މަޝްރޫޢުތައް ހިންގަން ބޭނުންވާ ފައިސާ ނެތް ކަމަށް ބުނެ، ބަޖެޓް ކޯޑަށް ބަދަލުގެންނަނީ

މަޝްރޫއުތައް ހިންގަން ބޭނުންވާ ފައިސާ ނެތް ކަމަށް ބުނެ، ބަޖެޓް ކޯޑަށް ބަދަލުގެންނަން ރައީސް ޑރ.މުހައްމަދު މުއިއްޒުގެ ސަރުކާރުން ނިންމައިފިއެވެ.

ބުރާސްފަތި ދުވަހު ކޮންސްޓްރަކްޝަން އެންޑް ޕްލޭނިން މިނިސްޓަރު ޑރ. އަބްދުﷲ މުއްތަލިބު ވަނީ މަޝްރޫޢުތައް ހުއްޓިފައި ހުންނަ ސަބަބުތަކަށް އަލިއަޅުވާލައްވާފައެވެ. އެގޮތުން ބަޖެޓްގައި މަޝްރޫޢުތަކަށް ބޭނުންވާ މިންވަރަށް ފައިސާ ހިމަނާފައި ނެތް ކަަމަށް އެ މަނިކުފާނު ވިދާޅުވިއެވެ. މިއީ މީގެ ކުރިން ވެސް ސަރުކާރުން އެކި ޕްލެޓްފޯމްތަކުގައި ބުނަމުން އައި ވާހަކައެކެވެ. ސަރުކާރުން އެހެން ބުނި ނަމަވެސް އާއްމުކޮށް މަޝްރޫޢޫތައް ހިންގަނީ ބަޖެޓްގައި ހިމަނާ މިންވަރަށް ބަހާލައިގެންނެވެ. އަދި ސަރުކާރުން އެކަން އޮޅުވާލަމުންދާ ކަމަށް މި އަހަރުގެ ބަޖެޓް އެކުލަވާލުމުގެ މަސައްކަތް ކުރި 19 ވަނަ މަޖިލީހުގެ މެމްބަރުން އައީ ބުނަމުންނެވެ. މަޝްރޫޢުތައް ކުރިއަށް ނުގެންދެވީ ބަޖެޓް އޮތް ގޮތުން ކަަމަށް ސަރުކާރުން ބުނި ނަމަވެސް މި އަހަރުގެ ބަޖެޓް އެކުލަވާލީ މި ސަރުކާރުން ބޭނުންވި ކަންކަން ހިމަނައިގެންނެވެ. ސަރުކާރުން ބޭނުންވި ކަމަކަށް ބަޖެޓްގައި ހިމަނާފައި ނުވަނީ ރަސްމާލެ މަޝްރޫޢު އެކަންޏެވެ. ނަމަވެސް ހިނގަމުން އައި ގިނަ މަޝްރޫޢުތައް ހުއްޓާލުމަށް ފަހު ސަރުކާރުން ބުނަމުން ދަނީ އެ މަޝްރޫޢުތައް ކުރިއަށް ނުގެންދެވެނީ ބަޖެޓް ނެތިގެން ކަމަށެވެ. ބުރާސްފަތި ދުވަހުގެ ނޫސްވެރިންގެ ބައްދަލުވުމުގައި، ބަޖެޓް ކޯޑަށް ބަދަލުގެނެސްގެން މަޝްރޫޢުތައް ކުރިއަށް ގެންދިއުމަށް ނިންމާފަިއވާ ކަމަށް މިނިސްޓަރ ވަނީ ވިދާޅުވެފައެވެ.

Advertisement

މިނިސްޓަރ އިތުރަށް ވިދާޅުވީ 2025 ވަނަ އަހަރުގެ ބަޖެޓް ހެދުމުގެ ކަންކަން މިހާރު ކުރިއަށް ދާ ކަމަށެވެ. އެގޮތުން އަންނަ އަހަރަށް ލަފާކުރާ ބަޖެޓުގައި އެންމެ ބޮޑު އިސްކަމެއް ދޭނީ ގެދޮވެރިކަމުގެ މަޝްރޫއުތަކަށް ކަމަށް މިނިސްޓަރ ވަނީ ވިދާޅުވެފައެވެ. އެގޮތުން ބަޖެޓުން ފައިނޭންސް ކުރާ މަޝްރޫއުތަކާއި ޑޯނާ ފަންޑިން މަޝްރޫއުތަކާއި ލޯނުގެ ދަށުން ހިންގާ މަޝްރޫއުތައް ހިމެނޭ ކަމަށް މިނިސްޓަރ ވަނީ ވިދާޅުވެފައެވެ. މިނިސްޓަރ ވަނީ ހިނގަމުންދާ މަޝްރޫއުތައް ކުރިއަށް ގެންދިއުމަށާއި ރައީސް ޑރ.މުއިއްޒުގެ ވައުދުތައް ފުއްދުމުގެ މަސައްކަތްތަށް ބޭނުންވާ ފައިސާ ބަޖެޓުގައި ހިމަނާނެ ކަމަށް އެމަނިކުފާނު ވަނީ ވިދާޅުވެފައެވެ.