ޑްރޯން އާއެކު ގައުމީ ސަލާމަތުގެ ނިޒާމު ހަރުދަނާކުރަންޖެހޭ: ހަމީދު

ގައުމީ ސަލާމަތް ރައްކާތެރިކޮށް އިތުރުކުރުމުގެ ގާބިލްކަމެއްގެ ގޮތުގައި އަންމޭންޑް އެރިއަލް ވެހިކަލްސް (ޔޫއޭވީ) އިތުރުކުކުރުމާއެކު އެކަމަށް ކުރީގެ ކޮމިޝަނަރ އޮފް ޕޮލިސް މުހައްމަދު ހަމީދު މަރުޚަބާ ވިދާޅުވެއްޖެއެވެ.

ކަނޑާއި ވައިގެ ސަރަހައްދު ބަލަހައްޓަން އެމްއެންޑީއެފްއަށް ގެނައި ޔޫއޭވީތައް ހުކުރު ދުވަހުގެ ރޭ ވަނީ ދައްކާލާފައެވެ. މިއާއެކު އެމްއެންޑީއެފްގެ އެއާ ކޯ ގެ ނަމުގައި ދިވެހި ސިފައިންގެ ވައިގެ ޚިދުމަތް ވަނީ ތަޢާރަފްކޮށްފައެވެ.

މިކަމާއި ގުޅިގެން ކުރީގެ ސީޕީ"އެކްސް" ގައި ކުރެއްވި ޕޯސްޓެއްގައި ވިދާޅުވީ، ދިވެހި އަސްކަރިއްޔާގެ ގާބިލުކަން އިތުރު ކުރުމަށް ގެނައި ޔޫއޭވީތަކާއެކު ގައުމީ ސަލާމަތަށް ލިބުނު ރައްކާތެރި ކަމަށްޓަކައި އެކަމަށް މަރުހަބާ ވިދާޅުވާ ކަމަށެވެ.

ނަމަވެސް ރާއްޖޭގައި ހިންގޭ ޖޮއިންޓު އޮޕަރޭޝަންތަކުގައި މައުލޫމާތު ބަދަލު ކުރެވޭއިރު، އޮތް އެންމެ ބޮޑު އެއް ހުރަހަކީ ގައުމީ ސަލާމަތާއި ގުޅުންހުރި މުއައްސަސާތަކުގެ މެދުގައި އަމަލީ ގޮތުން ގުޅިގެން މަސައްކަތް ކުރުމުގެ ނިޒާމުތައް ނެތުންކަމަށެވެ. އަދި އެކަމަށް ރަނގަޅު ނިޒާމެއް ގާއިމު ކުރަން ޖެހޭ ކަމަށް ހަމީދު ވިދާޅުވި އެވެ.

އޭގެ އިތުރުން ޔޫއޭވީގެ ގާބިލުކަން ފުރިހަމައަށް ހިފަން ޖެހޭކަން ފާހަގަކުރައްވާ ހަމީދު ވިދާޅުވީ، ގުޅިގެން މަސައްކަތްކޮށް ގައުމީ ސަލާމަތް އިތުރަށް ވަރުގަދަ ކުރެވޭނެ ކަމަށެވެ.

މިޚިދުމަތާ ގުޅޭގޮތުން އެމްއެންޑީއެފްއިން ނެރުނު ނޫސްބަޔާނެއްގައި ބުނެފައިވަނީ، މި ޚިދުމަތް ގާއިމުކުރެވުމުން، ދިވެހިރާއްޖޭގެ ކަނޑުގެ ސަރަހައްދުތަކުގައި ހިނގާ ހާދިސާތަކުގައި ދިވެހި ދައުލަތުން އަދާކުރުމަށް ލާޒިމުކުރާ ޒިންމާތަކާއި މަސްއޫލިއްޔަތުތައް މިހާރަށްވުރެން ފުރިހަމައަށް އަދާކުރުމަށް މަގުފަހިވެގެންދާނެ ކަމަށެވެ. އަދި މީގެ އިތުރުން، އިންޑިއާ ކަނޑުގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި އިންޑިއާ ކަނޑުގައި ހަރަކާތްތެރިވާ އެހެން ގައުމުތަކާ ގުޅިގެން ދިވެހިރާއްޖެއަށް މިހާރަށްވުރެން މާނަވީ ދައުރެއް އަދާކުރުމަށް މަގުފަހިވެގެންދާނެ ކަމަށްވެސް އެބަޔާނުގައި ބުނެފައިވެއެވެ.