ލާޒިއޯ އަތުން ބަލިވެ ޔުވެންޓަސް އިން ފުރުސަތު ނަގާލައިފި

އިޓާލިއަން ލީގުގައި ލާޒިއޯއާ ދެކޮޅަށް ކުޅުނު މެޗުން ބަލިވެ، ޔުވެންޓަސް އިން ފުރުސަތު ނަގާލައިފި އެވެ.

ލާޒިއޯގެ ދަނޑުގައި ކުޅުނު މެޗުން މޮޅުވެ، ދެ ވަނައިގައި އޮތް އޭސީ މިލާނާ ޕޮއިންޓުގެ ގޮތުން ހަމަ ކުރުމުގެ ފުރުސަތު ޔުވެންޓަސް އޮތެވެ. ނަމަވެސް މެޗުން ބަލިވެ އެ ފުރުސަތު ގެއްލުނުއިރު، މެޗުގެ އަދަދު ހަމަކޮށްގެން އޭސީ މިލާނަށް ލީޑު ފުޅާ ކުރުމުގެ ފުރުސަތު މިހާރު އޮންނާނެ އެވެ.

ލާޒިއޯއާ ދެކޮޅަށް ކުޅުނު މެޗުން ޔުވެންޓަސް ބަލިވީ 1-0 އިންނެވެ. މެޗުގައި ދެ ޓީމަށް ވެސް ވަނީ ލަނޑު ޖަހާނެ ފުރުސަތު ލިބިފަ އެވެ. ހަމަހަމަކޮށް ދިޔަ މެޗު ލާޒިއޯ އިން ކާމިޔާބު ކުރީ ފަހު ވަގުތު ލަނޑު ޖަހައިގެންނެވެ. މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ލާޒިއޯ މޮޅުކޮށްދިނީ އާދަމް މަރުސިޗް އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ މަތެއޯ ގުއެންޑޯޒީ އެވެ.

މިއީ މި ސީޒަންގެ ލީގުގައި ޔުވެންޓަސްގެ ފަސް ވަނަ ބައްޔެވެ. މިހާތަނަށް ލީގުގައި ކުޅުނު 30 މެޗުން އެ ޓީމަށް ލިބެނީ 59 ޕޮއިންޓެވެ.