އަނަސްގެ މަރުގެ މައްސަލަ ނިމުނު ގޮތުގެ ރިޕޯޓް އަދިވެސް ނުލިބޭ، ދައުވާ ސާބިތުނުވި މީހަކު މަސްތުވާތަކެތީގެ މައްސަލައެއްގައި ހައްޔަރުކޮށްފި
5 މާރިޗު 2024 | އަންގާރަ 12:58ހައްޔަރުކުރި މީހާގެ ނަން ފުލުހުން ހާމައެއް ނުކުރޭ
އަނަސް
ރ. މީދޫ ފެންފިޔާޒުގޭ މުހައްމަދު އަނަސްގެ މަރާލުމުގައި ބައިވެރިވިކަމުގެ ތުހުމަތު ކުރެވޭ މީހަކު، އިތުރު މައްސަލައެއްގައި ހައްޔަރުކޮށްފިއެވެ.
އަންގާރަ ދުވަހު ބޭއްވި ނޫސްވެރިންގެ ބައްދަލުވުމެއްގައި ޑެޕިއުޓީ ކޮމިޝަނަރ އޮފް ޕޮލިސް އިސްމާއީލް ނަވީން ވިދާޅުވީ، އަނަސް މަރާލުމުގައި ބައިވެރިވުމުގެ ތުހުމަތު އޮތް މީހަކު ހައްޔަރުކޮށްފައި ވާކަމަށާއި، އޭނާ ހައްޔަރުކޮށްފައި ވަނީ މަސްތުވާތަކެތީގެ މައްސަލައެއްގައި ކަމަށެވެ. އޭނާ ހައްޔަރުކޮށްފައި ވަނީ ހޯމަ ދުވަހުގެ ރެއެވެ. އަނަސްގެ މަރުގެ ތުހުމަތުކުރާ މީހުންގެ މައްޗަށް ކުށް ސާބިތުނުވާކަމަށް ކްރިމިނަލް ކޯޓުން ވަނީ ހުކުމްކޮށްފައެވެ. އެއާއެކު އެ މައްސަލައިގައި ހިމެނޭ މީހުން ވަނީ މިނިވަން ވެފައެވެ.
ނަވީން ވިދާޅުވީ ފުލުހުން ހިންގި އޮޕަރޭޝަނެއްގައި ލޯންޗެއް ހުއްޓުވައި، ބަލައިފާސްކޮށްފައި ވާކަަމަށެވެ. އެ އޮޕަރޭޝަނުގައި މަސްތުވާތަކެއްޗާއި ބަނގުރަލާއެކު ފުލުހުން ވަނީ ގިނަ ބަޔަކު ހައްޔަރުކޮށްފައެވެ. ނަވީން ވިދާޅުވީ އަނަސްގެ މަރުގެ މައްސަލާގައި ދައުވާ އުފުލައި ކުށް ސާބިތު ނުވުމުގެ ސަބަބުން ދޫކޮށްލާފައިވާ މީހާ ވެސް ހައްޔަރުކުރީ މަސްތުވާތަކެއްޗާއެކު ކަމަށެވެ. އަނަސްގެ މަރުގެ ތުހުމަތުކުރާ މީހުންނަށް ކުށް ސާބިތުނުވި މައްސަލަ އިސްތިއުނާފުކުރުމުގެ ވިސްނުން އެބަހުރިކަމަށް، ޕްރޮސެކިއުޓަރ ޖެނެރަލް އޮފީހުން ވަނީ ބުނެފައެވެ. އެހެންނަމަވެސް އޭނާގެ މަރުގެ މައްސަލައިގެ ޝަރީއަތް ނިމުނު ގޮތުގެ ރިޕޯޓު އަދިވެސް ނުލިބޭކަމަށް ނަވީން ވިދާޅުވިއެވެ. އެ ރިޕޯޓް ލިބުން ލަސްވާތީ ޕްރޮސެކިއުޓަރ ޖެނެރަލްގެ އޮފީހުން ވަނީ މީގެ ކުރިން ކަންބޮޑުވުން ފާޅުކޮށްފައެވެ. މިއީ މަރުގެ މައްސަލައަކަށް ވާއިރު، އިސްތިއުނާފުކުރުމުގެ މުއްދަތުން ބައެއް އުނިވެގެންދާތީ އެކަމުގެ ކަންބޮޑުވުން އެބައޮތްކަމަށް ޕީޖީން ވަނީ މީގެ ކުރިން ވިދާޅުވެފައެވެ.
ޖުލައި 31، 2017ގައި ހިނގި އެ ހާދިސާއާ ގުޅިގެން، ކްރިމިނަލް ކޯޓުގައި މައްސަލަ ކުރިއަށް ދިޔައީ އޭނާ މަރާލުމުގައި ބައިވެރިވުމުގެ ދައުވާ އުފުލާފައި ވަނީ ހަތަރު މީހެއްގެ މައްޗަށެވެ. އޭގެ ތެރޭގައި ހިމެނެނީ ސ. ފޭދޫ ވެސްޓަންވިލާ، ހަސަން މަހްފޫޒާއި ލ. ގަމު، ތުނޑީ ޖުނައިހު އަބްދުﷲއާއި ތ. ކިނބިދޫ، ގުލްފާމުގޭ މުހައްމަދު ޝާޒާއި ދަފްތަރު ނަންބަރު 1746، ސިމާހް މޫސާއެވެ. ހޯމަ ދުވަހުގެ ރޭ ހައްޔަރުކުރީ ކާކުކަމެއް ފުލުހުން ހާމައެއް ނުކުރެއެވެ.
