މިސަރުކާރަށް ހަމަސް ވެގެން ދިޔައިރު، ވަޒީފާތަކަށް މީހުން ނެގުން ފިޔަވައި އެއްވެސް ކަމެއް ކުރެވިފައިނުވޭ: މެންބަރު ޒިޔާދު
ބަޖެޓުގައި ކުރުމަށް ނިންމާފައިވާ ހުރިހާ މަޝްރޫއެއް ވެސް ފަށާނެ ކަމަށް ސަރުކާރުން ބުނަމުންދަނީ ހަތަރުވަނަ ކުއާޓަރުގައި
ފަލަސުރުހީ ޕްރޮގްރާމްގައި ރައްޔިތުން މަޖިލީހުގެ ވައިކަރަދޫ ދާއިރާގެ މެންބަރު ހުސައިން ޒިޔާދު ވާހަކަދައްކަވަނީ
މިސަރުކާރަށް ހަމަވެސް ވެގެން ދިޔައިރު ވެސް ވަޒީފާތަކަށް މީހުން ނެގުން ފިޔަވައި އެއްވެސް މަސައްކަތެއް ކުރެވިފައިނުވާ ކަމަށް ރައްޔިތުން މަޖިލީހުގެ ވައިކަރަދޫ ދާއިރާގެ މެންބަރު ހުސައިން ޒިޔާދު ވިދާޅުވެއްޖެއެވެ.
ރާއްޖެޓީވީގައި ވާހަހަކަދައްކަވަމުން މެންބަރު ޒިޔާދު ވިދާޅުވީ ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ މިސަރުކާރުގައި ވަރަށް ބާރަށް ކަންކަން ފައްޓާވާ ކަމަށާއި، އެއްވެސް ރަނގަޅު ނަތީޖާއެއް ނުނިކުންނަ ކަމަށެވެ. ފެއްޓި ބައެއް ކަމަށް އަލިއަޅުއްވާލައްވާ މެންބަރު ޒިޔާދު ވިދާޅުވީ ކަނޑު ހޯދުމާއި، ފުށިދިއްގަރުފަޅުގެ މަޝްރޫއު ފެއްޓުން ފަދަ ކަންކަން ހިމެނޭ ކަަމަށެވެ. ބައެއް ކުރީ ސަރުކާރުގައި ނިންމާފައިވާ ބައެއް މަސައްކަތްތަކާއި، މަޝްރޫއުތައް ރަސްމީކޮށް ހުޅުވުމުގެ ރަސްމިއްޔާތުތައް ބާއްވާ ކަމަށެވެ. އެގޮތުން ހުޅުމާލެ ފޭސް-1 އަދި ފޭސް-2 ގެ ބްރިޖު ރަސްމީކޮށް ހުޅުވުމަށް ބޭއްވި ރަސްމިއްޔާތު މެންބަރު ޒިޔާދު ފާހަގަކުރެއްވިއެވެ.
ބަޖެޓުގައި ހިމަނާފައިވާ މަޝްރޫއުތައް ކުރިއަށް ނުގެންދާތީ ކަންބޮޑުވުންފާޅުކޮށް މެންބަރު ޒިޔާދު ވިދާޅުވީ މިއަހަރުގެ ބަޖެޓުގައި ކުރުމަށް ނިންމާފައިވާ ހުރިހާ މަޝްރޫއެއް ވެސް ފަށާނެ ކަމަށް ސަރުކާރުން ބުނަމުންދަނީ ހަތަރުވަނަ ކުއާޓަރުގައި ކަމަށެވެ. އެއީ މިއަހަރު ނިމޭ ހިސާބު ކަމަށް މެންބަރު ޒިޔާދު ވިދާޅުވިއެވެ.
މީގެ އިތުރުން މެންބަރު ޒިޔާދު ވިދާޅުވީ އެއްވެސް މަޝްރޫއެއް ކުރިއަށް ނުގެންދިޔަ ނަމަވެސް މިސަރުކާރުގައި ސިޔާސީ މަގާމުތަކަށް މީހުން ނެގުމާއި ވަކިކުރުން ކުރިއަށް ގެންދާ ކަމަށެވެ. ސަރުކާރަށް ހަމަސް ވެގެން ދިޔައިރު ވަޒީފާތަކަށް މީހުން ނެގުން މަދުނުވާ ކަމަށާއި، އެމަސައްކަތް ކުރިއަށް ގެންދަނީ ދައުލަތުގައި ވަރަށް ރުފިޔާ ހުރުމުން ކަމަށެވެ.
މެންބަރު ޒިޔާދު ވިދާޅުވީ އަތޮޅުތެރޭގެ ތަރައްގީގެ މަޝްރޫއުތައް ކުރިއަށް ގެންދިއުމުގައި މިސަރުކާރު އުޒުރު ދައްކަމުންދާ ކަމަށެވެ. ނަމަވެސް މިސަރުކާރަށް ބަޖެޓާއި، ރައްޔިތުންގެ މަޖިލީހުގެ މެޖޯރިޓީ ވެސް ލިބިފައިވާ ކަމަށް އޭނާ ވިދާޅުވިއެވެ.
މެންބަރު ޒިޔާދު ވިދާޅުވީ މީގެކުރިން މަޖިލީހުގެ ސަބަބުން މަސައްކަތް ނުކުރޭ ކަމަށް ސަރުކާރުގެ ބޭފުޅުން ތުހުމަތު ކުރި ކަމަށެވެ. އަދި މިއަދު ބަޖެޓު ނެތް ކަމަށް އެބޭފުޅުން ވިދާޅުވި ނަމަވެސް އެކަން ރައްޔިތުން ގަބޫލުނުކުރާނެ ކަމަށެވެ. އެއީ 20 ވަނަ ރައްޔިތުންގެ މަޖިލީހުގެ އިންތިޚާބާ ގުޅިގެން ރަށްރަށުގެ ފެނަކަ އޮފީސްތަކާއި، އަދިވެސް ސަރުކާރު ހިއްސާ އޮންނަ ކުންފުނިތަކުން ޖާގަ ނެތް ނަމަވެސް ގިނަ ބަޔަކަށް ވަޒީފާ ދިފައިވާތީ ކަމަށް މެންބަރު ޒިޔާދު ވިދާޅުވިއެވެ. އަދި ވިދާޅުވީ ވަޒީފާ ދިނުން ގޯސްނޫން ކަމަށާއި، ގޯސްވަނީ މަޝްރޫއުތައް ކުރިއަށް ނުގެންދާތީ ކަމަށެވެ.
