ލޯނު ދެއްކުމުގައި ލުއި ގޮތްތަކެއް ބޭނުންފުޅުވީ ހިނދު ރައީސްގެ ހިފެހެއްޓުމެއްނެތް ތައުރީފް އިންޑިއާއަށް

މިސަރުކާރުގެ ފޮރިން ޕޮލިސީ މިދިޔަ ސަރުކާރާއި އަޅާބަލާއިރު ވަރަށް ތަފާތެވެ. ހުރިހާ ގައުމަކާއި ގާތްގުޅުމެއް ބާއްވާނެ ކަމަށް ސަރުކާރުގެ އިސްބޭފުޅުން ވިދާޅުވަމުން ގެންދެވި ނަމަވެސް ފެނިގެން ދިޔައީ އަވައްޓެރި އިންޑިއާ އާއި ދުރަށް ދިޔަ މަންޒަރެވެ. މިސަރުކާރުގެ އިސްބޭފުޅުން ފާޅުކަން ބޮޑު ގޮތެއްގައި އިންޑިޔާއަށް ހަޖޫ ވެސް ޖެހިއެވެ. އަދި ރައީސުލްޖުމްހޫރިއްޔާ ޑރ.މުހައްމަދު މުއިއްޒު ޗައިނާއަށް ކުރެއްވި ފުރަމާނަ ދަތުރުފުޅަށްފަހު އެނބުރި ރާއްޖެ ވަޑައިގެން އެއާޕޯޓުގައި ހުންނަވައި ދެއްކެވި ވާހަކަފުޅުގައި އިންޑިއާއަށް ނުސީދާ ބަހުގެ ހަމަލާތަކެއް އަމާޒު ކުރެއްވިއެވެ. އިންޑިއާ ކަނޑަކީވެސް ވަކި ގައުމެއްގެ ކަނޑެއް ނޫންކަމަށް ވިދާޅުވެ އެ ދުވަހު ރައީސް މުއިއްޒު ވަނީ އިންޑިއާގެ ނަން ވިދާޅުނުވެ، ނުސީދާ ބަސްތަކެއް އަމާޒު ކުރެއްވިއެވެ. ވަރަށް ރުންކުރުކޮށް ވިދާޅުވީ ރާއްޖެއަކީ ވަކި ގައުމެއްގެ "ބެކްޔާޑު" ގައި އޮތް ގައުމެއް ނޫންކަމަށެވެ.

މިމޭރުމުން ވާހަކަފުޅު ދެއްކެވި ރައީސް މުއިއްޒުގެ ރާގު މިހާރު މިވަނީ ބަދަލުވެފައެވެ. ލޯނު ދެއްކުމުގައި ލުއި ގޮތްތަކެއް ބޭނުންފުޅުވީ ހިނދު ރައީސްގެ ހިފެހެއްޓުމެއްނެތް ތައުރީފް އިންޑިއާއަށް މިވަނީ ކޮށްފައެވެ. މިއަދު އިންޑިއާ ގޯހެއް ނުވިއެވެ. އެހެންނުވާންވީ ސަބަބެއް ވެސް ނެތެވެ. ބައެއް ސިޔާސީ ބޭފުޅުން ވިދާޅުވާ ގޮތުގައި އެމަނިކުފާނަށް ތުރުކީއިން ލިބޭނެ ކަމަށް އުންމީދުކުރި ވަރަށް އެހީތަކެއް ނުލިބުނެވެ. ޕީޕީއެމް-ޕީއެންސީއަށް ސިޔާސީ ގޮތުން އައި ހަމަނުޖެހުމާއެކު އަރަބި ބައެއް ގައުމުތަކުން ލިބޭނެ ކަމަށް އުންމީދު ކުރި ބައެއް އެހީތައް ވެސް ލިބޭނެ ކޮޅެއް ނުފެންނަ ކަމަށް އެބޭފުޅުން ވިދާޅުވެއެވެ.

ނަތީޖާއެއް ގޮތުން އަބަދުވެސް ރާއްޖެއަށް ހުރިހާ ކަމެއްގައި އެހީތެރިކަން ފޯރުކޮށްދެމުން އަންނަ އިންޑިއާ އެކަހެރިކުރާނަމަ، ބޮޑަށް ނިކަމެތިވުން ނޫން ކަމެއް ނުވާނެކަން އެމަނިކުފާނު އަމިއްލަފުޅަށް ވެސް މިއަދު މިވަނީ ގަބޫލުޕުޅު ކުރައްވަން މަޖުބޫރުވެފައެވެ.

