ރާއްޖެއަކީ ޓެކްނޮލޮޖީއަށް ހަރަދު ކުރުމުގައި ނަމޫނާ ގައުމެއް، ނަމަވެސް އެ ބޭނުންކުރުމުގައި އުޅެނީ ވަރަށް ފަހަތުގައި: މިނިސްޓަރު އިހުސާން
ރައްޔިތުން ވެސް ޓެކްނޮލޮޖީއަށް ހޭލުންތެރިކުރުވަންޖެހޭ
މިނިސްޓަރ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީ، އަލީ އިހްސާން
ދިވެހިރާއްޖެއަކީ ޓެކްނޮލޮޖީއަށް ހަރަދު ކުރުމުގައި ނަމޫނާ ގައުމެއް ކަމަށާއި، ނަމަވެސް ޓެކްނޮލޮޖީ ބޭނުންކުރުމުގައި އުޅެނީ ވަރަށް ފަހަތުގައި ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެއެވެ.
ފުލުހުންގެ ޚިދުމަތުގެ ކުރިއަށް އޮތް ފަސް އަހަރުގެ ސްޓްރެޓެޖިކް ޕްލޭން އިފްތިތާހު ކުރި ރަސްމިއްޔާތުގައި ވާހަކަ ދައްކަވަމުން މިނިސްޓަރު އިހުސާން ވިދާޅުވީ ޓެކްނޮލޮޖީގެ ޒަރިއްޔާއިން މުޅި ދުނިޔެ ކުރިއަރައިގެން ދާއިރު، ރާއްޖެއިން ވެސް އެޓެކްނޮލޮޖީއާއެކު މަސައްކަތް ކުރަން ދަސްކުރުމަކީ ވަރަށް މުހިންމު ކަމެއް ކަމަށެވެ. ހާއްސަކޮށް ފުލުހުންގެ މުއައްސަސާއިން އެގޮތަށް މަސައްކަތް ކުރަންޖެހޭ ކަމަށް މިނިސްޓަރު އިހުސާން ވިދާޅުވިއެވެ.
ރާއްޖެއަކީ ޓެކްނޮލޮޖީއަށް ހަރަދު ކުރުމުގައި ނަމޫނާ ގައުމެއްކަން ފާހަގަކުރައްވައި މިނިސްޓަރު އިހުސާން ވިދާޅުވީ ޓެކްނޮލޮޖީ ބޭނުންކުރުމުގައި އުޅެނީ ވަރަށް ފަހަތުގައި ކަމަށެވެ. އެގޮތުން ފުލުހުންގެ އެޕްލިކޭޝަނެއް ގާއިމްކޮށްފައިވާއިރު، އެޑައުންލޯޑްކޮށްގެން ބޭނުންކުރަނީ ވަރަށް މަދު ބައެއް ކަމަށް މިނިސްޓަރު އިހުސާން ވިދާޅުވިއެވެ.
މިނިސްޓަރު އިހުސާން ވިދާޅުވީ ރައްޔިތުން ވެސް ޓެކްނޮލޮޖީއަށް ހޭލުންތެރި ކުރުވަންޖެހޭ ކަމަށެވެ. އެހެންނޫން ކަމަށްވާނަމަ ބޭނުންވާ ނަތީޖާ ހާސިލް ނުކުރެވޭނެ ކަމަށް މިނިސްޓަރު އިހުސާން ވިދާޅުވިއެވެ.
މިނިސްޓަރު އިހުސާން ވިދާޅުވީ ފުލުހުންގެ ޚިދުމަތުން ހުރިހާ ރައްޔިތުންނަށް ތަފާތު ކުރުމެއްނެތި ޚިދުމަތް ދޭން ޖެހޭ ކަމަށެވެ. ގާނޫނަށް ފުށޫއަރާ ހިނދު މީހެއްގެ މަގާމަށް ބަލަން ނުޖެހޭ ކަމަށާއި، ގާނޫނު ތަންފީޒު ކުރަންޖެހޭ ކަމަށް މިނިސްޓަރު އިހުސާން ވިދާޅުވިއެވެ. އަދި ވިދާޅުވީ އަހަރެއްގެ މައްޗަށް 2 ބިލިއަން ރުފިޔާ ފުލުހުންގެ މުއައްސަސާއަށް ހޭދަކުރާ ކަމަށާއި، އެއީ ދައުލަތަށް ލިބޭ ކޮންމެ 100 ރުފިޔާއަކުން 4 ރުފިޔާ ކަމަށެވެ. އެހެންކަމުން ދައުލަތާއި، ރައްޔިތުންގެ ވަރަށް ބޮޑު އުންމީދުތަކެއްވާނެ ކަމަށާއި، ނަތީޖާ ނެރެންޖެހޭ ކަމަށް މިނިސްޓަރު އިހުސާން ވިދާޅުވިއެވެ.
