ލޫކާކުގެ ދެ ލަނޑުން ބެލްޖިއަމް އަށް ފުރިހަމަ މޮޅެއް

ބައިނަލްއަޤުވާމީ ރަޙުމަތްތެރިކަމުގައި ލަގްޒަމްބާގާ ދެކޮޅަށް ކުޅުނު މެޗުން ބެލްޖިއަމް ފުރިހަމަ މޮޅެއް ހޯދައިފި އެވެ.

މި މަހު ޖަރުމަނުގައި ފަށާ ޔޫރޯ ފުޓުބޯޅަ މުބާރާތަށް ތައްޔާރުވުމުގެ ގޮތުން ބެލްޖިއަމް އިން ކުޅުނު ދެ ވަނަ މެޗު ކާމިޔާބު ކުރީ 3-0 އިންނެވެ. މެޗުގައި ބެލްޖިއަމްގެ ރޮމެލޫ ލޫކާކޫ ވަނީ ދެ ލަނޑު ޖަހައިފަ އެވެ.

މެޗުގެ ފުރަތަމަ ހާފުގެ 43 ވަނަ މިނެޓުގައި ބެލްޖިއަމަށް ލީޑު ނަގައިދިނީ ލުކާކޫ އެވެ. އެއީ އެ ޓީމަށް ލިބުނު ޕެނަލްޓީއެއް ކާމިޔާބު ކޮށްގެން ލުކާކޫ ޖެހި ލަނޑެކެވެ. އަނެއް ދެ ލަނޑު އެ ޓީމުން ޖެހީ ދެ ވަނަ ހާފުގަ އެވެ. ދެ ވަނަ ހާފު ފަށައިގެން 12 ވަނަ މިނެޓުގައި ލުކާކޫ ވަނީ ބެލްޖިއަމްގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. މެޗުގައި ބެލްޖިއަމްގެ ތިން ވަނަ ލަނޑު، ލިއާންޑްރޯ ޓްރޮސާޑް ޖެހީ މެޗުގެ 80 ވަނަ މިނެޓުގަ އެވެ.

ޔޫރޯ މުބާރާތުގައި ބެލްޖިއަމް އޮތީ ގްރޫޕް އީގަ އެވެ. އެ ގްރޫޕްގައި ބެލްޖިއަމްގެ އިތުރުން ދެން އޮތް ތިން ޓީމަކީ، ސްލޮވާކިއާ، ރޮމާނިއޯ، އަދި ޔޫކްރެއިންނެވެ. ފުރަތަމަ މެޗުގައި ބެލްޖިއަމް ނިކުންނާނީ ސްލޮވާކިއާއާ ދެކޮޅަށެވެ.