ވަތަނިއްޔަތުތަ؟ ނޫނީ "ހޭޓް ސްޕީޗްތަ"؟

ފުރަތަމަ ދުވަހުން ފެށިގެން މަނިކުފާނު ކުރައްސަަވާ ތަސްވީރަކީ ގައުމިއްޔަތުގެ ތަސްވީރެވެ. ޤައުމު ދެކެ ލޯބިވާ ވާހަކަ އާއި ޤައުމަށް ޢައްދާރު ނުވާނެ ވާހަކައެވެ. މި ނޫނަސް ޖަޒުބާތުގަ ޖެހޭ ކަހަލަ ޤައުމީ ވާހަކަ އެއް ވެއްޖެއްޔާ އެ ވާހަކަ އެއް ދައްކަވައެވެ. ޤައުމު ދެކެ ބަޔަކު ލޯބި ނުވާ ވާހަކަ އާއި ތިމަން މަނިކުފާނު އެދިވަޑައިގަންނަވާހާ ގޮތަކަށް ޢަމަލު ނުކުރައްވާ ބޭފުޅަކީ އެއީ ޤައުމަށް ޣައްދާރުވާ ބޭފުޅެއް ކަމަށް ސިފަކުރައްވާ ފަހަރުވެސް މަދެެއް ނޫނެވެ. މިހެން މި ރާގަށް މަނިކުފާނު ދައްކަވާ ވާހަކަތައް އަޑު އަހާލީމަ ބައެއް ފަހަރު ހިތަށް އަރައެވެ. އެއީ ހަމަ ހަގީގަތުގައި ވެސް ވަތަނީ ވެގެން ދައްކާ ވާހަކައެއް ވާބައެވެ. ނޫނީ ގައުމުގެ ވާހަކައިގެ ނިވާފަތްގަނޑުގައި ހޭޓް ސްޕީޗް ނުވަތަ ނަފްރަތު އުފެދޭ ގޮތަށް ވާހަކަދައްކަވަނީ ނޫން ބާވައެވެ؟

ހޭޓް ސްޕީޗަކީ ދަށްކޮށްލުމާއި، ނަފްރަތު އުފެއްދުމާއި ވަކި ގްރޫޕެއް ހަސަބެއް ނަސަބެއް ނުވަތަ ވަކި ބަޔަކަށް ޚާއްސަކޮށްގެން ނަފްރަތު އުފެދޭ ގޮތަށް ދައްކަވާ ވާހަކަތަކެވެ. އެހެންކަމަށް ވާއިރު ރާއްޖެ އަކީ ކުލަޔަކުން ދީނަކުން ނުވަތަ ނަސްލީ ގޮތަކުން ތަފާތެއް ހުރި ބަޔަކު ތިބި ތަނެއް ނޫނެވެ. އެހެންކަމުން އެ މޭރުމުން ވާހަކަދެއްކުމުގެ ފުރުސަތެއް ނެތެވެ. އެހެންނަމަވެސް ރައީސް ޤައުމިއްޔަތުގެ ނަމުގައި ދައްކާ ބައެއް ވާހަކަތަކުން ރާއްޖޭގެ ރައްޔިތުންގެ ހިތުގައި ވަކި ޤައުމަކަށް ނިސްބަތްކޮށް ނަފްރަތާއި ނުރުހުން ވެރި ވުމުގެ ފުރުސަތު އެބަ އޮތެވެ. ވަކި ޤައުމަކަށް ނިސްބަތްކޮށް ކުޑައިމީސްކުރުމާއި، ހަނގާކުރުމުގެ އަމަލުތައް ފާޅުގައި ސަރުކާރުގެ އޮފިޝަލުން ހިންގާ އިރު އެކަމާއި މެދު "އުފް"ވެސް ވިދާޅެއް ނުވެއެވެ. ނުވިތާކަށް އެފަދަ ކަންކަމަށް ދެއްވަނީ ހިތްވަރެވެ.

ތެދެކެވެ. އަމިއްލަ ޤައުމާއި އަމިއްލަ ވަތަނުގެ ހިމާޔަތުގައި ކޮންމެ މީހަކުމެ ނުކުންނަން ވާނެއެވެ. ކޮންމެ މީހަކުވެސް ބަލަން ވާނީ އަމިއްލަ ޤައުމަށްޓަކާ ތިމާ އަށް ކޮށްދެވުނު ކަމެއް ކޮށްދެވޭތޯއެވެ. މި ބާވަތުގެ ވާހަކަތަކަކީ ކޮންމެ ދިވެއްސެއްގެ ވެސް ލެޔާއި ޖޯޝާއި ގުޅިފައި ހުރި ޖަޒުބާތީ ވާހަކަތަކެވެ. އެހެންކަމުން ގައުމިއްޔަތުގެ ނަމުގައި އަވަށްޓެރިންނާއި ސަރަހައްދީ ބައިވެރިންނާއި ޖެހޭ ގޮތަށް ވާހަކަދެއްކުމަކީ އެއީ ދޭދޭ ގުޅުމަށް ހިޔަނި އެޅޭނެ ކަމެއްކަން ޔަގީނެވެ. އެކަމުގެ ސަބަބުން ވަކި ބަޔަކަށް އަމާޒުކޮށް ނަފްރަތާއި ރުޅިވެރިކަން އުފެދެން މަގުފަހިވެއެވެ. ދޭސީންނާއި ބިދޭސީން މަސްހުނިވެފައިވާ އާބާދީ އެއް ދިރިއުޅޭ މި ޤައުމުގައި މިފަދަ ނަފްރަތުގެ އަލިފާންގަނޑެއް ރޯވެއްޖެ ނަމަ އޭގައި ޖެހި އަނދާނެ ދިވެހިންވެސް މަދެއް ނުވާނެއެވެ.

ހަމައެހެންމެ ވަކި ޕާޓީއަކަށް ނިސްބަތްވާ މީހުންނަކީ ލާދީނީ ބައެއް ކަމަށް ނުވަތަ ޤައުމަށް ޣައްދާރުން ކަމަށް ދޭހަވާ ގޮތަށް މަނިކުފާނު ދައްކަވާ ވާހަކަ އަކީ ވެސް ހަމަ އެފަދަ ވާހަކައެކެވެ. އެފަދަ ވާހަކަތައް ސަރުކާރުގެ އިސް ވެރިން ދެއްކުމުގެ ނަތީޖާ އަކީ ޤައުމީ ބަހުސްއަކަށްދާ ކެނޑިޑޭޓް ގަޔަށް ކަޅުތެޔޮޖެހުމެވެ. ވަކި ޕާޓީ އެއްގެ މީހަކަށް ވީތީ މަގުމަތިން ސައިކަލުގައި ދަނިކޮށް ދިމާކޮށްލުމެވެ. ހަރުގެ ތަކުގައި ރޯކޮށްލުމެވެ. މިފަދަ ކިތަންމެ ކިތަންމެ ހަމަނުޖެހުމެއް އުފެދެނީ ޖަޒުބާތުގައި ވިސްނައިނުލާ ސިޔާސީ ބޭފުޅުން ދައްކަވާ ވާހަކަތަކުގެ ސަބަބުންނެވެ. އެހެންވީމަ ވާހަކަތައް ދައްކަވާ އިރު މިއަށް ވުރެ ޒިންމާދާރުވާން ޖެހެއެވެ.