެރުމެއް ލިބުނު އިރު އެއީ ޓެކްސްގެ ގޮތުގައި ދެއްކި ފައިސާ އިތުރު ވުމުން ކަމަށް އެމްއެމްއޭ އިން ބުނެއެވެ.

އެމްއެމްއޭ އިން އާއްމު ކޮށްފައިވާ ހިސާބުތަކުން އެނގޭ ގޮތުގައި، މާޗް މަހު ޓެކްސްގެ ގޮތުގައި ލިބުނު ފައިސާ 671.1 މިލިއަން ރުފިޔާ އަށް މައްޗަށް ގޮސްފައިވެއެވެ. އެހެން ނަމަސްވެސް ޓެކްސް ނޫން ގޮތުގައި ލިބުނު ފައިސާ ވަނީ 117.1 މިލިއަން ރުފިޔާ ދަށަށް ގޮސްފައެވެ.