ރާއްޖޭގެ ޚާރިޖީ ވަޒީރު ޒަމީރު އެމެރިކާގެ ޚާރިޖީ ވަޒީރު ބްލިންކަން އާ ބައްދަލު ކުރައްވައިފި

ރާއްޖޭގެ ޚާރިޖީ ވަޒީރު މޫސާ ޒަމީރު އެމެރިކާގެ ޚާރިޖީ ވަޒީރު އެންތަނީ ބްލިންކަން އާ ބުދަ ދުވަހު ވޮޝިންގޓަން ގައި ބައްދަލު ކުރައްވައިފިއެވެ.

މި ބައްދަލު ކުރެއްވުމާ ބެހޭ ގޮތުން އެމެރިކާގެ ޚާރިޖީ ވަޒީރު ބްލިންކަން "އެކްސް" ގައި ވިދާޅުވެފައިވަނީ، އެމެރިކާ އާއި ރާއްޖެ އާ ދެމެދުގެ މޫސުމަށް އަންނަ ބަދަލުތަކާ ބެހޭ ގޮތުންނާއި، އިގްތިސާދީ ތަރައްގީ އާއި ކަނޑުމަތީ ސަލާމަތާ ބެހޭ ދާއިރާ ތަކުން ގުޅުން ބަދަހި ކުރުމާ ބެހޭ ގޮތުން ރާއްޖޭގެ ޚާރިޖީ ވަޒީރާ މަޝްވަރާ ކުރެއްވި ކަމަށެވެ.

Advertisement

އެމެރިކާ އަށް ރާއްޖޭގެ ޚާރިޖީ ވަޒީރު ޒަމީރު ދަތުރުފުޅެއް ކުރައްވާ މި ދަނޑިވަޅަކީ އިޒްރޭލުން ގާޒާގެ ފަލަސްތީން ރައްޔިތުންނަށް ލާއިންސާނީ ބޮޑެތި އަނިޔާތަކެއް ދެމުންދާ ދަނޑިވަޅެއް ކަމަށް ވާއިރު މިކަމުގައި ދިވެހި ރައްޔިތުންގެ ކަންބޮޑުވުން އިޒްރޭލުގެ އެންމެ ގާތް އެކުވެރިޔާ އެމެރިކާ އަށް ހުށަހަޅާނެ ކަމަށް ރާއްޖޭގެ ގިނަ ބަޔަކު އުއްމީދު ކުރި ނަމަވެސް އެފަދަ ވާހަކަތަކެއް ދެކެވުނު ކަމަކަށް ބްލިންކަން ވިދާޅުވެފައި ނެތްކަން ފާހަގަ ކުރެވެއެވެ.

އަނެއްކޮޅުން ރާއްޖެ އާއި އެމެރިކާގެ ޚާރިޖީ ވަޒީރުން މި ބައްދަލު ކުރެއްވީ، ރާއްޖެއިން އިޒްރޭލު ޕާސްޕޯޓް މަނާ ކުރުމަށް ސަރުކާރުން ނިންމި ކަން އިއުލާން ކުރުމާ ގުޅިގެން އެކަން ހުއްޓުވުމުގެ ގޮތުން ރާއްޖެއަށް ދޭ އެމެރިކާގެ އެހީ ހުއްޓުވުމަށް އެމެރިކާގެ ކޮންގްރެސް އަށް ބިލެއް ހުށަހެޅުމަށް ރިޕަބްލިކަން ޕާޓީގެ ޖޯޝް ގޮތެމިއަރ މަސައްކަތް ކުރަމުންދާ ކަމަށް މީޑިއާގައި ހާމަވެފައިވާ ދަނޑިވަޅެއްގައެވެ.

ޒަމީރު އެމެރިކާ އަށް ކުރައްވާ ދަތުރުފުޅުގައި ޔޫއެސް އެއިޑްގެ އެޑްމިނިސްޓްރޭޓަރ ސަމަންތާ ޕަވަރ އާ ވަނީ އަންގާރަ ދުވަހު ބައްދަލު ކުރައްވާފައެވެ. މި ބައްދަލު ކުރެއްވުމަށް ފަހު ޒަމީރު "އެކްސް" ގައި ވިދާޅުވެފައިވަނީ ރާއްޖޭގެ ތަރައްގީއަށް ޔޫއެސްއެއިޑް އިން ވެދޭ އެހީތެރިކަމަށް ޝުކުރު އަދާ ކުރެއްވި ކަމަށެވެ. އަދި ޔޫއެސްއެއިޑް އާ ރާއްޖެއާ އޮންނަ ގުޅުން ބަދަހި ކުރައްވާ އިތުރަށް ފުޅާ ކުރައްވާނެ ކަމުގެ ޔަގީންކަން އޭނާ އަށް ޒަމީރު ދެއްވި ކަމަށްވެސް ވިދާޅުވެފައިވެއެވެ.

ޒަމީރު މި ދަތުރުފުޅުގައި އެމެރިކާއަށް ވަޑައިގަތީ ޖޫން މަހުގެ 24 ވަނަ ދުވަހުއެވެ.