ބޭލް ހޯދުމަށް މަސައްކަތް ކުރާނަން: މޮރީނިއޯ

ރެއާލް މެޑްރިޑަށް ކުޅެމުން އަންނަ ވޭލްސްގެ ވިންގާ ގެރެތް ބޭލް ހޯދުމަށް މަސައްކަތްކުރާނެ ކަމަށް މެންޗެސްޓާ ޔުނައިޓެޑުގެ ކޯޗު ހޯޒޭ މޮރީނިއޯ ބުނެފި އެވެ.

ނޫސްވެރިންނަށް މައުލޫމާތުދެމުން މޮރީނިއޯ ބުނީ ބޭލް ރެއާލް އަށް ކުޅޭނަމަ އޭގެއިން ދޭހަވަނީ އޭނާ އެ ކްލަބުގައި މަޑުކުރާނެކަން ކަމަށާއި، އެހެންނަމަވެސް ބޭލްގެ ބޭނުން ރެއާލް އަށް ނުހިފި އޭނާ ޑިޕާޗާ ގޭޓްގައި ހުރެއްޖެ ނަމަ ޔުނައިޓެޑަށް ގެންނަން މަސައްކަތްކުރާނެ ކަމަށެވެ.

މިދިޔަ އަހަރުގެ އޮކްޓޯބަރު މަހު 2022 ވަނަ އަހަރުގެ ނިޔަލަށް ރެއާލްގައި މަޑުކުރަން ބޭލް ނިންމާފައިވާއިރު، މި ޓްރާންސްފާގައި ބޭލް ހޯދުމަށް ޔުނައިޓެޑުން މަސައްކަތްކުރަމުން އަންނައިރު، މިދިޔަ ޖެނުއަރީ ޓްރާންސްފާގައިވެސް އޭނާ ހޯދުމަށް އެޓީމުން ވަނީ މަސައްކަތްކޮށްފައެވެ.

މަޝްހޫރު ކުޅިވަރު ނޫހެއްކަމަށްވާ މާސާ އަށް ދާދި ފަހުން ދިން އިންޓަވިއުއެއްގައި ބޭލް ބުނީ ޔުނައިޓެޑުން އޭނާ އަށް ޝައުގުވެރިކަން ފާޅުކޮށްފައިނުވާ ކަމަށާއި، މިވަގުތު ރެއާލްގައި ހުރީ ވަރަށް ހިތްހަމަޖެހިގެން ކަމަށެވެ.

މީގެއިތުރުން ބޭލް ބުނީ ރެއާލްއާއެކު އޭނާ ދިގު މުއްދަތެއްގެ އެއްބަސްވުމެއް ހަދާފައިވާ ކަމަށާއި، އެއްވެސް ކްލަބަކާއެކު ކުރަންޖެހޭ މަޝްވަރާއެއް ނޯންނާނެ ކަމަށެވެ. އެގޮތުން އެއްވެސް ހުށަހެޅުމެއްވެސް ލިބިފައިނުވާ ކަމަށް އޭނާ ވަނީ ބުނެފައެވެ.

މިދިޔަ ސީޒަނުގެ ބޮޑު ބައެއް އަނިޔާގައި ހުންނަން ޖެހުނު ބޭލް މި ސީޒަނުގައި ކުޅެފައިވަނީ 27 މެޗެވެ. އަނިޔާގެ ސަބަބުން ބޭލް އަށް ގިނަ މެޗުތައް ގެއްލިފައިވާއިރު، ފިޓްވުމަށް އޭނާ އަންނަނީ މަސައްކަތްކުރަމުންނެވެ.

ޓޮންމަހް ހޮޓްސްޕާއިން 2014 ވަނަ އަހަރު ދުނިޔޭގެ ރެކޯޑް އަގަކަށް ރެއާލް މެޑްރިޑަށް ބަދަލުވެ، ބޭލް ވަނީ މިހާތަނަށް ރެއާލްއަށް 67 ލަނޑު ކާމިޔާބު ކޮށްދީފައެވެ. އެޓީމާއެކު އޭނާ ވަނީ ކޮޕާ ޑެލްރޭ، ފީފާ ކްލަބް ވޯލްޑްކަޕް، ޔޫއެފާ ސުޕަރކަޕް، އަދި ޔޫއެފާ ޗެމްޕިއަންސް ލީގު ދެފަހަރު ކާމިޔާބުކޮށްފައެވެ.