ބާލިން ބަލިކޮށް، ލެވަކޫސަނުން ލީގު ހޯދުމާ ގާތަށް

ޖަރުމަނު ލީގުގައި ޔޫނިއަން ބާލިންއާ ދެކޮޅަށް ކުޅުނު މެޗުން މޮޅުވެ، ލީގު ހޯދުމާ ގާތަށް ބަޔާ ލެވަކޫސަނުން ޖެހިލައިފި އެވެ.

ބާލިންގެ އަމިއްލަ ދަނޑުގައި ކުޅުނު މެޗު ލެވަކޫސަނުން ކާމިޔާބު ކުރީ 1-0 އިންނެވެ. ޖަރުމަނު ލީގުގައި އެންމެ ފަހުގެ ޗެމްޕިއަން ބަޔާން މިއުނިކް ކުޅުނު މެޗުން ބަލިވުމުން، ލެވަކޫސަނަށް ވަނީ ލީގު ހޯދުމުގެ ބޮޑު އުންމީދެއް ލިބިފަ އެވެ. ލީގުގައި ބާކީ ހުރި މެޗުތަކުގެ ތެރެއިން، އެންމެ މެޗަކުން މޮޅުވެގެން ލެވަކޫސަނަށް ލީގު ކާމިޔާބު ކުރެވޭނެ އެވެ.

މެޗުގައި ލެވަކޫސަންގެ ހަމައެކަނި ލަނޑަކީ ފުރަތަމަ ހާފުގެ އިތުރު ވަގުތުގައި ލިބުނު ޕެނަލްޓީ ކާމިޔާބު ކޮށްގެން ޖެހި ލަނޑެކެވެ. އެ ޓީމަށް ލިބުނު ޕެނަލްޓީ ކާމިޔާބުކޮށް ލީޑު ނަގައިދިނީ ފްލޯރިއަން ވާޓްޒް އެވެ. އެ ޕެނަލްޓީގެ ކުރިން ބާލިންގެ ރޮބިން ގޮޒެންސް އަށް ވަނީ ދެ ވަނަ ރީނދޫ ކާޑާއެކު ރަތް ކާޑު ދައްކައިފަ އެވެ.

މޮޅާއެކު ލެވަކޫސަނުން ވަނީ އެއް ވަނައިގައި 16 ޕޮއިންޓުގެ ލީޑެއް ނަގައިފަ އެވެ. އެއީ މިހާތަނަށް ލީގުގައި ކުޅުނު 28 މެޗުން 76 ޕޮއިންޓު ހޯދައިގެންނެވެ. ހަމަ އެ އަދަދަށް މެޗު ކުޅެގެން، ދެ ވަނައިގައި އޮތް އެންމެ ފަހުގެ ޗެމްޕިއަން ބަޔާން މިއުނިކަށް ލިބެނީ 60 ޕޮއިންޓެވެ.