އިންޑިއާއަށް ވަރަށް ތައުރީފު ކުރައްވައި ރައީސް މުއިއްޒު ވިދާޅުވެފައި މިވަނީ އެތައް އަހަރެއް ކުރިން ފެށިގެންވެސް އިންޑިއާއިން ރާއްޖެއަށް އެހީވަމުން އައިސްފައިވާ ކަމަށާއި، ރާއްޖޭގައި އިންޑިއާގެ މަޝްރޫއުތައް ހިންގުމާއި މެދު އެއްވެސް މައްސަލައެއް ނެތް ކަމަށެވެ. އެއްވެސް މަޝްރޫއެއްވެސް ހުއްޓާލައްވަން ބޭނުންފުޅުނުވާކަން ފާހަގަކުރައްވައި ރައީސް މުއިއްޒު ވިދާޅުވީ، ބޭނުންފުޅުވަނީ މިހާރަށްވުރެވެސް ބާރަށް އިންޑިއާގެ މަޝްރޫއުތައް ކުރިއަށް ގެންދިއުމަށް ކަމަށެވެ. އެގޮތުން އެންމެ ދުވަސްވީ އަދި އެންމެ ގިނަ މަޝްރޫއުތައް ރާއްޖޭގައި ހިންގާފައިވަނީވެސް އިންޑިއާއިންކަން ރައީސް މުއިއްޒު ފާހަގަ ކުރެއްވިއެވެ.

އޭގެ އިތުރުން، ރާއްޖެއަށް ނުކަތާވަރަށް ލޯނު ނަގާފައިވާކަން ފާހަގަ ކުރައްވައި ރައީސް މުއިއްޒު ވިދާޅުވެފައިވަނީ އިންޑިއާއާ މަޝްވަރާކޮށްގެން ލޯނުތައް ދައްކާލުމުގައި ލުއި ގޮތްތަކެއް ވާން ބޭނުންފުޅުވާކަމަށެވެ. އެއް ގައުމުން އަނެއް ގައުމަށްވާ އެހީއަކީ ބޭނުން ނެތް އެއްޗެއްކަމަށް ބުނެ އެއްލާލުމަކީ އެއީ ގޮތެއް ނޫން ކަމަށް އެމަނިކުފާނު ވިދާޅުވިއެވެ.

އިންޑިއާ-ރާއްޖޭގެ ގުޅުމަށް އިޝާރާތް ކުރައްވައި ވެސް ރައީސް މުއިއްޒު ވަނީ ވާހަކަފުޅު ދައްކަވާފައެވެ.

އެގޮތުން އެމަނިކުފާނު ވިދާޅުވީ އަބަދުވެސް އެންމެ ގާތް އަވައްޓެރި ގައުމެއްގެ ގޮތުގައި އިންޑިއާ އޮންނާނެ ކަމަށާއި، އިންޑިއާއާއި ރާއްޖެއަކީ ސަގާފަތުގެ ގޮތުންވެސް ގާތް ދެ ގައުމު ކަމަށެވެ. ކުރިއަށް އޮތް ތަނުގައިވެސް އެ ގުޅުން އޮންނާނެކަމަށް އުއްމީދު ކުރައްވާ ކަަމަށް ވެސް އެމަނިކުފާނު ވިދާޅުވިއެވެ.

އިންޑިއާއަށް ރައީސް މުއިއްޒު ވަރަށް ބޮޑަށް ތައުރީފް ކުރައްވާފައިވާއިރު،ޗައިނާ އިން ވަޑައިގެންނެވުމަށްފަހު، އިންޑިއާއާ ދިމާލަށް ކުޑައިމިސް ބަސް ވިދާޅުވީ ވެސް، ރައީސް މުއިއްޒު އެވެ. އެހެން ނަމަވެސް، އަނެއްކާ މިއަދު ރައީސް މުއިއްޒުގެ ރާގު މި ބަދަލުވީ ކިހިނެއްވެތޯ އެވެ؟ މީގެ ކުރިން ކުރެއްވުނު ކަންތަކާއި، ވިދާޅުވެވުނު ބަސްތަކުގެ ސަބަބުން ޕްރެޝަރަށް ވެއްޓި، އެކަމުން އަރައި ގަތުމަށް ވިދާޅުވި ވިދާޅުވުމަކަށް ވެސް ވެދާނެ އެވެ! އެއީ މިއަދު ތަރައްގީގެ ގިނަ މަޝްރޫއުތައް ވަނީ ހުއްޓިފައެވެ. ގަދަބަސް ވިދާޅުވުމަށްފަހު ފެށި މަޝްރޫއުތައް ވެސް ކުރިއަށް ނުދެއެވެ.