މޯދީގެ ވާދަވެރިޔާ، ޖަލަށްލާފައިވާ އަރްވިންދު ކެޖްރިވާލްގެ ބަންދުގެ މުއްދަތު އިތުރުކޮށްފި

ކޮރަޕްޝަންގެ މައްސަލައެއްގައި ހައްޔަރުކޮށްފައި ހުރި އިންޑިއާގެ މަޝްހޫރު އިދިކޮޅު ލީޑަރު އަރްވިންދު ކެޖްރިވާލްގެ ބަންދުގެ މުއްދަތު މި މަހުގެ ހަތް ވަނަ ދުވަހާ ހަމައަށް އިތުރުކޮށްފިއެވެ.

ދިއްލީ ސްޓޭޓްގެ ޗީފް މިނިސްޓަރު އަދި އާމް އާދްމީ ޕާޓީ (ކޮމަން މޭންސް ޕާޓީ) ގެ ވެރިޔާ ކެޖްރިވާލްގެ މައްޗަށް ތުހުމަތު ކުރަނީ މިހާރު އުވާލާފައިވާ ބަނގުރާގެ ސިޔާސަތުގައި ބައެއް ޕްރައިވެޓް ރީޓެއިލަރުންނަށް ފައިދާވާ ގޮތަށް ރިޝްވަތު ނެންގެވި ކަމުގެ ތުހުމަތެވެ.

އިންޑިއާގެ ބޮޑުވަޒީރު ނަރެންދުރަ މޯދީގެ ފެޑެރަލް ސަރުކާރުގެ ކޮންޓްރޯލް އޮންނަ އެޖެންސީއެއް ކަމަށްވާ އެންފޯސްމަންޓް ޑައިރެކްޓްރޭޓް (އީޑީ) އިން އޭނާ ހައްޔަރުކުރީ މިދިޔަ މާޗް މަހުގެ 21 ވަނަ ދުވަހުއެވެ.

ދިއްލީގެ މަޝްހޫރު ތިހާރު ޖަލުގައި ބަންދުކޮށްފައި ހުރި ކެރްޖްރިވާލް ވަނީ އޭނާގެ މައްޗަށް ތުހުމަތު ކޮށްފައިވާ ކަންކަން ދޮގުކޮށްފައެވެ.

ގައުމީ އިންތިހާބަށް ހަފުތާއެއްހާ ދުވަސް ވެފައި ވަނިކޮށް އޭނާ ހައްޔަރުކުރުމާ ގުޅިގެން އިދިކޮޅު ޕާޓީތަކުން ވަނީ މިއީ މޯދީގެ ސަރުކާރުން ހިންގި ސިޔާސީ ބަދަލު ހިފުމުގެ އަމަލެއް ކަމަށް ބުނެ އެކަން ކުށްވެރިކޮށްފައެވެ.

ބުދަ ދުވަހު ވީޑިއޯ ކޮންފަރެންސް މެދުވެރިކޮށް ކެޖްރިވާލް ވަނީ އޭނާގެ ބަންދުގެ މުއްދަތު އިތުރުކުރި ސްޕެޝަލް ގާޒީ ކަވޭރީ ބަވޭޖާގެ ކުރިމައްޗަށް ހާޒިރުކޮށްފައެވެ.

ކެޖްރިވާލް އަކީ ހަކުރުބަލީގެ ޝިކާރައަކަށް ވެފައިވާ އެ ބަލީގެ މަތީސްޓޭޖެއްގައި ހުރި މީހެކެވެ. އޭނާއަކީ އޭނާގެ ލޭގައި ހަކުރު 320 އެމްޖީ/ޑީއެލް އަށް އިތުރުވުމުން، އެއީ އާދައިގެ 70-100 އެމްޖީ/ޑީއެލް އަށް ވުރެ ދެގުނަ އިތުރު ވުމެއް ކަމުން ލޯ ޑޯޒް އިންސިއުލިން ޖަބެއް ޤަވާއިދުން ކޮންމެދުވަހަކުވެސް ދޭންޖެހޭ މީހެކެވެ.

