ވިއެޓްނާމްގެ ޕާލިމެންޓުން އެ ގައުމުގެ ރައީސް ކަމަށް ޕަބްލިކް ސެކިއުރިޓީ މިނިސްޓަރ ޓޫ ލަމް އިންތިޚާބު ކޮށްފިއެވެ.
ޓޫ ލަމް ވިއެޓްނާމްގެ ރައީސް ކަމަށް އިސްކުރީ ކުރިން ހުންނެވި ރައީސް ވޯ ވަން ތުއޯންގ ގެ މައްޗަށް ކުރެވިފައިވާ ކަރަޕްޝަންގެ ތަހުގީގު ތަކުގެ ސަބަބުން މާޗު މަހު މަގާމު ދޫކޮށްލައްވަން މަޖުބޫރު ވެވަޑައިގަތުމުން ކަމަށް މީޑިއާ ރިޕޯޓްތައް ބުނެއެވެ.
ވިއެޓްނާމްގައި އޮންނަ އެއް ޕާޓީ ނިޒާމުގެ ދަށުން ވެރިކަން ކުރާ ކޮމިއުނިސްޓް ޕާޓީން ހުސްވި ހަފްތާގައި ނޭޝަނަލް އެސެމްބްލީގެ ސިއްރު ވޯޓަކަށް ހުށަހަޅާފައިވަނީ ހަމަ އެކަނި ލަމް ގެ ނަންފުޅެވެ.
ވިއެޓްނާމްގެ ރަބަރ ސްޓޭމްޕް ޕާލިމެންޓުން އޭނާގެ ނަންފުޅު ފާސްވީ މުޅި މަޖިލީހުގެ އިއްތިފާގުންނެވެ.
ވިއެޓްނާމުގައި ރައީސްގެ މަގާމަކީ މައިގަނޑު ގޮތެއްގައި ރަމްޒީ މަގާމެކެވެ. އެހެން ނަމަވެސް ގައުމުގެ އެންމެ އިސް ސިޔާސީ 4 މަގާމުގެ ތެރޭގައި ރައީސްގެ މަގާމުވެސް ހިމެނެއެވެ. އެ ހަތަރު މަގާމަކީ ރައީސްގެ އިތުރުން، ވެރިކަން ކުރާ ޕާޓީގެ ވެރިޔާ އާއި، ބޮޑު ވަޒީރާއި ގާނޫނު ހަދާ މަޖިލީހުގެ ރައީސް އެވެ.
