"ޕްރެޒިޑެންޝަލް ޔޫތު އެޑްވައިޒަރސް ބޯޑަށް އުޖޫރައެއް ނުލިބޭނެ، ބެޖެއް ލިބޭނެ"

ޕްރެޒިޑެންޝަލް ޔޫތު އެޑްވައިޒަރސް ބޯޑަށް އުޖޫރަ އެއް ނުލިބޭނެ ކަމަށާއި ބެޖެއް ލިބޭނެ ކަމަށް ޔޫތު މިނިސްޓަރު އިބްރާހީމް ވަހީދު (އަސްވާޑް) ވިދާޅުވެއްޖެއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތަޢާރަފު ކުރައްވާފައިވާ "ޕްރެޒިޑެންޝަން ޔޫތު އެޑްވައިޒަރސް" ބޯޑުގެ މެންބަރަކަށްވުމުގެ ފުރުސަތު މިދިޔަ ޖެނުއަރީ މަހުގެ ތެރޭގައި ވަނީ ހުޅުވާލާފައެވެ. އެ ބޯޑުގެ ބޭނުމަކީ ޤައުމީ ކަންކަމުގައި ޒުވާނުންގެ ބައިވެރިވުން އިތުރުކުރުމާއި، މަޝްވަރާއާއި ނިންމުންތައް ނިންމާއިރު ޒުވާނުން ދެކޭގޮތް ހާމަކުރުމުގެ ފުރުސަތު ދިނުން ކަމަށް ސަރުކާރުން ވަނީ ބުނެފައެވެ. އެ ފަދަ ބޯޑެއް ވުޖޫދަށް ގެންނަކަން ސަރުކާރުން އިއުލާން ކުރި މިދިޔަ ޖެނުއަރީ މަހުގެ ތެރޭގައެވެ. މި ބޯޑު އެކުލަވާލަން މިހާރު ފޮނުވާފައިވާ ކަމަށް ޔޫތް މިނިސްޓްރީން ވަނީ ބުނެފައެވެ.

އަންގާރަ ދުވަހު ޔޫތު މިނިސްޓްރީން ބޭއްވި ނޫސްވެރިންގެ ބައްދަލުވުމެއްގައި މިނިސްޓަރު އިބްރާހީމް ވަހީދު ވަނީ އެ ބޯޑާއި ގުޅޭ އިތުރު ތަފްސީލުތައް ހިއްސާކުރައްވާފައެވެ.

މިނިސްޓަރު ވިދާޅުވީ ޔޫތު އެޑްވައިޒަރީ ބޯޑުގައި 15 މެންބަރުން ތިއްބަވާނެ ކަމަށެވެ. އެގޮތުން އެ ބޯޑުގައި ރައީސް އައްޔަންކުރައްވާ ދެ ބޭފުޅުން ތިއްބަވާނެ ކަމަށާއި ޔޫތު މިނިސްޓްރީން 4 ބޭފުޅުން، ޖަމިއްޔާތަކުން 1 ބޭފުޅެއް ވެސް ބޯޑަށް އައްޔަނުކުރައްވާނެ ކަަމަށް މިނިސްޓަރު ވިދާޅުވިއެވެ. އަދި ސިޔާސީ ދާއިރާ އަށް ޒުވާނުން ނެރުމަށްޓަކައި އެ ދާއިރާ އިން އެއް ބޭފުޅެއް ބޯޑަށް އައްޔަންކުރައްވާނެ ކަަމަށް ވެސް އޭނާ ވިދާޅުވިއެވެ. އަދި ޒުވާނުން އިގްތިސާދުގައި ހަރަކާތްތެރިވުން އިތުރުވުމަށް 1 ބޭފުޅަކު، އަދި ސްޕޯޓްސް މިނިސްޓްރީގެ ލަފަޔާ އެކު އަންހެން އެތުލީޓަކާއި، ފިރިހެން އެތުލީޓެއް އައްޔަންކުރުމުގެ އިތުރުން ގައުމީ ޔުނިވަރސިޓީގެ ސްޓޫޑެންޓް ކައުންސިލްގެ ރައީސާއި އިސްލާމިކް ޔުނިވަރސިޓީގެ ސްޓޫޑެންޓް ކައުންސިލްގެ ރައީސް އަދި އަމިއްލަ ކޮލެޖެއްގެ ރައީސް އެ ބޯޑަށް އައްޔަންކުރައްވާނެ ކަަމަށް މިނިސްޓަރު ވިދާޅުވިއެވެ.

އެ ބޯޑުގައި ތިބުމަކީ ވަރަށް ބޮޑަށް ޝަރަފެއްގޮތުގައި އޭނާ ވަނީ ސިފަކުރައްވާފައެވެ. އަދި އެ ބޯޑުގެ މެންބަރުންނަށް އެލަވެންސް އެއް ނުލިބުނު ނަމަވެސް ޕްރެޒިޑެންޝަލް ކައުންސިލްގައި ބައިވެރިވާ ފަރާތްތަކަށް ބެޖެއް ލިބޭނެ ކަމަށް މިނިސްޓަރު ވިދާޅުވިއެވެ. އަދި ބޯޑުގައި ހިމެނޭ ނަމަ ދައުލަތުގެ ހަފްލާތަކަށް ދައުވަތު ލިބުމާއި، ބޭރު ޤައުމުތަކުގައި ރާއްޖެ ތަމްސީލްކުރުމަށް ފުރުސަތު ހޯދައިދެއްވާނެ ކަމަށް ވެސް މިނިސްޓަރު ވިދާޅުވިއެވެ. އަދި މި ބޯޑުގެ 1 ބައްދަލުވުން ރައީސް ޗެއަރކުރައްވާނެ ކަމަށް ވެސް މިނިސްޓަރު ވިދާޅުވިއެވެ.