އިޒްރޭލް ޕާސްޕޯޓްގައި އެތެރެވުން ހުއްޓުވުން - މަޖިލީހުގައި ބިލެއް އޮއްވާ އަނެއްކާ ވެސް ގާނޫނު އިސްލާހު ކުރަން ސަރުކާރުން ނިންމައިފި
ފަލަސްތީނާއިއެކު ދިވެހިން މި ނަމުގައި މުޅި ރާއްޖޭގައި ހިނގާލުމެއް ބޭއްވުމަށް ވަނީ ނިންމާފައި
ރައީސް އޮފީހުގައި ބޭއްވެވި ނޫސްވެރިންގެ ބައްދަލުވުމުގައި މިނިސްޓަރ އޮފް ހޯމްލޭންޑް ސެކިއުރިޓީ އެންޑް ޓެކްނޯލޮޖީ އަލީ އިހްސާނު ވާހަކަދައްކަވަނީ
އިޒްރޭލްގެ ޕާސްޕޯޓުގައި ރާއްޖެއަށް އެތެރެވުން ހުއްޓުވުމަށް ގާނޫނު އިސްލާހު ކުރަން ސަރުކާރުން ނިންމައިފިއެވެ.
ސަރުކާރުގެ މި ނިންމެވުން އިއުލާންކުރެއްވީ އާދިއްތަ ދުވަހު ރައީސް އޮފީހުގައި ބޭއްވެވި ނޫސްވެރިންގެ ބައްދަލުވުމުގައި މިނިސްޓަރ އޮފް ހޯމްލޭންޑް ސެކިއުރިޓީ އެންޑް ޓެކްނޯލޮޖީ އަލީ އިހްސާނެވެ. މިއީ އިޒްރޭލްގެ ޕާސްޕޯޓު ރާއްޖެ އަށް މަނާކުރުމާ ގުޅޭ ކަމެއްގައި ކެބިނެޓުން ގޮތްތަކެއް ނިންމި ފުރަތަމަ ފަހަރެވެ.
އިޒްރޭލްގެ ޕާސްޕޯޓުގައި ރާއްޖެ އެތެރެވުން ހުއްޓުވުމަށް ގާނޫނުތަކަށް ގެންނަންޖެހޭ އިސްލާހުތައް ގެނައުމަށް ވަޒީރުންގެ މަޖިލީހުން ނިންމެވުމުން، މިކަން ކުރިއަށް ގެންދިއުމަށް ވަނީ ވަޒީރުންގެ މަޖިލީހުގެ ކޮމިޓީއެއް އެކުލަވާލެއްވުމަށް ވެސް ނިންމަވާފައެވެ.
ނޫސްވެރިންގެ ބައްދަލުވުމުގައި މިނިސްޓަރު އިހުސާން ވިދާޅުވީ ފަލަސްތީނާއި އިޒްރޭލްގެ މައްސަލައިގައި، ރާއްޖެއިން އިސްކަންދިނުމަށާއި ކޮށްދިނުމަށް ފަލަސްތީނުން އެދޭކަންކަން ދެނެގަތުމަށް، ރައީސް ސްޕެޝިއަލް އެންވޯއީއެއް ކަނޑައަޅުއްވަން ނިންމެވުން ހިމެނޭ ކަމަށެވެ.
ޔޫ.އެން ރިލީފް އެންޑް ވޯރކްސް އެޖެންސީ މެދުވެރިކޮށް ފަލަސްތީނުގެ ހާލުގައި ޖެހިފައިވާ އަޚުންނާއި އުޚްތުންނަށް އެހީތެރިކަން ފޯރުކޮށްދިނުމަށް ރާއްޖޭގައި ފަންޑްރައިޒް ކުރުމަށް ހަރަކާތްތަކެއް ހިންގުމަށް ނިންމެވުމާއި "ފަލަސްތީނާއިއެކު ދިވެހިން" މި ނަމުގައި މުޅި ރާއްޖޭގައި ހިނގާލުމެއް ބޭއްވުމަށް ވެސް ނިންމާފައިވާ ކަމަށް މިނިސްޓަރު އިހުސާން ވިދާޅުވިއެވެ.
މީގެ އިތުރުން އިޒްރޭލް ޕާސްޕޯޓުގައި ރާއްޖެ އެތެރެވުން މަނާކުރުމަށް އިމިގްރޭޝަން ގާނޫނަށް އިސްލާހު ގެންނަ ބިލެއް މަޖިލީހަށް ހުށަހަޅާފައިވާތީ އެ ބިލަށް ސަރުކާރުން ތައީދުކުރާނެތޯ ނޫސްވެރިއަކު ކުރި ސުވާލަށް މިނިސްޓަރު އިހުސާން ވިދާޅުވީ ދިރާސާ ކުރުމަށްފަހު ގޮތް ނިންމާނެ ކަމަށާއި، މަޖިލީހުގެ ނިންމުން ނިންމޭނީ ވަކި ގޮތަކަށްކަން ދަންނަވަން ނޭނގޭ ކަމަށެވެ. އަދި ވަގުތުން އިޒްރޭލްގެ ޕާސްޕޯޓު މަނާ ނުކުރަނީ ކީއްވެތޯ ކުރި ސުވާލަށް މިނިސްޓަރު އިހުސާން ވިދާޅުވީ ރާއްޖޭގެ ގާނޫނުތައް އޮތްގޮތުން ގާނޫނަށް އިސްލާހުތައް ގެނެސްގެން މި މަސައްކަތް ކުރުމަށް އެޓާނީ ޖެނަރަލް ލަފާ ދެއްވާފައިވާ ކަމަށެވެ.
މިނިސްޓަރު އިހުސާން ވިދާޅުވީ އިޒްރޭލް ޕާސްޕޯޓު މަނާކުރުމަށް ކުރަންޖެހޭ މަސައްކަތްތައް ފަށާފައިވާ ކަމަށެވެ. މަނާ ކުރެވޭނެ ވަކި ދުވަހެއް ނޭނގުނު ނަމަވެސް ވަރަށް އަވަހަށް މަނާކުރެވޭނެ ކަމަށާއި، މާގިނަ ދުވަސް ނަގާނެ ކަމަށް ގަބޫލުނުކުރާ ކަމަށް މިނިސްޓަރު އިހުސާން ވިދާޅުވިއެވެ.
އިޒްރޭލް ޕާސްޕޯޓް މަނާކުރަން ގާނޫނު އިސްލާހުކުރަން ސަރުކާރުން ނިންމާފައިވާއިރު، އިޒްރޭލް ޕާސްޕޯޓް މަނާކުރުމަށް ގޮވާލާ ރައީސް އޮފީސް ކައިރީގައި އެއްވުމެއް ވަނީ ބާއްވާފައެވެ. ޕާސްޕޯޓު މަނާނުރާތީ ގިނަ ބައެއްގެ ފާޑުކިޔުން ވެސް ސަރުކާރަށް ވަނީ އަމާޒުވެފައެވެ.
