ރަފީނިއާގެ ލަނޑުން ބާސެލޯނާ މޮޅުވެއްޖެ

ސްޕެނިޝް ލީގުގައި ލަސް ޕަލްމާސްއާ ދެކޮޅަށް ކުޅުނު މެޗުން ބާސެލޯނާ މޮޅުވެއްޖެ އެވެ.

ހޮނިހިރު ދުވަހުގެ ރޭ ކުޅުނު މެޗުން ބާސެލޯނާ މޮޅުވީ 1-0 އިންނެވެ.

މެޗުގެ 19 ވަނަ މިނެޓުގައި ބާސެލޯނާ އިން ލަނޑު ޖަހައި ލީޑު ވެސް ނެގި އެވެ. ބްރެޒިލްގެ ރަފީނިއާ ލަނޑު ޖަހައި ބާސެލޯނާ އަށް ލީޑު ނަގައިދިން ނަމަވެސް، ވީއޭއާރުން ވަނީ އެ ލަނޑު ބަަލަައި ނުގަންނަން ނިންމައިފަ އެވެ. މެޗުގެ ފުރަތަމަ ހާފުގައި ލަސް ޕަލްމާސްގެ ގޯލު ކީޕަރު އަލްވާރޯ ވަލޭސް އަށް ވަނީ ސީދާ ރަތް ކާޑު ވެސް ދައްކައިފަ އެވެ. މެޗުން ބާސެލޯނާ މޮޅުވީ ދެ ވަނަ ހާފުގައި ރަފީނިއާ ޖެހި ލަނޑުންނެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްްދިނީ ޔާއޯ ފެލިކްސް އެވެ.

މޮޅާއެކު ބާސެލޯނާ އިން އޮތީ ލީގު ތާވަލްގެ ދެ ވަނައިގަ އެވެ. އެއީ މިހާތަނަށް ލީގުގައި ކުޅުނު 30 މެޗުން 67 ޕޮއިންޓާއެކު އެވެ. ބާސެލޯނާ އަށް ވުރެ އެއް މެޗު މަދުން ކުޅެގެން އެއް ވަަނައިގައި ރެއާލް މެޑްރިޑަށް ލިބެނީ 72 ޕޮއިންޓެވެ.