ހަކުރު ބަލީގެ ޝިކާރައަކަށްވެފައިވާ ކެޖްރިވާލް ވަނީ އެތައް ފަހަރެއްގެ މަތިން އެދުމުންވެސް އޭނާއަށް އިންސިއުލިން ފޯރުކޮށްނުދޭކަމަށް ބުނެ ތިހާރުގެ ކަމާބެހޭ ފަރާތްތަކަށް ވަރަށް ބޮޑަށް ފާޑުވިދާޅުވެފައެވެ.

ޗީފް މިނިސްޓަރު ޖަލުއޮފިޝަލުންނަށް މިއަދު ފޮނުއްވި ސިޓީއެއްގައި ވިދާޅުވެފައިވަނީ އިންސިއުލިން އަށް ޑިމާންޑް ކުރާތާ 10 ދުވަސް ވެފައިވާ ކަމަށެވެ. އަދި ހަކުރު ގެ މިންވަރު މަތިކަން އޭނާ ދައްކާ ކޮންމެ ޑޮކްޓަރަކަށް ވެސް ހުށަހަޅާފައިވާނެކަމަށް ކެޖްރިވާލް ވިދާޅުވިއެވެ.

އީޑީއިން މިދިޔަ ހަފުތާގައި ވަނީ ކެޖްރިވާލް އޭނާގެ ލޭގައި ހަކުރު އިތުރު ކުރުމުގެ ބޭނުމުގައި އިތުރު ހަކުރު އަޅައިގެން ސައި ބޯކަމަށް ތުހުމަތުކޮށްފައެވެ. ކެޖްރިވާލު ޖަލުގައި ހުންނެވި ނަމަވެސް އޭނާއަށް ކާބޯތަކެތި ފޯރުކޮށްދެނީ އޭނަގެ އަމިއްލަ ގެއިން ތައްޔާރުކުރާ ޚާއްޞަ ކާނާ ކަމަށް ޖަލުގެ އޮފިޝަލުން ބުނެއެވެ.

ކެޖްރިވާލްގެ ޕާޓީން އެ ތުހުމަތުތައް ދޮގުކޮށް ބުނެފައިވަނީ ފެޑެރަލް އެޖެންސީން ހަގީގަތާ ހިލާފު ވާހަކަތައް ދައްކަނީ ޗީފް މިނިސްޓަރަށް ގޭގައި ތައްޔާރުކުރާ ކާބޯތަކެތި ދިނުން ހުއްޓުވުމަށް ކަމަށެވެ.

ކޮރަޕްޝަންގެ ތުހުމަތުގައި ހައްޔަރުކޮށްފައިވާ އޭނާގެ ޕާޓީގެ ތިން ލީޑަރުންގެ ތެރޭގައި ކެޖްރިވާލް ހިމެނިވަޑައިގަންނަވައެވެ. އޭނާއަކީ އިންޑިއާގައި ހައްޔަރުކުރި ފުރަތަމަ ޗީފް މިނިސްޓަރު ވެސް މެއެވެ.

އޭނާ ހައްޔަރުކުރުމުން މޯދީގެ ސަރުކާރުގައި ދުސްތޫރީ ކާރިސާއެއް އުފެދިދާނެ ކަމުގެ ބިރު ބޮޑުވެ، ކެޖްރިވާލްގެ ޕާޓީން ވަނީ ވެރިކަން ކުރާ ދިއްލީ އާއި އުތުރުގެ ސްޓޭޓެއް ކަމަށްވާ ޕަންޖާބުގައި ވެސް ވަނީ މުޒާހަރާތައް ފަށައިފައެވެ.

އަދި އިންޑިއާގައި މިނިވަން އިންސާފުވެރި އިންތިހާބެއް ބޭއްވުމަށް ގޮވާލާ އެމެރިކާ އާއި ޖަރުމަނުގެ ސަމާލުކަން ވެސް ވަނީ ހޯދާފައެވެ.

އިންޑިއާގައި މިހާރު ކުރިއަށްދާ އިންތިހާބުގައި 27 ޕާޓީ ހިމެނޭ އިދިކޮޅު އިއްތިހާދުގެ ތެރެއިން ކެޖްރިވާލްގެ ޕާޓީން ވާދަކުރާއިރު، އާލީ އޮޕީނިއަން ޕޯލްތަކުން މޯދީގެ ވެރިކަން ކުރާ ބީޖޭޕީއަށް ތާއީދު ބޮޑުކަމަށް ރިޕޯޓްތައް ބުނެއެވެ.